Op zóndaag 27 oktober vanaaf 14.00 oor zuk Dialekvereiniging Veldeke Venlo in ’t Tref aan de Hendrikxstraot 17 in Venlo weer “de slumste Venlonaer’’. Ózze Kwis Meister Hans Jacobs haet weer naogedach euver allerhande saorte vraoge die mit Groeët Venlo te make hebbe.
Wilt geej óg kinnis van Venlo op de proof stelle? Doot dan mei mit deze geweldige kwis mit vraoge euver dialek, cultuur, geschiedenis, meziék en neum maar op.
Koppels kinne zich heej aanmelde veur deze ludieke, joeksige, spannende middaag of aan de zaal op 27 oktober vanaaf 13:30 oor. Koppels die meidoon mótte herkinbaar zien met beejveurbeeld ’t zelfde hudje, slieps of sjaelke. Bedink ouk ‘ne kwante naam!
De koste zien € 7.50 per inschrieving/koppel en daoveur kriege de deilnemers ouk nog ‘n Veldeke-pen.
In eine bómvolle zaal ’t Tref woord op 29 oktober de kwis “de slumste Venlonaer” gehalde.
Kwismeister Hans Jacobs had weer 10 kwante vraogerundes oet d’n aek gedreijd zoeëas ‘ne waordzeuker, waor of neet waor, straotname puzele en waat wit geej van…?
Nao haos 3 oor lank gepieker, gesmiespel, veurzegge, hölpeloos róndkieke, schrieve en teikene door de 25 teams kwaam de zjurie mit de volgenden oetslaag:
1e plaats: de Vrouwluuj van… bestaonde oet Jacqueline Driessen & José van Gestel
2e plaats: Óngenuuejd bestaonde oet Henriëtte Bakker & Jos Vullings
3e plaats: 2 teams geliek te weite Noeëts Druueg II met Ton Janssen & Joep van Kleef en Nog eine dan… bestaonde oet Sandy en Tjeu Driessen
Um oet te make wae de slumste waas meuste de dames van ’t winnende koppel eder veur zich bepaole of de verklaoring beej ’t door Hans geneumde Venlose waord waal of neet juus waas. Mit 1 punt verschil wón Jacqueline en is daomei de slumste Venlonaer van 2023.
Veur de leefhebbers van ‘ne gezellige en lierzame middag mit weiteswaerdighede euver Venloos plat en van alles en nog waat euver Groeët Venlo, noteer vas 27 oktober 2024. Dan is de volgende editie.
Op zóndaag 29 oktober 2023 um 14.00 oor zuk Dialekvereiniging Veldeke in ’t Tref, Hendrikxstr. 17 in Venlo weer “de slumste Venlonaer’’.
Ózze Kwis Meister: Hans Jacobs
Wae van óg wuurt de slumste Venlonaer van 2023?
Wilt geej óg kinnis van Venlo op de proof stelle, doot dan ens mei met deze geweldige kwis mit foto’s, items euver van alles en nog wat det mit Venlo te make haet, dialek, cultuur, de stad zelf, historie en neum maar op.
Koppels kinne zich aanmelde veur deze ludieke, joeksige, spannende middaag via ós site. Messchiens zien d’r aan de zaal nog waal ’n paar plaetskes vreej op 29 oktober 2023 vanaaf 13 .30 oor. De koppels die meidoon mótte ’n bietje herkinbaar zien mit beejveurbeeld ’t zelfde hudje of dezelfde sjaal. Bedink veur óg koppel ‘ne kwante naam! Zörg heej waal veur, want ’t is dit jaor ein onderdeil van de kwis!
De koste zien € 7,50 per inschrieving/koppel.
’t Is kwant um mei te doon. Det hure weej idder jaor van de koppels die meidoon en de luuj die kómme kieke. Eine kier meidoon en geej ziet verkoch!
Zóndaag 30 oktober in ’t Tref zote 23 koppels klaor um de vraoge van kwismeister Hans Jacobs te beantwaorde.
Nao 9 rundes mit vraoge mit ónder andere waat wets se van ’t hoeëgste gebouw, euver sportvereiniginge, Venlose spreuke, jaortalle en nieëts bleek det tösse de nummers 1, 2 en 3 steeds 1 punt verschil zoot.
