Deil 3 oet de serie printebukskes JUP en “DRUP” geit euver waat de vrinde nao schoeëltied doon. ’t Is ein geschreve en geteikend verhäölkje euver twieë bevrinde buurjónges die zich nao schoeëltied ammezere mit boete speule. Eur belaevenisse zien herkinbaar in de naoschoeëltied.
’t Printebukske is vanaaf 1 september 2025 te bestelle via d’n online webwinkel http://boekenbestellen.nl/boek (zeuk ónder Loot18) en vanaaf 1 oktober te koup beej d’n bookhandel.
D’n 3e twieëtalige verhaolebundel van Loot18.
“Gelaoge, verzónne of…? – Gelogen, verzonnen of …?”. De 20 korte verhaole zien naevenein in ‘t Venloos en ’t Nederlands geschreve. De fantasierieke verhaole zien kostelik ‘ónwaor’ mit eine link nao hede, verleje of toekóms. Fantasie en werkelikheid waere mit ein verwaeve. Smeis is ’t pure fictie.
Umdet in ’t book in twie “tale” naevenein staon kin ederein ’t laeze. ’t Dialek ‘vernederlands’ en daorum is d’n bundel (255 pag.) in ’t Venloos/Limburgs en AN geschreve um ’t dialekgebroek te stimulere.
’t Bukske is te bestelle via de online webwinkel: http://boekenbestellen.nl/boek/ (zeuk ónder Loot18) en ouk via d’n bookhandel.
Op vriedigaovend 18 april 2025 waas de Harmoniezaal in Tegele gans vol met kinger en ‘nen hielen houp fans. ’t Waas wir tiéd vur de jaorlikse finale van de Tegelse Declamatiewedsjtriéd van Veldeke. ’n Traditie öm gruëts op te zien. Wat ôs betröf waas ’t eine richtige Gôjje Vriedig! D’n hiër Gerard Derkx van Veldeke Venlo meugde d’n aovend äopene. Daonao ginge we rap euver op de declamaties, want de kinger zote te popele! Gedurende d’n aovend woort alles veriëuwig door fotograaf Jos Verbong. De sjoëne plaetjes die hae haet gesjaote zien binnekort ouch te bewôngere op de website: www.veldeke-krink-venlo.nl Idder jaor zien de bekende deilnimmers wir ’n bietje grôtter gegreujd, maar we meuge ouch altiéd wir nieje sjnuutjes welkôm heite, van kleine króekesjtöpkes toet sjtraottaal-beheersers met vette patta’s. Weej hebbe wir vuël geliërd van de kinger en d’r enorm van genaote! Beklum maar ens die trappe nao det hoëge podium en kiék maar ens dae groëte zaal in, met alle ouge op dich gerich. De zôls toch has dienen teks vergaete. Aevel det woort zorgvöldig gevolg en bewaak door ôs Venlose souffleuse Bernadette, die daen aovend ’n duchtig lesje Tegels haet gekrege. Ömdet ôs presentatrice Iris Vercoulen krank in bed loog, noom Susan Janssen de presentatie op zich. As werkgroeplid en sjriéfster vông ’t det hiel leuk öm te doon en door ’t enthousiasme van de kinger verdwene beej idderein de kriemels in d’m bóek as sjnië vur de zôn. De jurering loog dit jaor in heng van Marie-Louise Giesen, Marielle Wilms en Frank Giesen. Dreej Tegelse minse die vanóet eur werkzaamhede beej de Heemkundige Kring Tegelen hiel bliej waere van alles wat met Tegels erfgood te make haet. Nou, den zitse beej de Declamatiewedsjtriéd waal good. ’t Môt de jury good doon det ouch de jeug zich sjterk mak vur ’t behaje van ôs sjoën dialek. Wie de jury nao alle veurdrachte in euverleg ging, woorte de aanwezige getrakteerd op ’n swingend optraeje van ‘nen dansgroep van V.G. d’n Oeles, woëbeej de zaachte G ouch centraal sjting.
