De faatse ware weer de krinte in die vastelaovespap! D’r ware d’r gelökkig weer genóg beej: vrouwe, manne en kinder, allemaol verkleid in de meis moeëje, kleur- en fantasierieke creaties. As jury veur de faatse zoge weej veurbeej kómme: ‘nen baeker daeler, de zónnekeuning, dames mit prachtige blomeheud, dames mit ’n prachtig kleid det binnenin gans versierd waar, manne die ze neet lete vlege, dansmeriekes mit sjieke pekskes en ‘ne plissé rok, ‘nen trekzak, emes dae neet mei deej, en nog vuuel mier………
Nao lank euverleg hebbe weej beslaote um de pries van dit jaor toe te kinne aan d’n hier Maurice Peuten mit zien oetbeelding: Ik doon Mei, duis dich December?, aansloetend aan ’t motto van dit jaor: Doon mei!
Dit jaor haet Veldeke Venlo weer ‘nen aanmoedigingspries veur jeugdige faatse. Vurrig jaor waar d’r genne jeugdige dae in aanmerking kwaam, maar dit jaor waar det waal ’t geval te weite: Siem van Heyster dae mit ziene pap Venlo op de kaart ging zitte.
De faatse van herte perfitsia en zeej kriege eure pries oetgereik door Veldeke Venlo op ’n spesjale beejeinkóms, waoveur zeej genuuejd waere.
Tiedes de algemeine lejevergadering op 25 april zien de prieze oetgereik aan de winnaers. De winnaer van Venlo Toën Feyen kreeg ’t beeldje det is gemak door Mariëlle Franssen oet hand van Bas Vissers. De zjurieleje Henny, Frans en Joep ware getuge heejvan.
Hay Goerts as winnaer van Blierick waas neet aanwezig. Hae krieg ziene pries op ’n ander moment oetgereik.
De veur- en achterkant van de beeldjes.
Inmiddels is ’t beeldje oetgereik aan d’n Blierickse winnaer dae d’r erg blie mit is.
De optochte in Blierick en Venlo hebbe weer getrokke. De zjurie beej d’n optoch van de Wortelepin bestónd oet Henny, Henk en Jos en nao aafloup hebbe zeej de faatse bespraoke en beoeërdeild. Ze ware d’r toch flot oet wae de winnaer is gewaore: Hay Goerts mit as motto Flaai inspectie.
Beej de groeëten optoch van Jocus ware de zjurieleje Frans, Henny en Joep. Zeej zoge ruum twintig faatse mit stumming, originaliteit en kleur, neet te gluive! ’t Waas dan ouk neet ech gemekkelik um dae faatse 2024 oet te zeuke. Oetintelik veel de keus op Toën Feyen mit zien creatie: Flex Valentien.
De oetreiking van de prieze vindt op ein later moment plaats umdet nog iers de beeldjes mótte waere gemak.
Dank aan de zjurieleje en op nao de optochte van 2025. Ein zjurie-opmerking nog: “nae…’ne jeugdige faatse hebbe weej dit jaor neet gezeen, maar weej gaeve de mood neet op en haope op volgend jaor…..”
’n Oetgebreid verslaag kump in de iersvolgende Kroedwis.
Op dónderdaag 6 april zien in de Gaaspiep de oeërkóndes en de beejbehurende trofeje oetgereik aan de winnaers van de faatsepries 2023. In d’n Bliericksen optoch waas Sjraar Thijssen de winnaer en in de Venlosen optoch kreeg Bart Daemen de meiste punte van de zjurie.
Beej de oetreiking ware alle zjurieleje aanwezig en ouk ’n aafvaardiging van de Wortelepin en Jocus in de persoeëne van Maurice Holthuijsen en Rudy Viertel.
Ouk dit jaor zien de beeldjes gemak door Marielle Franssen.