Mit 92,5 punt zien de winnaers Die Twieë bestaonde oet Ria en Wiel van Aarssen. In de beslissende runde tösse eur wis Ria de meiste goje antwäörd te gaeve op de door Hans gevraogde wäörd en meug zich de Slumste Venlonaer van 2022 neume. Perficiat!
Op de 2e plaats zien geëindig Bert Driessen en Gerard van Gestel as Noeëts Druueg I en as 3e woorte René en Danee Dings gehöldig die ónder de naam De Twieë Dingskes deilnome.
D’n troeëspries waas veur Elly Ebus en Ria Maas die as Trutjes op de letste plaats eindigde.
’t Waas alweer ‘ne bizónder geslaagde, lierzame en gezellige middaag. Volgende jaor weer, de letste zóndaag van oktober.
’n Verslaag van deze middaag kump nog en det steit straks ouk in de Kroedwis van december.
Op zóndaag 30 oktober 2022 vanaaf 14.00 oor zuk Dialekvereiniging Veldeke in ’t Tref, Hendrikxstr. 17 in Venlo weer “de slumste Venlonaer’’. Kwis Meister is Hans Jacobs.
Wilt geej óg kinnis van Venlo op de proof stelle, doot dan ens mei met deze geweldige quiz mit foto’s, items euver van alles en nog wat det mit Venlo te make haet, dialek, cultuur, de stad zelf, historie en neum maar op.
Koppels kinne zich heej aanmelde veur deze ludieke, joeksige, spannende middaag of aan de zaal op 30 oktober 2022 vanaaf 13.30 oor. De koppels die meidoon mótte ’n bietje herkinbaar zien mit beejveurbeeld ’t zelfde hudje of dezelfde sjaal. Bedink veur óg koppel ‘ne kwante naam!
De koste zien € 5,00 per inschrieving/koppel en daoveur krieg geej ouk nog ens ein consumptiebón per persoeën.
’t Is kwant um mei te doon. Det hure weej idder jaor van de koppels die meidoon en de luuj die kómme kieke. Eine kier meidoon en geej ziet verkoch!
Op 31 oktober 2021 woort in Gemeinschapshoes ut Tref weer gezóch nao de Slumste Venlonaer.
Zoele de twieë Dingskes, die dezen titel al dreej jaor drage (in 2020 waas d’r vanwaege de coronaregels genne Slumste Venlonaer), verstoeëte kinne waere van de ierste plaats?
Hans Jacobs had weer ‘ne schoeëne quiz inein gefiespernöld. De deilnemers woorte flink aan d’n tand geveuld euver eure kinnis van Venlo. Straote, vlagge, börgervaders, ’n Venloos dictee, ’t kwaam allemaol veurbeej.
Nao 6 róndes waas d’r pauze. Nog 5 róndes te gaon.
De jury, bestaonde oet Frans van de Rijdt, Wilma Janssen en Til Janssen, had ’t d’r maar drök mei en waat loge de punte doeën beejein.
Oetintelik behaolde ’t koppel ‘Zoeë slum zien weej ouk neet’ de ierste plaats. Henk Geenen en Gé Hulsmans meuste nog strieje um de titel Slumste Venlonaer 2021 en Gé Hulsmans ging met die ier strieke.
’t Waas ‘ne hiele kwante middaag en good verzörg door ’t perseniel van Ut Tref.
In de kómmende Kroedwis kint geej nog mier laeze euver ‘de Slumste Venlonaer 2021’.
Heej d’n oetslaag:
Plaats
Koppel
Punte
1
Zoeë slum zien weej ouk neet Henk Geenen en Gé Hulsmans
Op zóndaag 27 oktober 2019 vónd weer ózze quiz ‘’de slumste Venlonaer’’ plaats in feeszaal ut Tref in Venlo-Zuud. 27 koppels streje um dezen titel. Veurzitter Henk Buskes äöpende de middaag en Hans Jacobs had weer 10 leuke gevarieerde spelónderdeile bedach um de kinnis van de deilnemers op de proof te stelle. De jury, bestaonde oet Frans van de Rijdt en Diana Vullings, had de hand vol aan ’t naokieke van alle antwäörd. Oetintelik ware ‘’De Twieë Dingskes’’, René en Danee Dings veur d’n derde kier (2016,2018 en 2019) ’t slumste koppel. Dit jaor ging Danee Dings strieke met d’n titel ‘’de slumste Venlonaer’’. De middaag waas zier geslaag, mei door de goje zörg van feeszaal ut Tref.