Jury-veurzitter Frank Giesen had vervolges de iër öm d’n óetsjláag bekend te make. Dae is as volg:
Óngerbouw:
1e Djemke Schouwenberg met gedich: met sónger jas van Mariska Reer
2e Linda Teeuwen met gedich: pupkes van Susan Janssen
3e Faye Verhofstad met gedich: pupkes van Susan Janssen
Middebouw:
1e Ize Willems met gedich: óntsjnap van Herman Bors
2e Fajah Faassen met gedich: memory van Jack Pelzer
3e Babette Ewals met gedich: óntsjnap van Herman Bors
Baovebouw:
1e Lucy van de Ven met gedich: sjtraottaal van Hanneke v.d. Sommen
2e Siem Stapel met gedich: sjtraottaal van Hanneke v.d. Sommen
3e Esmee Wijnhoven met gedich: sjtraottaal van Hanneke v.d. Sommen
Proficiat allemaol!
De nummers 1 en 2 meuge op 24 mei 2025 nag ens eur versje veurdrage beej de Limburgse finale in St. Joost.
Weej danke alle kinger die hebbe meigedaon, maar -’t ein ken neet sônger ’t anger – ouch alle sjriévers, elders, liërkrachte, de werkgroep, de medewerkers van de Harmoniezaal, Veldeke Krink Venlo, alle trouwe supporters en euverige minse die ôs van deens zien gewaes en Tegele ’n werm hert toedrage. Wies in St. Joost én wies ’t volgend jaor as weej ôs 25-jäorig jubileum viere!
Werkgroep Tegelse Declamatiewedsjtriéd Veldeke,
Truus Verbong
Nicol Ebus
Susan Janssen
Deil 2 oet de serie printebukskes JUP en “DRUP” geit euver de belaevenisse en kinnesmaking mit bieëste op de kinderboerderie. ’t Door Loot18 geschreve en geteikende verhäölke geit euver twieë bevrinde buurjónges die zich op de kinderboerderie ammezere. Eur belaefenisse zien herkinbaar net zoeëas de bieëste.
’t Printebukske is vanaaf 1 maart 2025 te bestelle via d’n online webwinkel http://boekenbestellen.nl/boek (zeuk ónder Loot18) en vanaaf 1 mei te koup beej d’n bookhandel.
De faatse ware weer de krinte in die vastelaovespap! D’r ware d’r gelökkig weer genóg beej: vrouwe, manne en kinder, allemaol verkleid in de meis moeëje, kleur- en fantasierieke creaties. As jury veur de faatse zoge weej veurbeej kómme: ‘nen baeker daeler, de zónnekeuning, dames mit prachtige blomeheud, dames mit ’n prachtig kleid det binnenin gans versierd waar, manne die ze neet lete vlege, dansmeriekes mit sjieke pekskes en ‘ne plissé rok, ‘nen trekzak, emes dae neet mei deej, en nog vuuel mier………
Nao lank euverleg hebbe weej beslaote um de pries van dit jaor toe te kinne aan d’n hier Maurice Peuten mit zien oetbeelding: Ik doon Mei, duis dich December?, aansloetend aan ’t motto van dit jaor: Doon mei!
Dit jaor haet Veldeke Venlo weer ‘nen aanmoedigingspries veur jeugdige faatse. Vurrig jaor waar d’r genne jeugdige dae in aanmerking kwaam, maar dit jaor waar det waal ’t geval te weite: Siem van Heyster dae mit ziene pap Venlo op de kaart ging zitte.
De faatse van herte perfitsia en zeej kriege eure pries oetgereik door Veldeke Venlo op ’n spesjale beejeinkóms, waoveur zeej genuuejd waere.
Aan de leje, begunstigers en vreejwilligers van Dialekvereiniging Veldeke Venlo.
‘t Besteur van Dialekvereiniging Veldeke Venlo begint in röstiger vaarwater te kómme. Weej zien mit 5 besteursleje. Det is eigelik te weinig, veur al ’t werk det gedaon mót waere. Weej kinne dus nog altied goje besteursleje gebroeke, want weej zeuke eine vice-veurzitter, ‘ne 2e sikkertaris en ‘ne 2e penningmeister veur ós besteur. Weej hebbe al waat stappe in deze veuroet gezatte. D’r staon waat zake op stapel.
’t Besteur geit dit jaor weer vergadere in de baovezaal van “kefee de Gaaspiep” aan de Kleine Kerkstraot in hertje stad. In principe edere ieërste woensdaag van de maond van 20:00 oor wies 22:00 oor.
