Wae van óg wuurt de slumste Venlonaer van 2022?

Op zóndaag 30 oktober 2022 vanaaf 14.00 oor zuk Dialekvereiniging Veldeke in ’t Tref, Hendrikxstr. 17 in Venlo weer “de slumste Venlonaer’’. Kwis Meister is Hans Jacobs.

Wilt geej óg kinnis van Venlo op de proof stelle, doot dan ens mei met deze geweldige quiz mit foto’s, items euver van alles en nog wat det mit Venlo te make haet, dialek, cultuur, de stad zelf, historie en neum maar op.

Koppels kinne zich heej aanmelde veur deze ludieke, joeksige, spannende middaag of aan de zaal op 30 oktober 2022 vanaaf 13.30 oor. De koppels die meidoon mótte ’n bietje herkinbaar zien mit beejveurbeeld  ’t zelfde hudje of dezelfde sjaal. Bedink veur óg koppel ‘ne kwante naam!

De koste zien € 5,00 per inschrieving/koppel en daoveur krieg geej ouk nog ens ein consumptiebón per persoeën.

’t Is kwant um mei te doon. Det hure weej idder jaor van de koppels die meidoon en de luuj die kómme kieke. Eine kier meidoon en geej ziet verkoch!

Zeen weej óg op 30 oktober?

Schrief óg op tied in, want vol=vol. Wae dörf? 

Fietse mit Veldeke Venlo

Op zóndaag 9 oktober kint ge ‘ne fietstoch make, georganiseerd door Veldeke krink Venlo.

De organisatie “de fietsbel” haet ’n route oetgezatte van 33 kilomaeter die löp van Venlo-Velde-Lómm-Árce via Pruuses truuk nao Venlo.

’t Startpunt is beej Grand Café De Maagdenberg. Vertrek tösse 11:00 en 12:30 oor naodet iers ’n lekkere tas kóffie of thee is gedrónke mit ’n stök flaai. ’t Indpunt is beej Kefee De Gaaspiep wao de deilnemers uterlik um 17:30 waere verwach. Beej aankóms dao krieg geej 3 kónsumptiebónne en wat lekkers veur d’n innerlike mins.

Opgaeve uterlik 25 september via de link in d’n activiteiteagenda.

De koste zien 7,50 euro veur leje/dónneteurs en 12,50 veur neet-leje.

Vaerdere bizónderhede staon in d’n activiteiteagenda vermeld.

Oeuvrepries 2022 veur John Coenen

Iervolle ónderscheijing veur Mestreechse componis, teksschriever en zenger

Mestreechtenaer John Coenen (1945) óntvingk dit jaor de Veldeke Venlo Oeuvrepries van ’t Limburgse Leed. Veurzitter Henk Buskes van Veldeke Venlo makde det bekind in ‘t L1-radioprogramma Plat-eweg van Henk Hover. John reageerde verheug op de toekinning van dees jäörlikse ónderscheijing. De leedjesmaker en zenger wuurt mit de pries geierd veur zien umvangrieke oeuvre en zien verdeenste veur ‘t Limburgse leed. Op zaoterdaag 17 september tiedes de Nach van ’t Limburgse Leed in Venlo is de pries oetgereik.

Motivering

John Coenen haet ’n oeuvre um geej taege te zegge. De meiste minse kinne um van Taai Taai, maar hae haet nog vuuel mier gedaon. Zoeë zoot John in hiel waat bands en schreef hae tal van leedjes, zoeëwaal veur zichzelf as veur andere. Weej as Veldeke Venlo zien ónder d’n indrök van alles waat hae decennialank haet gedaon en vinde John Coenen ‘n waerdige toevoging in ‘t moeëje rieke van winnaers det weej óndertösse hebbe.

Euver John Coenen

De muzikale loupbaan van John Coenen deurt inmiddels zó’n zestig jaor. As zenger is hae waal al ‘nen tied gestop, maar as schriever is de Mestreechtenaer nog altied actief. Beej ‘t groeëte publiek is Coenen veural bekind as lid van ’t duo Taai Taai det hae in 1996 starde. In ieërste instantie is Jos Wolfs ziene zangpartner, maar dae woort al rap opgevolg door John Dams. Mit hits as Viva Tirol, De Alpen express en Roed zien de roeze  wet Taai Taai zich ouk landelik in de kieker te speule. Veur die periode speult en zingk hae beej d’n dialekband Fietsefreem en nao Taai Taai bouwt Coenen vanaaf 2004 ‘n moeëje solocarrière op.