In de iersvolgende Kroedwis laes geej ’n oetgebreid verslaag van ‘’de slumste Venlonaer 2019’’.
In totaal ware d’r 1000 punte te behaole. Heejónder d’n oetslaag:
Plaats
Koppel
Punte
1
De Twieë Dingskes (René en Danee Dings)
880
2
De Fiespernöllers (Ine Bleijs en Piet Steunenberg)
Op zóndaag 28 oktober 2018 zóchte weej weer ‘ne nieje slumste Venlonaer.
Feeszaal ut Tref struimde langsaam vol met koppels die de stried taegenein op ginge neme, 32 in totaal. Weej zoge vuuel bekinde gezichte, maar ouk ‘ne gas nieje. Ós activiteit ‘’de slumste Venlonaer’’ wuurt steeds bekinder en populairder.
Veurzitter Henk Buskes äöpende de middaag.
Hans Jacobs had weer schoeëne vraogstökke inein gedreid, 10 ónderdeile in totaal. Dees varieerde van ’t herkinne van bekinde Venlonaere van foto’s en aan de hand van vraoge, ’t spelónderdeil hoeëger of lieëger, meziekvraoge, in welke straot ligge dees winkels?, in welke Groeët-Venlose gemeintes ligge dees attracties? wies ’t aafmake van ’n teikening van ‘ne bekinde Venlonaer. Dit letste leverde prachtige, mei ouk hilarische kunswerke op.
Ouk ware d’r ‘ne gas taalvraoge, te weite ’t jao-nae spelke met Hans Jacobs en Bas Vissers euver de beteikenis van ’n Venloos waord, ’n stökske Venloos dictee, det erg gewaardeerd woort en ’t bekinde waordritse.
D’r woort flink gezweit door de deilnemers en Feeszaal ut Tref zörgde d’r veur det zeej gennen dors hoofde te lieje.
De jury, bestaonde oet Frans van de Rijdt en Veldeke bestuursleje Wilma Janssen en Diana Vullings, had ’t d’r maar drök mei, maar oetintelik ware alle punte geteld. De laptop deej de res van ’t werk.
En toen waas ’t spannende moment aangebraoke van ’t bekind make van d’n oetslaag. Welk koppel ging met ‘ne pries nao hoes? De poedelpries ging nao ’t koppel ‘’11 m2 2’’, Jean-Peter Brizzi en Wim Stoffels, twieë niejkómmers oet Velde. D’n derde pries waas veur ’t koppel ‘’De twieë d’r aaf geweide”, Bert en Jacqueline Driessen. D’n twieëde pries ging nao ’t koppel ‘’Festina Lente’’, Bart Daemen en Huub de Bruin van vastelaovesgezelschap de Törvers en d’n ierste pries ging nao ‘’De twieë Dingskes” vader René en dochter Danee Dings, die deze titel al veur de twieëde kier op eure naam meugde schrieve. In 2016 wónne zeej ouk al.
Toen meus d’r nog gekeke waere wae van ‘’De twieë Dingskes’’ ’t slumste waas. Umstebeurt meuste zeej de beteikenis van Venlose wäörd raoje. Wae de meiste good had, dae wón. Oetintelik waas pap René Dings toch ’t slumste en ging nao hoes met ’n schoeëne oeërkónde. René Dings meug zich dus de slumste Venlonaer van 2018 neume. Veur d’n twieëde kier, want in 2016 behaolde hae daen titel ouk al.
’t Waas ‘ne zier geslaagde gezellige middaag en alles leep op rölkes, mei dankzij de prima verzörging door Feeszaal ut Tref.
In 2019 is ‘’De slumste Venlonaer’’ op zóndaag 27 oktober. Zet deze datum maar ves in óggen agenda. Geej dót toch ouk weer mei?
