Niej: online-cursus Venloos laeze en schrieve

Nao vuuel vraoge waoge weej ’t weer ens:
Online-cursus Venloos laeze en schrieve online – maart – mei 2024

Locatie: thoes, achter óggen eige computer

Docent: Bas Vissers, Veldeke Venlo

Koste (inclusief cursusbook en certificaat): €75,- veur neet-leje, ós leje (*) betale €50,-. Materiale krieg geej thoesbezörg.
Tiedstip: vanaaf maondaag 4 maart 19.00 wies uterlik 20.30 oor. Minimum aantal deilnemers: 20

Veurkinnis: de cursus werk ’t beste as geej al thoes ziet in ’t Venloos (of enig ander Limburgs) dialek.

Vanaaf maondaag 4 maart 2024 organiseert Dialekvereiniging Veldeke Venlo einen online-cursus Venloos laeze en schrieve. Deze cursus besteit oet 7 lesaovende van maximaal anderhalf oor wao geej dees twieë vaardighede van ’t Venloos dialek beejgebrach krieg.

Deze zal gegaeve waere in ein google-umgaeving: naeve de computer of tablet heb geej ein google-account (gratis te kriege) nuuedig. Op ’t platform Classroom van google vindt geej dan ’t aanvöllende cursusmateriaal zoeë wie video’s die euver de cursus gaon, aanvllende materiale en op ’t ind van ederen aovend ein paar korte vraoge um te kieke of alles helder waas. De beejeinkómste waere via de camera gegaeve via google-meet.

As geej interesse heb um heejaan mei te doon, dan kint geej óg opgaeve vanaaf 18 december 2023 via https://veldekevenlo.nl/aanmelde-online-cursus-venloos/. Nao betaling van ’t cursusgeld krieg geej dan de aanmeldgegaeves veur de classroom en de weblink veur de camera-meetings.

’t Is aan te bevaele um ouk ech alle aovende te volge. De cursus is zoeë opgebouwd det d’r op basis van ’t veuraafgaonde nieje informatie wuurt toegevoog.

Op ’t ind van de cursus wuurt d’r van óg verwach det geej ein Meisterstök schrief in ’t dialek.

As geej det heb ingeleverd, dan krieg geej op ’t lets van de cursus ouk ein certificaat (thoesgesteurd).

________________________________________

(*) Lid van Veldeke waert geej door óg aan te melde op https://veldekevenlo.nl/kontak/aanmelde/. De koste zien €28,- veur ein jaor as geej volwaerdig lid wilt waere. Donneteurs (Vrinde van Veldeke Venlo) betale jaorliks €15,–. Beej deilname aan de cursus is ’t ierste jaor ’t lidmaatschap gratis.

Cursus Venloos dialect – ook voor beginners

Met ingang van 17 januari 2024 organiseert de Bibliotheek Venlo in samenwerking met Veldeke Venlo en de Vereniging van Leraren in Levende Talen -afdeling Limburgs- en Dialekvereiniging Veldeke (Kring Venlo) een cursus Venloos dialect (vaardigheden vooral spreken en luisteren) voor niet-Limburgstaligen.

Klik hier voor meer informatie en aanmelding.

Cursus Venloos start in naojaor 2023 (VOL!)

Weej organisere vanaaf dinsdaag 10 oktober 2023 weer ‘ne cursus ‘Venloos laeze en schrieve’ beej Gilde opleidinge, Laaghuissingel 4, 5913 ES Venlo. De (7) data zien: 10, 24 en 31 oktober, 7, 14, 21 en 28 november. Aafsloetend vindt nog ‘n gezellige certificaatoetreiking plaats örges in januari 2024. Aanvang van de lesse is um 19:30 oor en ze deure óngevier 90 minute. Docent is Bas Vissers.

Vaerdere informatie steit beej de betreffenden datum in d’n agenda.

Inschrieve is nimmer meugelik

Cursus Venloos laeze en schrieve naojaor 2022

Twieëentwintig kandidate. Zoeëvuuel hadde we d’r nog noeëts!

Aevel, al deze kandidate hebbe meigedaon aan de cursus Venloos Laeze en Schrieve. En hebbe dónderdaagaovend eur certificaat in óntvangs meuge neme. Ein resultaat um gruuets op te zien. Dees minse weite noow alles van korrek schrieve in ’t Venloos dialek.

Ouk iets veur óg? Vraog ens aan ein van dees minse wie ’t waas. En as geej ouk interesse heb in zó’ne cursus: hald de socials in de gater. In oktober heb geej weer ein kans!

Bas Vissers

Cursus “Venloos laeze en schrieve” start weer

Weej organisere vanaaf dónderdaag 13 oktober 2022 weer ‘ne cursus ‘Venloos laeze en schrieve’ beej Gilde opleidinge, Laaghuissingel 4, 5913 ES Venlo. De (7) data zien: 13 en 20 oktober, 3 – 10 – 17 en 24 november en 1 december. Aafsloetend vindt nog ‘n gezellige certificaatoetreiking plaats op 15 december 2022. Aanvang van de lesse is um 19:30 oor. Maximaal 30 cursiste. Docent is Bas Vissers.

In deze cursus kómme diverse aspekte aan bod die heejmei te make hebbe: geej liert o.a. waat ’t verschil is tösse ein dialek en ‘n taal, wie ‘n taal óntsteit, waorum weej dialek mótte blieve spraeke en wie weej dit ’t beste kinne behalde, wie tale functionere, waorum weej sóms taalstructure hebbe die stale op ’t Duits en sóms op ’t Nederlands en waorum weej ‘nao ’t Zuje’ gaon en waorum ’t neet ‘Waor woeëns dich?’ is, waorum weej sóms trema’s gebroeke en weej nog maar zelde accente hantere, waat ’t verschil is tösse hoes, hoe~s en hoeës, of tösse liene, lie~ne en lieëne, wie se det oetdröks in schriefwies, waat ‘ne stoeëttoeën is en waat überhaupt ‘n toeëntaal is…. En dit is nog maar ‘ne willekeurige greep oet d’n inhald van de cursus.

Weej wieze d’r waal op det ’t heej ‘ne cursus laeze en schrieve betref: ’t is aan te bevaele det geej al gebroeker ziet van ’t dialek. ‘ne Cursus Venloos spraeke veur neet-dialekspraekers is in óntwikkeling. Hald heejveur de lokale berichgaeving in de gater.

Koste:

€ 50,- veur leje van Dialekvereiniging Veldeke Venlo

€ 75,- veur neet-leje

Heejbeej zit inbegrepe ’t cursusbook en ‘n tas kóffie of thee tiejes de aovende.

Waat geej waal zelf nuuedig heb, det is ’t nieje (witte) Venloos Waordebook, volop te koup beej de diverse bookhandels in Venlo en Blierick. Dit waordebook is gebaseerd op de Spelling-2003 veur de Limburgse dialekte en det is ouk de leidraod gewaes veur de cursus.

Wis geej trouwes det geej lid van ós vereiniging kint waere veur € 28,00 per jaor? En ’t ierste jaor veur cursiste is gratis.

Aanmelde kin oetsloetend via de website van Veldeke Venlo. Aanmelde is nimmer meugelik.