De vastelaovend is weer veurbeej, noow mótte weej weer ( deze kier) ’n klein jaor wachte. Maar de optochte van Venlo en Blierick hebbe deze letste vastelaovend wie dan ouk faatse as winnaers opgeleverd. Dees faatse krege eure gewónne pries door ózze veurzitter oetgereik op dónderdaagaovend 05 maart in kefee de Gaaspiep. Mit zien alle ware weej zier verierd door ’t gegaeve det Vorst Carotius VIII van de Wortelepin, d’n hier Maurice Holthuijsen, beej dees priesoetreiking aanwezig waas. Nao ’n kort wäördje van ózze veurzitter woorte de prieze oetgereik aan respectievelik; De Blierickse Maedjes veur eur creatie “weej bringe kleur” en d’n hier Luc Peters veur zien creatie “Mantelzörger” De winnaers ware verras en bezónder tevreje mit eure gewónne pries. Nao dees priesoetreiking hebbe weej nóg efkes same gezellig geklasjeneerd. Wuurt de vastelaovend van ’t kómmend jaor vervolg.
Op 14 maart j.l. woorte de winnaers faatse van de vastelaoves optochte in Venlo en Blierick good in ’t zunke gezatte. De 2 dames, want ’t ware dit kier winnaers van vrouwelike kunne, krege van de veurzitter Henk Buskes neet allein de nuuedige kómplemente veur eur creatie’s maar ouk idder ’n bizonder moeëj bildje oetgereik.( beejgaonde foto’s gaeve heej ’n kleine sfeer inpressie van)
Op dezen aovend woort nóg emes in ’t zunke gezatte en waal ’t faatse jurielid Henny Crommentuijn. Waorum in ’t zunke gezatte? Henny haet dit jaor veur d’n 33-ste kier ( 3×11) de faatse in d’n Venlose optoch gejureerd ( van dees 33 kier haet Henny ouk nóg ‘ne gas kier in Blierick gejureerd)), dit is toch ’n prestatie van formaat te neume. Henny kreeg heej veur neet inkel de kómplemente van de veurzitter Henk Buskes maar ouk oet hand van de veurzitter ’n kedo aangereik. Ouk heej is ’n foto van beejgevoog. Nao ’t officiële gedeilte woort nóg efkes gezellig nao gepraot.
Vandaag is ’t hoeëgtepunt van de vastelaovend, d’n optoch. ’t Thema waas: “weej zette alles op de kop” Nao maonde van veurbereiding meuge de deilnemers eur werk aan ’t publiek toeëne. Dit jaor hadde weej de waergode neet mei, veur ’t vertrek van d’n optoch vele d’r al inkele buje en tiedes d’n optoch ouk nog inkele hagelbuje. Det haet netuurlik ouk invloed op ’t aantal minse langs de kant. ’t Waas minder drök as vurrige jaore. Weej as jury van de faatse hadde weer de taak um de orgineelste en kwanste faatse d’r oet te visse. Ouk heej had ’t waer invloed op ’t aantal faatse. Zeej zien toch de krinte oet de pap. ’t Waer had ouk ’n veurdeil, d’n optoch trok waal good door.
Naodet ’t ind van de kleurieke optoch oet ’t zich waas, begove weej ós nao ’t Raodhoes um te euverlegge euver de faatse. Dit jaor ware weej d’r al flot oet. De winnaer noom ’t motto waal hiel letterlik. D’r ware mierdere faatse die ’t motto as thema hadde, maar deze faatse stook baove alles oet. De winnaer van de faatse 2018, Jos Houben met zien motto “Ik zet alles op de kop” Jos bliek in 1965 prins te zien gewaes van de Wortelepin. Naodet weej de winnaer bekind hadde gemak, zoot ós taak d’r veur dit jaor waer op. Op nao 2019.
Veldeke jury Blierick
12 fibberwari 2018, ’t waas weer zoeëvaer, d’n optoch trok door Venlo . Dees reis had Jocus veur bezónder fris waer gezörg, d’r ware ‘ne gas diepvriezers naeve de kant van d’n optoch gezatte mit de deure wage wied aope. Waat ‘ne ozel, maar ’t is ós gegaeve en det kin vaerder ‘ne Venlonaer niks schaele D’n optoch mót trekke en d’r mótte minse naeve de kant staon kieke en zoeë is det.
Veuraafgaonde aan d’n optoch hadde weej as jurie beej de Brasserie aan de Klaosstraot ein “tête a tête” mit Hoeëgheid Herm I en zien adjudante Roel en Wim in ’t beejzien van de wieze raod van elf.
