As alle minse zónge Waat zoel de waereld moeëjer zien as alle minse zónge wannier ze blie d`n daag mit ein opgewek leed begónne, zoeë hand in hand, éin lange rie van plezeer klanke makend, elkaar mit elke nieje toeën deep in `t herte rakend.
Waat zoel de waereld moeëjer zien as alle minse lachte en enthousias eur medemins ein serenade brachte, as dao gen ruzie mier bestónd en ech gen stum zoel zwiège, tot in de hemel `t gezang van erm en rièk zoel stiège.
Waat zoel de waereld moeëjer zien as alle minse zónge en met ein jublend lofgezang geweld veur good bedwónge. As dich en ik nów ens vanaaf vandaag daomei beginne, help det misschien ein stökske mei `t kwaod te euverwinne.
Örges in Braobant, ‘k had net de wach, haet mich de pos ein pekske gebrach. Ein pekske oèt Venlo! Iers heb ik gesprònge, toen, Jocus ter ièr, kukeleku gezònge. “t Waas alles beejein eine hiele kwak, door ein Venloosch maedje ingepak.
Wie ik det loos, bin ik stil gewaore, en is mich de taai op de tong bevraore. Ik keek nog ens nao al die geschinke, en meus ut meis aan det maedje dinke. Ein Venloosch maedje! . . . en ik, gans allein, de kamer woord mich inens te klein!
Ik ging nao boète, in waer en wind, en dach allein aan de Venloosch kind. Ik keek nao de sterre en de maon, en zoog allein maar det maedje staon. Toen bin ik op mien krib gekraope, en heb, veur ’t iers, neet kunne slaope.
Zoë geit det nòw al dage lank, mien hert duit pien, mien hert is krank. Ik keek niet mièr un nao drinke of aete, ik kan det maedje neet vergaete! Vandaag zag de dokte: ,,’t hert is gescheurd’’, had geej mich toch auk det maedje meigesteurd!
`t Is good in eige hert te kièke nog efkes veur ut slaope goan of ik vandaag misschien gen ander hert heb pien gedaon of ik gen auge heb doon kriète gen dreufenis beej eemus brach of ik aan minse zônder leefde ein waord misschien van leefde brach
en zeen ik binne in mien hert dan det ik good waas veur den aevemins det ik misschien vandaag vervölde ein of andere hertewins dan kan ik gerös gaon slaope mien gemood is bliè, jao dan ut is good in eige hert te kièke dan haet me dao auk gooddeuns van
’t Tegels dialek zit ouch beej de jeug in ’t blood.
Vriedig 15 april 2016 waas alwir de 17de Tegelse declamatiewedsjtriéd! Ouch dit jaor deje alle zes de Tegelse basissjoële met. De deilnimmerkes kwame met eur femielie en vrinde beejein in ’t Zaelke öm dao eine leuke aovend te belaeve. Vur-al maedjes en eine gas sjtoere jônges sjtinge op de buun öm eur gedichje te declamere.
De sjriévers van de sjpiksjplinternieje gedichte ware dit jaor, Herman Bors, Linda Hanraets, Leonie van Hulten, Truus Jacobs, Susan Janssen, Hanneke van der Sommen en Truus Verbong. De jury, die besjtông óet 3 leje van Vv. De Kaetelaers (Erik Goossens, Marcel van Heel en Ted Huijbers), had de zjwaore taak öm óet alle talentjes de winnaers de keze! ’t Niveau waas hoëg en ’t was sjoën öm te zeen det ’t Tegels dialek ouch beej de jeug in ’t blood zit. Op nao ’t volgend jaor!