As componis en teksschriever schreef Coenen leedjes veur allerhande Limburgse artieste. Regelmaotig deej hae det mit collega Guus Smeets, dae in 2013 de Oeuvre-Pries in óntvangs meugde neme.

Veurdet Coenen zich op ‘t Limburgse leed stort, is hae iers actief in dansorkeste en later in de Limburgse popscene, waobeej hae in bands as The Walkers en The Press speulde. Ouk veur dees bands schreef hae leedjes. Zelfs de Amerikaanse ster Telly Savalas nimp repertoire van Coenen op. Ouk de dialeknummers van John Coenen blieve in ‘t boeteland neet ónopgemerk: beej internationale sterre as Hansi Hinterseer en Andreas Gabalier staon vertaalde leedjes van John op de setlies.

Reactie John

Ik veulde mich zier verierd wie ik door Veldeke woort benaderd. In ‘t begin waas ik ech flabbergasted, um ‘t op zien ‘Limburgs’ te zegge. Ik kós de pries al. Det ik op dees meneer geieërd waer veur waat ik heb gedaon is prachtig. As ik kiek nao de ieërdere winnaers dan zien ‘t stök veur stök minse die hiele moeëje nummers hebbe aafgeleverd, ein bietje ein dwarsdoorsneej qua meziekstiele. Hiel moeëj det ik dao vanaaf noow tösse meug staon.

’t Beeld van Mariëlle Franssen

Cursus “Venloos laeze en schrieve” start weer

Weej organisere vanaaf dónderdaag 13 oktober 2022 weer ‘ne cursus ‘Venloos laeze en schrieve’ beej Gilde opleidinge, Laaghuissingel 4, 5913 ES Venlo. De (7) data zien: 13 en 20 oktober, 3 – 10 – 17 en 24 november en 1 december. Aafsloetend vindt nog ‘n gezellige certificaatoetreiking plaats op 15 december 2022. Aanvang van de lesse is um 19:30 oor. Maximaal 30 cursiste. Docent is Bas Vissers.

In deze cursus kómme diverse aspekte aan bod die heejmei te make hebbe: geej liert o.a. waat ’t verschil is tösse ein dialek en ‘n taal, wie ‘n taal óntsteit, waorum weej dialek mótte blieve spraeke en wie weej dit ’t beste kinne behalde, wie tale functionere, waorum weej sóms taalstructure hebbe die stale op ’t Duits en sóms op ’t Nederlands en waorum weej ‘nao ’t Zuje’ gaon en waorum ’t neet ‘Waor woeëns dich?’ is, waorum weej sóms trema’s gebroeke en weej nog maar zelde accente hantere, waat ’t verschil is tösse hoes, hoe~s en hoeës, of tösse liene, lie~ne en lieëne, wie se det oetdröks in schriefwies, waat ‘ne stoeëttoeën is en waat überhaupt ‘n toeëntaal is…. En dit is nog maar ‘ne willekeurige greep oet d’n inhald van de cursus.

Weej wieze d’r waal op det ’t heej ‘ne cursus laeze en schrieve betref: ’t is aan te bevaele det geej al gebroeker ziet van ’t dialek. ‘ne Cursus Venloos spraeke veur neet-dialekspraekers is in óntwikkeling. Hald heejveur de lokale berichgaeving in de gater.

Koste:

€ 50,- veur leje van Dialekvereiniging Veldeke Venlo

€ 75,- veur neet-leje

Heejbeej zit inbegrepe ’t cursusbook en ‘n tas kóffie of thee tiejes de aovende.

Waat geej waal zelf nuuedig heb, det is ’t nieje (witte) Venloos Waordebook, volop te koup beej de diverse bookhandels in Venlo en Blierick. Dit waordebook is gebaseerd op de Spelling-2003 veur de Limburgse dialekte en det is ouk de leidraod gewaes veur de cursus.