’T Vertrek van de optoch waas dit jaor ’n oor later dan gewind, dus vanaaf de klok van ein trok hae, iers naeve Hoeëgheid Herm I en zien Adjudante Roel en Wim, Jeugd Hoeëgheid Sofie mit eur Adjudante Lynn en Maaike en de wieze raode van elf van Jocus en Jocus Toekomst. Daonao kwaam ’t speul beej Henny en mich naeve. Werkelik waor ’t waas weer ‘ne geweldige optoch, vuuel kleur, meziek en bewaeging, en det ondanks d’n ozel. En dan de faatse, is det d’r eine of telt twieë of zelfs dreej ouk mit? In totaal waare ‘t d’r z’ón 53, 22 echte faatse en 31 spek en boeëne faatse (die ware mit z’n twieë). Maar wie dan ouk, allemaol prachtige creaties, weej hebbe ze dan ouk allemaol ‘n 10 gegaeve. ’T Waas ós gegaeve um det te doon.
Nao d’n optoch, in de Maaspoort, aan Henny en mich de (lastige) taak um tösse allemaol die 10 ’s ‘n 11 te vinde waat dan de winnaer zoel zien. Det is gelök de winnaer is gewaore d’n hier Hans Derikx oet Venlo mit zien creatie:
“DE LETSTE NEUTJES RANG”
Dees verkleidpartie waas actueel – sober – en in einen ougopslaag dudelik. En waat veur ‘ne winnaer!!! Nao de félicitaties van Hoeëgheid Herm I ging d’n hier Hans Derikx efkes (van de wap en emotioneel) achter de jurie op de buun zitte um beej te kómme.
De priesoeétreiking veur de beste faats in d’n optoch van de Wortelepin en Jocus zal plaatsvinden op 01-03-18 in café de Gaaspiep, in ’t beejzien van de juries, veuraafgaonde aan de bestuursvergadering. Beej dees oetreiking zal ouk ’n delegatie van Jocus en de Wortelepin aanwezig zien.
Ós taak als faatsesjurie zit d’r veur dit jaor weer op, volgend jaor (2019) trek weer ‘ne nieje optoch.
Mit vrintelike groete. Faatse jurie 2018. Henny en Wiel (M)
Vandaag trok de groeëten optoch door de straote van ’t Wortelepinneriek in Blierick. ‘t Motto van 2017 waas: Heej is ’t te doon. D’r zien 88 deilnemers in dezen optoch. Nao ‘n paar stormachtige daag ware de waergode ós aevel good gezind. ‘t Waas good te doon naeve de straotkant.
Veuraaf gaonde aan d’n optoch hadde weej in ’t Raodhoes ‘n óntmoeting mit ’t Trio van dit jaor: Prins Rob d’n Ierste en zien adjudante John en Dimitri. Um 13.00 oor ginge weej nao ós jury plaats. ’t Waas eine schoeëne bónten optoch mit vuuel meziek en prachtige groepe. De faatse ware weer aanwezig mit aktuele kreaties. Nao afloup van d’n optoch ging de zjurie nao ’t Raodhoes veur euverleg. Nao ’n kort euverleg kwame weej tot eine winnaer. De Veldeke trofee 2017 Blierick is gewónne door d’n hier Piet Welles mit zien kreatie: ik heb ’t letste brosje van Josje. Veldeke zal de pries ónder de jaorvergadering op 9 april in Ut Tref oetreike aan Piet.
Heejbeej is de taak van ós veur 2017 alweer gedaon. Op nao de vastelaovend van 2018.
Namens de Veldeke jury Blierick: Henny, Henk, Jos en Mieke.
maondaag 27 fibberwari 2017 in Venlo
’t Waas toch waal effe spannend. De vraog waas: “ is ózze Leven Hier ‘ne Venlonaer?” Tuurlik is Hae det mót ’t antwaord zien. Genne storm, genne raegen, d’n groeëten optoch van Jocus kós door Venlo gaon trekke. ’t Ging pas raegene wie ’t zoeë good as gedaon waas.