D’n oetslaag:
In totaal ware d’r 800 punte te behaole.
Heejónder zeet geej d’n oetslaag van alle koppels:
Met 35 koppels die zich ’n plaats hadde gezóch in de Venlonazaal woort op zóndaag 29 oktober gestart met De Slumste Venlonaer. D’r ware nog inkele täöfelkes vreej veur de binneloupers.Nao de äöpening door veurzitter Henk Buskes vertelde spelleider Hans Jacobs waat ós allemaol te wachte stónd: 10 spelónderdeile, inkele nieje, inkele alde en waat in ’n nie jeske gestaoke.
Dao ging ’t haer met spel 1: Hans stelde 11 vraoge euver actualiteit en mier en die meuste met jao of nae beantwaord waere. Idder good antwaord goof 10 punte. Mekkelik toch…. of toch neet! Gezeen de scores tösse de 80 en 110 punte mekkelik dus. Spel 2 ging euver ‘ne gas straote in Venlo en waorum die zoeë heite. Keizersträötje, Hakkesplaats, Kwartelemert, Parade en Bolwaterstraot. Det wet toch (haos) idderein…. Beej spel 4 krege we ‘ne gas aafbeeldinge te zeen van persoeëne: wae is dit? waas de vraog. Ein koppel det zich de alde doeëze neump had ze allemaol good: 100 punte.
Umdet de “mystery guest” d’r neet ierder waas, woort noow spel 3 gedaon. En dit spel kwaam 3x truuk, zoeë bleek. De koppels meugde vraoge stelle die met kloppe op de deur beantwaord woorte: jao of nae. Nao 8 vraoge met aaf en toe ‘nen bonus meus se de naam opschrieve van dae klopgeis. Det veel neet mei. Beej spel 6 en 9 ging det net zoeë. Oetintelik had geraoje mótte waere det Sef Thissen, Geert Benders en Renée Vercoulen op die deur stónde te kloppe. Nao binnekóms stelde idder van eur ’n dreejtal vraoge. En det ware neet de mekkelikste kin ik óg vertelle. De vraog van Renée, broed van persenieëlsvereiniging Festina Lente, um op te schrieve wie alle deilnemers geheite zoele hebbe as zeej broed of broedegóm beej de boerebroelof woorte, had idderein good. Geej kint óg veurstelle det d’r waat kwants beejein woort bedach.
Wie Bert Ebus de buun op kwaam wiste de vaste deilnemers al det ’t beej spel 5 ging um de vraog wae de waorheid ging vertelle. Hans en Bert gove idder ’n verklaoring veur ’n Venloos waord maar waat waas de juuste? Beej spel 7 kwaam ’t aan op kaartlaeze: aan de hand van ‘ne plattegrónd met coördinate van ’t centrum van Venlo meus vermeld waere wao ’n elftal gebouwe loge. Of det die juus neet op de kaart stónde. D’r ware 7 koppels die ze allemaol good hadde. Beej spel 8 kwame de puzzelaers aan bod: aan de hand van ’n beschrieving meus ‘ne straotnaam ingevöld waere in de hökskes die dao veur ware. En de letters pasde persies. Veur de meiste waas Picardi ’t perbleem umdet ederein det kint as de Picardie…. Oetintelik kwaam in ‘ne verticale kolom ’t gezóchde waord: meuderke. ’n Kwart van de koppels had det neet, maar gelökkig goof det maar tieën punte. Beej spel 10 kwaam de ganse zaal in bewaeging en meus d’r gezóch waere nao ‘ne gas letters die links en rechs ware opgehange. En met die letters meuste minstes 2 Venlose wäörd gemak waere.Tössedoor woort Hans door Noeëts Druueg nog ens fien herinnerd aan ’t gebeure vurrig jaor met ’n bepaold soort bruuedje: in ’t aangebaoje frikandellebruuedje zit gelökkig gen s of z….