De winnaers van d’n óngerbouw:
Gijs Broekman met “Wat ein waer” van Truus Verbong (St. Jozefsjoël)
Puk Willemsen met “Hinkele” van Leonie v. Hulten (PassePartout)
Anouk Raijer met “Hinkele” van Leonie v. Hulten (St. Jozefsjoël)
De winnaers van de middebouw:
Bo Schraven met “Kratspaol” van Truus Jacobs (St. Jozefsjoël)
Zoë Kuijpers met “Kratspaol” van Truus Jacobs (St. Jozefsjoël)
Evy Kessels met “Wir nao sjoël” van Truus Jacobs (Het Maasveld)
De winnaers van de baovebouw:
Sam Hendrikx met “Miene gsm” van Herman Bors (St. Jozefsjoël)
Laura v.d. Wouw met “Miene gsm” van Herman Bors (PassePartout)
Mila Schraven met “Miene gsm” van Herman Bors (St. Jozefsjoël)
Foto’s van dezen aovend zien gemak door Jos Verbong. Alle nummers 1 meuge eur gedichje nag ens declamere beej de Limburgse finale op zaoterdigmiddig 21 mei in Dok 6 in Panningen.Op de groepsfoto sjtaon de nummers 1, 2 en 3 van iddere laeftiédscategorie.
Finale declamatiewedstried op 8 april 2016 in de Venlonazaal!
Waat ‘nen aovend… waat ’n schoeëne finale!!
Um half zeve, begint de zaal al aardig vol te struime, mama’s en papa’s, opa’s en oma’s en ouk nog de breurkes en zuskes, we hadde um hiel iërlik te zien… plaats te weinig. Maar achter in de zaal stónde nog staontaofels wao de minse nog koste staon. De jury bestónd dit jaor oet Herm, Bert en Marij Pollux, die ’t ein hiele ier vónde um dit te meuge doon. De klok löp taege zeve oor, de ganse zaal zit bómvol en de spanning van de kinder is hiel good te veule in de zaal, de hertjes kloppe in de kael.
Hans Jacobs geit beginne… hae rup de iërste vief kinder nao baove, de spits is d’r aaf. Wie idder jaor deej ik souflere, maar ik heb mich verbaas wie die kinder de gedichte allemaol in de kop hebbe zitte…Nao twintig kinder die ech waanzinnig eur gedich hebbe veurgedrage, hebbe we efkes pauze en dae woort opgevöld door Sjraar Timmermans, dae ziene buut van de aafgeloupe vastelaovend veur droog… ózze kanjer, dae ouk eine topper waas met gedichjes declamere , noow al veur ’t derde jaor ziene buut kump doon. Danke Sjraar, de waas éch gewéldig!! Wies ’t volgend jaor…
Nao de pauze veulde weej weer de spanning van de kinder, de ein zoot de schravele op de stool, d’n andere had gen nagels miër euver. Die andere einentwintig kinder zien stök veur stök geweldig, waat haet Venlo ein talent!!! Als idderein dan oetintelik is gewaes, meuge se allemaol op de buun zitte en geluif mich… waat ein spanning onder de kinder… wae zal d’r met ein beeldje nao hoes gaon en wae meug de 21ste mei in Panninge in ’t Dok6 mei doon met de groeëte Limburgse finale??
Hans geit met de priesoetreiking beginne, beej de ónderbouw haet gewónne:
Sophie Sassen van de st. Willibrordusschoeël met ’t gedichje: SJOPPE
Jop Gubbels van OBS de Koperwiek met ’t gedichje: BEEJ DE BRANDWAER
Silke Ernst van de Koperwiek met ’t gedichje: SJOPPE
Beej de middebouw haet gewónne:
Jans Vaessen van ’t Groeneveld met ’t gedichje: TELEFOON
Emily Sassen van de st. Willibrordusschoeël met ’t gedichje: ’t BRILKE
Katie van Wylick van ’t Groeneveld met ’t gedichje: ’t BRILKE
Beej de baovebouw haet gewónne:
Kiki Severijns van de st. Martinusschoeël met’t gedichje: ’t IËRSTE KÖSMUULKE
Maud Lucker van OBS de Koperwiek met ’t gedichje: ’t IËRSTE KÖSMUULKE
Shainy van Cleef van de Montessorischoeël met ’t gedichje: IN VERWACHTING
Alle kinder hiel vuuel bedank veur óg declamere, ’t waas eine fantastische aovend wao we weer op truuk kinne kieke en de nummers 1, hiel vuuel succes in Dok in Panningen!