Veuraaf gaonde aan d’n optoch hadde weej as zjurie in de Brasserie aan de Klaosstraot ein óntmoeting mit de Raod van Elf van Jocus en netuurlijk mit ’t prinselik trio; Prins Lex I en zien adjudante Dick en Martijn. Taege 12.00 oor ginge weej nao de plekskes op de route wao weej de Faatse good ónder de loep kóste legge.
D’n optoch leet efkes opzich wachte, maar mit ’n bietje vetraging, ‘t Venloos keteerke duid altied mei, kwaam ’t gedeuns opgank. 71 Nummers ginge aan ós veurbeej bónt, prachtige kreaties en mit eine enorme berg meziek. En dao tösse in de Faatse, actueel, scherp en smeis op ’t rendje. Maar wat ware det d’r ‘nen houp, waal in de 50 hebbe weej d’r geteld. Mit andere wäörd weej hoofde ós neet te vervaele, hebbe weej ouk niet gedaon. Baovenal hebbe weej gewoeën genaote van alles waat aan ós veurbeej trók. ’t Mótto “Venlo op zien bes” woord ier aangedaon.
Nao aafloup van d’n optoch woorte weej as zjurie in de Maaspoort verwach veur euverleg. Mier dan 50 Faatse, weej hebbe ós ózze kop mótte braeke, maar weej zien tot eine winnaer gekómme. De Veldeke trofee 2017 Venlo is gewónne door d’n hier Bert Ebus mit zien kreatie: “Kiek Veldeke gen stripkes” De trofee 2017 zal Veldeke ónder de Jaorvergadering op 9 april 2017 in Ut Tref aan Bert oetreike.
Ós taak als Faatse zjurie 2017 waas gedaon. In 2018 kump weer ‘ne niejen optoch in Venlo, waallich mit weer zónnen houp Faatse. Weej zulle ’t zeen as ‘t ós is gegaeve. Names de Veldeke zjurie Venlo , Henny, Ria, Wiel
Dit jaor waas de vastelaovend vruug in fibberwari, en det haet ouk waat perbleme gegaeve. De waergode ware ós aevel good gezind ónder d’n optoch. Ónder d’n optoch waas ’t druueg en mit de wind veel ’t ouk waal met. De Wortelepin had dit jaor as motto: Lach en geneet. En zoeë trok d’r ‘nen bónte vastelaovesstoet door de Blierickse straote. Mit 85 deilnemers waas ’t ‘ne langen optoch. Ouk de faatse ware good aanwezig, en dao ging ’t ós ouk um. De faatse zien toch de krinte in de optochpap. Veur d’n optoch kwame weej beej ’t Raodhoes beejein um nog efkes alles door te spraeke. ’t Waas sóms bes lastig um de faatse te vinde, veural as zeej achter ‘nen auto of groep lepe. Maar oeteintelik is ’t ós toch gelök. Nao afloup van dae prachtige optoch lepe weej weer truuk nao ’t Raodhoes veur euverleg. Vanzelfspraekend hebbe weej alle faatse die aandach gegaeve die ze ouk verdeende. Nao efkes te hebbe geklasjeneerd kwame weej met algemeine stumme tot eine winnaer.
De Veldeke-trofee van 2016 in Blierick is gewónne door d’n hier Ben van de Heyden met zien kreatie: Ik bin onderwaeges nao de Venloosche optoch. Heej beej zoot ós werk d’r veur dit jaor weer op. Weej kieke al weer oet nao 2017!
Veldeke jury Blierick,Henny, Mieke, Henk en Jos
Vastelaovend met Halfvaste in Venlo.
Vuuel minse hadde zich al behuurlik drök gemak euver Halfvaste. De kasteleins roke eur kans en vonde det weej d’r maar weer ens duchtig taege aan móste gaon, anderen vonde weer van neet. TANTE Bet , Jocus en ózze StADSUMROOP ventileerden allemaol eur meining. De Gemeinte Venlo waas wat minder enthousiast en vond det Jocus maar de ker mós gaon trekke, maar dao had Jocus neet zoë vuuel zin in. Maar d’n optoch meus d’r kómme en dae kwaam d’r!