De jury bestaonde oet Wilma Janssen, Diana Vullings en Frans van de Rijdt had zich óndertösse de mies gepaes en alle punte in de computer ingeklop. Op ’n groeët scherm kwaam d’n oetslaag veurbeej gerold: 2 poedelprieze ware d’r veur Hermien en Peter oet Blierick en de Schienheilige Ria en Ton. D’n top 3 bestónd maar leefs oet 5 koppels: ’t 2e van 11m 2 Hans en Tjeu waas derds, op de twieëde plaats 3 koppels: de Twieë Dingskes Danee en René, De Venlose Poerkers Truus en Gerard, en de Alde Doeëze José en Toos. “t Beste koppel waas Blauw Blood bestaonde oet Harriëtte Buskes en Anneke van Kleef. Die meuste aafkampe en al nao 1 vraog van Hans waas dutelik det Harriëtte zich de Slumste Venlonaer van 2017 meug neume. De gansen oetslaag vindt geej op de site van Veldeke.
De kómplemente gaon nao de organisatie, de ophaolers, de jury, d’n ónvolpreze spelleider, ’t barpersenieël en zeker ouk nao alle deilnemers die ’t toch maar weer aandörfde um mei te doon.Zoeëas altied kin ik allein maar zegge: geej dót toch volgend jaor ouk (weer) mei? Wies dan.
Aafgelaje vol is de Venlonazaal op zóndaag 30 oktober 2016. ’t Wuurt ‘ne middaag van rekórds en speciale gebeurtenisse. D’r wuurt weer gestreje um d’n t itel van De slumste Venlonaer.
Maar leefs 34 koppels doon mei aan dit kwant spel. De meis oeteinloupende en aparte name hebbe de koppels bedach: Beejeingerap, Theetäötjes, Weej weite ’t neet, de Fiespernöllers en Joetsmedemkes. Ouk zien d’r al inkele teams van ’t zelfde clubke: Noeëts Druueg, 11m2, de Moeraskwaakers. Wie is ’t spraekwaord ouk al weer: Good veurbeeld….Prissentator Hans Jacobs haet d’r dutelik zin in um met dit gezelschap aan de slaag te gaon en eur herses op volle toere te laote werke mit zien vraoge en spelkes. Maar iers mót hae ’t perbleem oplosse det d’r gen raekening gehalde waar met zoeëvuuel toeloup. Hae dreit det good oet d’n aek en mit ’n Venloos keteerke nao 2 oor geit ’t speul op de wage.
Wie altied haet Hans 11 spelkes bedach en de meiste zien weer andere dan vurrig jaor. Det beteikent dus ’n verrassing veur de meiste. Beej spel ein steit de Venlose of de Nederlandse naam van ’n bieës en ’t is de bedoeling um d’n andere naam d’r beej te zitte. Spel twieë besteit oet ‘ne gas stellinge en die mótte verklaord waere. Beej spel dreej staon 9 wäörd op ’n blaad en d’r kin van 3 wäörd ’n gezamelike gebeurtenis waere gemak. ’t Spel haet 3 blajer. As de ophaolers de ingevölde blajer hebbe aafgegaeve beej de jury, blieke d’r 2 koppels te zien die maar 1 blaad hebbe ingevöld…. Nao euverleg met dezjurie wuurt beslaote um eur nog 2 minute extra te gaeve.
Beej spel veer is ’t gekuum en gezuch neet van de lóch: de beteikenis van Tegelse wäörd. Daomei is Hans ’n belofte van vurrig jaor naogekómme. Nóndesjang, waat is det lastig! De sjtoepsjtert en d’n aansjpenner klinke nog lang nao. ’t Team oet Tegele haet det neteurlik foutloos opgelos. Veur spelke vief haet Hans in ziene werk- en kinnissekrink gevraog um op te schrieve waat emes invelt beej bepaolde wäörd. En waat is dan ’t meis geneump beej ’t Zomerparkfees, de Träöt, Kepelke van Genuue en de Venloup. Nao spel zes meus de jury in aktie kómme. Gegaeve zien 15 letters en de bedoeling is um dao ’n zoeë lank meugelik Venloos waord van te make. Die van Noeëts Druueg 1 meine det zeej alle letters gebroek hebbe um seziezebruuedje te make. Zeej kriege daoveur applaus. Det is veur de pauze. Tiedes die pauze bliek det in det bruuedje maar 1 Z mót zitte in plaats van 2. Maar die stónde waal in de opgaaf. De jury besluut nao de pauze det dit spel neet meiduit, en die kriege daoveur neet de hand opein.Maar waal ’n wies besloet, want per slot van raekening had idderein det waord dan kinne make as ze de goje letters hadde gehad….