Kiki Severijns en Sophie Sassen oet Venlo winne de houfprieze
DIALEKVEREINIGING VELDEKE VENLO velt in de prieze beej de Limburgse finale declamatie in Kepèl (Panninge) op 21 mei 2016 !
Op zaoterdaag 21 mei 2016 woort de Limburgse finale van de declamatiewedstried van Veldeke gehalde. Dees vónd dit jaor weer plaats in de sjieke zaal van DOK6 in Kepèl (Panninge). Waat waas ’t schoeën en wat leep ’t allemaol good! Zoeëwaal de deilnemerkes as de toeschouwers hebbe genaote van alerhande gedichjes in verscheie Limburgse dialekte.
Oet de 29 Limburgse finaliste zien de volgende winnaers gekómme:
Op vriedig 17 april 2015 vông in ’t Zaelke in Tegele de 16e Tegelse declamatiewedsjtriéd van Veldeke plaats. Maar leefs dertig kinger trakteerde ‘t publiek en de jury op ‘n geweldige veurdrach van eur gedich in ‘t Tegels dialek, det ze van teveure óet ‘t groëte aanbod, passend beej eure laeftiéd, kôste keze. De sjriévers van dees gedichte ware dit jaor Truus Verbong, Leonie van Hulten, Truus Jacobs, Linda Hanraets, Hanneke van der Sommen, Herman Bors, Leo de Ronde en Susan Janssen. Rônk 19.00 oor sjtruimde de zaal al vaol zoëdet me verzekerd waas van ‘n gôj plaats öm al det sjoëns te kenne zeen en huëre. ‘t Is altiéd wir ‘n fiës öm te zeen wiekleine en groëte kinger zich ein versje hebbe eige gemak en wie ze dit met vuël flair aan ‘t publiek presentere. Eine blik in ‘t publiek, det op ‘t puntje van de sjtool zit, is aevel ouch de meujte waerd: alle naze sjtaon dezelfde kank op richting podium en ‘t plezeer sjtraolt d’r vanaaf, hiel gruëts op ‘t (klein)kink det dao op zien eige meneer de show sjtúlt. D’n aovend woort geäopenddoor Veldeke-veurzitter Henk Buskes en Hanneke van der Sommen noom op ‘n vrintelikke en flotte meneer de presentatie vur zien raekening.
De jury besjting dit jaor óet dreej hiëre van “Wie Laater Wie Zaater”, ‘n gezelsjap det van ‘ne vrindegroep is óetgegreujd toet ‘n klöpdie de Tegelse cultuur (met name de vastelaovend) hoëg in ‘t vaandel haet sjtaon. Heejvan is ‘t Tegels dialek netuurlik ‘n belangriék ôngerdeil. Aan eur de lestige taak öm te bepaole wae d’r óeteindelik ging winne. Dit zien de volgende kinger:
Ôngerbouw:
Tijs Rijvers met ‘t versje “Lache” van Susan Janssen
Meike van Hees met ‘t versje “Ein aepke” van Truus Verbong
Ryan Achten met ‘t versje “Miene sjtep is kwiét” van Leonie van Hulten
Middebouw:
Zoë Kuijpers met ‘t versje “Móes in hóes” van Leonie van Hulten
Laura van der Wouw met ‘t versje “Mien iërste welske” van Truus Jacobs
Bram Nellen met ‘t versje “Móes in hóes” van Leonie van Hulten
Baovebouw:
Lichelle Kusters met ‘t versje “Gelöksvogel” van Herman Bors
Connor Shilton met ‘t versje “Poepzekske” van Herman Bors
Demi Burhenne met ‘t versje “Poepzekske” van Herman Bors
Foto’s van dezen aovend zien gemak door Jos Verbong
Alle nummers 1 meuge eur versje nag ens declamere beej de Limburgse finale op zaoterdigmiddig 16 mei in ’t Patronaat in Haerle.