Wis geej trouwes det geej lid van ós vereiniging kint waere veur € 28,00 per jaor? En ’t ierste jaor veur cursiste is gratis.

Aanmelde kin oetsloetend via de website van Veldeke Venlo. Aanmelde is nimmer meugelik.

Nietsbreef nummer 1 van 2022

D’n 1e nietsbreef van 2022 is verschene en versteurd aan alle leje en dónneteurs van de krink.

Veurwäördje

Beste leje en dónneteurs,

Veur ’t iers dit jaor weer ’ne nietsbreef.  Mit ’ne nietsbreef wille weej as bestuur van Veldeke Krink Venlo ós leje en dónnateurs flot op de huuegte bringe van zake die binne ózze krink speule. Vaerder kint geej netuurlik altied veur alle informatie terech op ós web-site en periodiek beej ózze Kroedwis.

De vaerdere ónderwerpe zien de wandeling op 4 september, de wisseling van ’t sikkertariaat, d’n oeuvrepries 2022, de cursus Venloos laeze en schrieve (wao-euver binnekort mier) en ’t organisere van activiteite mit daobeej behurende kemissies.

De ganse nietsbreef vind ge heej.

Wandeling Hoeëgekamp

De beperkende Coronamaatregele ligge gelökkig achter ós. De beteikent det weej, ouk waat betref ós activiteite, d’n draod weer kinne oppakke. Ein van die activiteite is de “Stadswandeling”. Stadswandeling tösse aanhaolingsteikens umdet de kómmende wandeling neet door de binnestad van Venlo zal gaon, wie Stadswandelinge gewoeën zien te doon.

Op 4 September aanstaonde geit ’t dan gebeure. Weej gaon dan wandele door ’n stök Venlo gelaege tösse de Börgemeister van Rijnsingel (veurhaer d’n Oostsingel) en de Hertog Reinoudsingel. Ózze werknaam veur dees wandeling waas de Stalbergwandeling, aevel gans officieel wuurt dees wiek Hoeëgekamp geneump. Tja wie zaet d’n Ingelsman? “Whats in a name”.

Wie gezag dees wandeling geit plaats vinde op 04 September aanstaonde. Beejein kómme doon weej dan um 14.00 oor beej Hotel American aan de Kölschepoort 14 (taege euver ’t Limburgs Museum). Nao ’n tas kóffie en ’n stök flaai loupe weej dan aan. Dees wandeling zal dan óngevier 1 à 1½ oor deure.

As beejdrage in de koste vraoge weej aan ós leje en donnateurs € 5,00 per persoeën. Neet leje / donnateurs kinne zich ouk opgaeve maar betale dan € 7,50 per persoeën. Aan dees wandeling kinne aevel maximaal 40 persoeëne meidoon.

Opgaeve en betale veur dees wandeling kint geej óg via de website: veldekevenlo.nl. As geej óg heb opgegaeve en betaald, krieg geej automatisch via de mail ’n bevestiging van deilname.

Laot óg verrasse en vuuel plezeer gewins tiedes dees wandeling.

Met vrintelike kómplemente,

Wiel en Wiel

Website van Veldeke Krink Venlo in ’n niej jeske

Tiedes de jaorvergadering van de jubilerende dialekvereiniging op 2 mei is de verniejde website geprissenteerd die daezelfden daag de lóch in geit. De link nao de website verandert in veldekevenlo.nl terwiel degene die nog op de alde site inlogge waere doorgesteurt nao de verniejde site. Mit de aanpassing van de naam wuurt ’t mekkeliker um die site te vinde.

De verniejing is nuuedig umdet d’r mier as in ’t verleje gebroek gemak wuurt van ’t bekieke van websites op telefoon en tablet. Ouk zien in de loup van de jaore de technische meugelikhede verbaeterd.

Vanaaf noow kin en meug ederein zich aanmelde veur de nietsbreef. Mit inachneming van de geldende privacyregels waere de persoeënsgegaeves geautomatiseerd verwerk in de administratie.

Mit dees verniejde website haope we minse nog mier as noow te interessere veur ’t gebroek en instandhalde van ’t dialek in waord en geschrif. Daomei wuurt rech gedaon aan ’t doel van de vereiniging: laeventig halde van de volkscultuur en alle plaatselike dialekte.