D’r ware d’r wat die neet kóste, en ouk weer andere die gaer mei deje. En zoeë leep de Ponywaeg taege de middaag toch weer behuurlik vol en belaofde ‘t ‘ne schoeëne optoch te waere. En det waas ’t ouk. ‘ne wonderschoeëne optoch – zonder gater!- met schitterende wages en groepe. Ein genot um nao te kieke. ’t Waer speulde de minse gans in de kaart en op ’t lets kwaam ’t zunke zelfs te veurschien.
Faatse ware d’r waat minder as ander jaore. We telde d’r ongevaer 20. D’r woort op twieë plaatse gejureerd door Han en Huub Thijssen en door Henny Crommentuyn met Wiel van Aarssen. Na aafloup hebbe die zich beej ein gezatte en d’n oétslaag bepaold.
As winnaer kwame oét de bus: Ben Bettinger en Geert Rutten met eur kreasie: Toch ein boete bar. D’r woort ouk ‘ne aanmoedigingspriés gegaeve en waal aan Hay Swinkels met : Gans door ein.
De priéze zulle waere oétgereik tiejes “De Slumste Venlonaer”op zondaag 30 oktoëber in de Venlonazaal .
Ónder ein straolende zón trok alweer de groeëte vastelaovesoptoch door de straote van ’t Wortelepinneriek.De waergode ware ós ouk dit jaor good gezind. ’t Motto van dit jaor waas: Kiek ens heej. ’t Waas einen optoch met 88 deilnemers. Met vuuel kleur en meziek waas d’r ein hiele goje stumming beej de deilnemers en de minse naeve de kant. As jury van Veldeke veur de Veldeke trofee, hadde weej de taak um oet al die faatse (en det ware d’r hiel vuuel) eine winnaer aan te wieze. Eigelik is iddere faatse eine winnaer in d’n optoch, want de faatse zien toch de krinte in de optochpap. Vanteveure in ós euverleg hebbe weej vasgesteld aan welke punte de faatse meuste voldoon. Ein van die punte is det ze de gansen optoch meiloupe en good kóntak make met de minse naeve de waeg.
Zeej laote tot ’t letste ougenblik eur lol en geinigheid aan ’t publiek. Nao aafloup van eine geweldige optoch kwame weej beejein in ’t Raodhoes. Vanzelfspraekend hebbe weej alle faatse die aandach gegaeve die zeej ouk verdene. Binne de jury is duchtig geklasjeneerd euver wae de winnaer zoel waere.Oetintelik waar de jury einstummig van meining det de Veldeke- trofee van 2015 is gewónne door de hiere Peeters en Peters met eur creatie: Weej as nieje vors en prins drage de Wortelepin op hand.Nao nog waat gezellige eurkes zoot ós taak d’r veur dit jaor weer op! Veldeke jury BlierickHenny, Henk en Jos
De Faatse in d’n optoch 2015 van Venlo.
’t Vurrig jaor hadde weej schoeën waer, maar dit jaor deej ’t zunke biezonder zien bès.Daordoor ware d’r neteurlik ouk vuuel minse in de stad en dus waar ’t d’r erg gezellig.Van d’n optoch zelluf hebbe weej genaote: prachtige kleure, moeie wages en leuke ideeje.Ouk ware d’r vuuel faatse, maar aevel nog mièr twieëtalle en dreejtalle. Maar ’nne faatse is now einmaol eine faatse en dus allein. Weej kieke zeker ouk nao die andere en beoordeile die ouk. Komme weej in twieestried dan keze weej veur de faatse. En dao hebbe weej dit jaor ‘ne winnaar beej kinne vinde. As echte Veldekeminse ziet geej um al ens dökker taege gekomme: Bert Ebus. Hae had as creatie : “Waas ’t beej Vroom maar zoeë drök!”. ’n Actueel thema en simpel gebrach, heerlik!Ouk haet de jurie beslaote ‘ne aanmoedigingspriès oet te reike. Dae is gewonne door Ben de Wit en Jacq Peters met eur creatie : “Weej zien al veurgekómme”. Same met z’n twieje achter ein paar tralies, inspeulend op ’t motto van dit jaor en schoeën gebrach.Wie jäörliks gebroekelik zal op zondaag 25 oktober tiejes “De slumste Venlonaer”aan eur de priès waere oètgereik. Dao kint geej allemaol beej zien, maar dan mót geej óch waal opgaeve veur deilname aan “De slumste Venlonaer”!