Weej zien in jannewari 2025 de Majjem euver gegaon en waal nao Hou-Blierick. Veur de senioresoos van Hou-Blierick hebbe weej op eine middaag ein prissentasie laote verzörge door d’n hier Frens Bakker van ’t taalinstituut van de Universiteit van Numwaege euver de dialekte van Venlo en umstreke. Truus Verbong haet inkele van zien gedichte veurgelaeze en Wiel van Aarssen haet waat vertelt euver ós vereiniging.
Wao hebbe weej nog ein tekort aan minse? Weej zien bezig verscheie kemissies en/of werkgroepe te formere en/of kómpleet te make. Um dees kemissies en/of werkgroepe good te laote funktionere hebbe weej vreejwilligers nuuedig. Heejbeej dinke weej aan de kemissie “de “Faatse” (’t jurere van “de Faatse” in de vastelaovesoptochte in Blierick en Venlo). Maar ouk aan de kemissie “Fietstoch” en de kemissie “Vreejwilligersdaag”.
Ouk dinke weej aan vreejwilligers veur ’t “John Tana”-projek. ‘n Muzikaal projek veur de hoeëgste groepe van de basisschoeële en de brugklassers van de hoeëgere schoeële. Wilt geej ‘n hendje helpe, laot ’t ós dan gerös weite.
Tiedes de vastelaovesoptochte in Blierick en Venlo jurere inkele van ós leje weer de moeëjste en slaagvaerdigste einlinge (Faatse) in d’n optoch. De beste Faatse krieg nao aafloup ein diploma oetgereik.
Op zóndaag 6 april 2025 halde weej ós “veurjaorswandeling”. Weej zulle óg binnekort heej euver vaerder informere. Weej sloete deze middaag aaf mit ‘n lekkere tas koffie of thee mit ein stök Limburgse flaai.
D’n datum van de Algemeine Leje Vergadering van ós vereiniging steit vas. De ALV wuurt gehalde op dónderdaag 8 mei 2025. Euver de lokasie informere weej óg binnekort. Geej waert dan genuujd veur dees vergadering mit alle beejbehurende stökke.
De geschiedenis van ós vereiniging in de aafgeloupe jaore haet geleid tot ein herbezinning van ós vereiniging (weej hebbe nog ens good naogedach euver de stand van en wao weej haer wille gaon mit de vereiniging). Vuuel leje zien al waat alder en weej wille gaer nie, jónk en vers blood binne ós vereiniging kriege um ouk de toekóms van ózze krink veilig te stelle. Ouk kinder van de lieëgere- en middelbare schoeële. De ieërste fase is gereid. De 2e fase (PR) wuurt opgestart. Weej gaon dit plan veur óg vaerder toelichte op de kómmende Algemeine Leje Vergadering.
Mt de redaksie van “de Kroedwis” – ós thoesblaad – is en wuurt oetveurig euverlag um tot ein niejere, frissere en mier aktuele oetgave te kómme. En um ouk same te kieke nao meugelike bezuniginge. Det is nog neet gans gelök. “De Kroedwis” wuurt neet mier gesealed. En wuurt gewoeën thoes bezörg door eine groep vreejwilligers.
Op 26 oktober steit de kwis “de Slumste Venlonaer” weer op de rol. Vanaaf 14:00 oor kinne de deilnemende koppels zich inspanne um dae pries en titel te winne. En det veur d’n 1e kier ónder de leiding van eine nieje kwismeister.
’t Besteur is same mit de Stichting “Venlo Poëziet” bezig um eine wedstried oet te schrieve um gedichte in ’t Venloos dialek, op bekinde en markante gevels in ’t centrum van ós schoeëne stad, te laote aanbringe. Op woensdaag 5 maart wuurt dit allemaol geprissenteerd via de lokale pers.
Per 1 jannewari 2025 hebbe weej nog 152 leje en óngevier 75 “gölle gaevers”.
Met vrintelike kómplimente,
Names ’t besteur van Dialekvereiniging Veldeke Venlo,
Gerard Derkx
Sikkertaris
In Tegele wuurt de finale van d’n declamatiewedsjtriéd gehaje op 18 april um half 8 in de Harmoniezaal, Poshoesstraat 30.
Ouch dit jaor hebbe weej wir allemaol sjpiksjplinternieje gedichjes en weej sjpitse ós d’r op öm de kinger te zeen en huëre as zeej die declamere.
Geej ziet welkóm.
Weej zeen ós, names de werkgroep Tegelse Declamatiewedsjtriéd Veldeke, Truus Verbong-Simons
| ’t Bestuur |
| In april van dit jaor haet d’r ein groeëte bestuurswisselling plaats gevónde binne ós vereiniging. ‘ne Nieje veurzitter, ‘ne nieje penningmeister, 2 jóngere dames en ‘ne nieje sikkertaris zien toegetraoje tot ’t bestuur van ós vereiniging. Gelökkig zien d’r inkele zittende bestuursleje ouk gebleve. Weej hebbe toen aafschied genaome van d’n hier Bas Vissers as veurzitter a.i. De nieje veurzitter is d’n hier Paul Seelen, de nieje penningmeister is Sander Kuilman en de nieje sikkertaris is Gerard Derkx. D’n hier Wiel Maassen haet zien lidmaatschap van ’t bestuur op 3 oktober jl. um persoenlike raeje neer gelag. Inmiddels haet ouk d’n hier Paul Seelen um veur um moverende raeje zien veurzitterschap op 3 oktober 2024 neergelag. D’n hier Jacques van Daelen haet zien funksie van sikkertaris euvergedrage aan Gerard Derkx en is begin december aafgetraoje as lid van ’t bestuur. Weej danke Paul, Jacques en Wiel veur eure belangeloze inzet veur ós vereiniging. |
| Wao wille weej haer met ós vereiniging? |
| Dit alles haet geleid tot ein herbezinning van ós vereiniging (weej hebbe nog ens good naogedach euver de stand van en wao weej haer wille gaon mit de vereiniging). Vuul leje zien de pensioengerechtigde laeftied allang veurbeej. Weej wille gaer niej en jóngk, vers blood binne ós vereiniging kriege. Ouk kinder van de lieëgere- en middelbare schoele. |
| Finansieel |
| Daorum mótte weej zunig zien op de leje die weej nog hebbe. Aevel weej mótte ouk bezunige. En det op alle vlakke binne ós vereiniging. Ózze penningmeister haet aangegaeve det weej mótte kieke of en wie d’r bezunigt kin waere. Zoe as ’t d’r noaw oetzuut, sloete weej ’t jaor misschien aaf met roeije cijfers. Weej gaon óg heej euver gans beej praote op de kòmmende Algemeine Leje Vergadering. |
| Ós activiteite |
| In det kader hebbe weej alle evemente, die weej organisere, taege ’t leech gehalde. Van de fietstoch en de vreejwilligersdaag wies aan “de slumste Venlonaer” toe. Weej hebbe intern gespraoke euver de organisasie, de nuuedige vreejwilligers, waat zien kernaktiviteite van ós vereiniging, de koste van de evenemente en levere dees aktiviteite waal nieje jónge leje op. Weej hebbe dan ouk jaommergenóg mótte besloete dit jaor de fietstoch neet door te laote gaon. |
| De Kroedwis |
| Met de redaksie van “de Kroedwis” – ós thoesblaad – is oetveurig euverlag um tot ein niejere, frissere en mier aktuele oetgave te kómme. En um ouk same te kieke nao meugelike bezuniginge. Det is gelök. De Kroedwis wuurt neet mier gesealed. Waal veurzeen van eine adressticker. En wuurt gewoeën thoes bezörg door eine groep vreejwilligers. |
| Vreejwilligersdaag |
| Aan de vreejwilligersdaag hebbe weej einen anderen dreij gegaeve. Alle vreejwilligers van ós vereiniging hebbe ’t door d’n hier Bas Vissers nao ’t Venloos vertaalde bukske “’t Kleine Prinske” kedo gekraege. De vreejwilligers hebbe ’t bukske thoes bezörg gekrege door inkele bestuursleje. |
| De slumste Venlonaer 2024 |
| Op 27 oktober stónd de kwis “de slumste venlonaer” weer op de rol. Vanaaf 14:00 oor spande mier as 25 koppels zich in um dae pries en titel te winne. En det veur de 25e kier ónder leiding van ózze kwismeister, d’n hier Hans Jacobs. De jury (Frans, Diana, Will, Martien en Wilma) haet eur taak waer volbrach. Net as de meiwerkende vreejwillig(st)ers. |
| Koersplan |
| Ós dames in ’t bestuur (Moniek en Jeanette) zien drök doonde de nieje koers veur de vereiniging op te zette. Ein zoegenaamp “Koersplan” Waat is det eine berg werk zeg. Det haet al minnig eurke gekos. Weej gaon dit plan veur óg nader toelichte op de kómmende Algemeine Leje Vergadering. |
| Ieëre-lid / lid van verdeenste |
| Weej zien bezig um ein procedure op te zette veur ’t beneume van ein “Ieërelid” en/of ein “Lid van verdeenste” binne ós vereiniging. |
| Samewerking met VenloPoëziet |
| ’t Bestuur is same met de Stichting “Venlopoëziet” doonde um eine wedstried oet te schrieve um gedichte in ein dialek, binne ’t werkgebied van Veldeke Venlo, op bekinde gaevels in de binnestad van ós Venlo te laote aanbringe. Weej kómme heej binnekort op truuk met aanvöllend niejs. Weej gaon in jannewari 2025 zelfs de Maijem euver en waal naor Holt-Blierick. Veur de senioresoos van Holt-Blierick gaon weej op eine middaag ein presentasie laote verzörge door d’n hier Frens Bakker van ’t taalinstituut van de Universiteit van Nijmege euver de dialekte van Venlo en umstreke. Weej völle zelf ein deil van ’t programma in. Weej haope det geej begrip kint opbringe veur baovestaonde veranderinge. |
| Ieëre-lid van Veldeke Limburg |
| Op 21 oktober jl. is in Remund ós lid d’n hier Pieter Ebus door de Algemeine Leje Vergadering van Veldeke Limburg beneump tot “Ieëre Lid” van Veldeke Limburg. Dit umdet Pieter mier dan 20 jaor de penningmeister van ’t Provinciaal Bestuur van Veldeke Limburg is gewaes. Weej felicitere Pieter van herte met dees beneuming. |
| Vreejwilligers gezóch |
| Wao hebbe weej noow ein tekort aan minse ? Weej zien doonde diverse kemissies en/of werkgroepe te formere. Um dees kemissies en/of werkgroepe good te laote funktionere hebbe weej vreejwilligers nuudig. Heejbeej dinke weej aan de kemissie “de “Faatse” (’t beoordeile van “de Faatse” in de vastelaovesoptochte in Blierick en Venlo). Ouk dinke weej aan vreejwilligers veur ’t “John Tana”-project. Ein muziekaal project veur de hoeëgste groepe van de basisschoele en de brugklassers van de hoeëgere schoele. Maar netuurlik kinne weej ouk nog vreejwilligers gebroeke veur de verschillende kemissies. Wilt geej ein endje helpe, laot ’t ós dan gerös weite. |
| Thoesresepte (bukske) |
| Wilt geej nog ein schoeën kedo koupe veur de Kers, dink dan ens aan ’t bukske “Thoesresepte” det geej kint koupe beej Koops Bookhandel. |
| Mit vrintelike kómplimente, Names ’t bestuur van Dialekvereiniging Veldeke Venlo. Gerard Derkx, Sikkertaris. |
Sinds begin november ligge de volgende dialekbeuk geschreve door Loot18 beej d’n bookhandel:
Dialekprintebukske JUP en “DRUP” de speultuin, ’t ierste deil mit de “avonture” van Jup en Drup.
Dit deil van de nieje serie printebukskes JUP en “DRUP” geit euver de speultuin. ‘t Is ein geschreve en geteikend verhaol euver twieë bevrinde buurjónges die zich in de speultuin ammezere. Eur belaevenisse zien herkinbaar net zoeëas de speultoestelle.
“DOORSPEK 100 -twieë-”
Twieëde gedichtebundel in ‘t Venloos dialek.
Ouk “Doorspek 100 -twieë-“ besteit weer oet ‘n hónderdtal in Venloos dialek geschreve werke. De naam Doorspek verwies nao ein reeks grappige verwaordinge en gedachte (spinsels) die as ‘t waore de gedichte larderen (doorspekken).
Ouk te bestelle via http://boekenbestellen.nl/boek/ Zeuk ónder Loot18