Beej spel zeve mótte de deilnemers aangaeve wae de waorheid sprik. Umdet de persoeëne die Hans gevraog haet um de stellinge te bringe speulers oet de revue zien die op det moment in de studio zitte veur ’n opname, duit hae det gans allein… In spel ach staon ‘ne gas wäörd waovan letters óntbraeke. Die mótte waere ingevöld. ’t Laevesgevaorlike bonuswaord levert 5 punte op. Dao brik zich mennigein de kop euver. Spel nege is mekkelik veur degene dae nao de revue zien gewaes:gegaeve zien de rolle en ‘ne gas speulers. Gewoeën de juuste beejein zette. Hebs se de revue (nog) neet gezeen, dan bis se beej dit spel gezeen. Nog 2 spelle te gaon.
Veur de kinners van Venlose leedjes is spel tieën: de tekste van ’t couplet staon in ’t Huilands en zeuk dao d’n titel van ’t leed beej. Dae ’t kin zinge, meug daonao op de buun. Ouk beej spel elf zien de -smeis valse- toeëne neet van de lóch: van idder koppel meug d’r eine de buun op um ’n leedje te zinge. Met 34 man/vrouw waere d’r 10 verschillende nummers tegeliekertied gezónge. De andere helf meug opschrieve waat e gehuurd haet.
Dan zit ’t d’r op: de jury geit aan de slaag um d’n oetslaag te beraekene. Diana, Wilma en Frans mótte ef doorpeze um alles te telle, te sjekke en nog ens te sjekke. Die kinne zich genne faeler leiste. Óndertösse kómme Jules en Gijs de buun op um eur winnend vastelaovendleed van dit en volgend jaor te zinge oftewaal Op de hei en Dich bis ‘ne pipo.
Dan is ’t tied veur de winnaers van de faatsepries: Henk Buskes reik dae oet aan de hiere Ben Bettinger en Geert Rutten die in de Venlosen optoch de leukste kreasie hadde. D’n Blierikse winnaer Ben van der Heide is neet in de gelaegenheid um te kómme. Zeej kriege ’n beeldje gemak door Mariëlle Franssen.
D’n oetslaag kump d’r aan: as letste zien geëindig de Maasjes die van Henk ‘ne pot zore babbelaers kriege. De derde plaats is veur Noeëts Druueg 1, de twieëde veur de Venlose Poerkers en de beste zien de Dingskes: René en zien dochter Danee. De jóngsten deilnemer oeëts mit zien 14 jaor is Danee. Zeej kriege kaarte veur de Ode aan Sef Cornet. Beej ’t veurlaeze van de res van de punte spraeke de reaksies van de deilnemers veur zich: teleurstelling en euforie wissele zich aaf. Maar wae is de slumste van die twieë van Dings? Det wuurt René. Hae wet de verklaoring van de meiste wäörd binne 1 minuut te gaeve.
Wie gezag: ‘ne gedinkwaerdige middaag wao alle deilnemers en toeschouwers met vuuel plezeer op truuk kieke. En waat hebbe we weer ‘nen houp gelierd euver Groeët Venlo. De waalgemeinde kómplemente zien veur de prissentator en bedinker van dit aevenement Hans. Hae haet zich weer good van zien taak gekwete.
Volgend jaor is ’t op zóndaag 29 oktober. Ik haop det de Venlonazaal dan te klein is….Geej dót toch ouk (weer) mei? Wies dan.
Gerard van Gestel
De slumste Venlonaer de oetslaeg.
De Dingskes
65 pnt. 1ste pries
Danee en René Dings
De Venlose Poerkers
60 pnt. 2de pries
Truus en Gerard Driessen
Noeëts Druueg 1
57 pnt. 3de pries
Gerard van Gestel en Bert Driessen
De Moeraskwakers
55 pnt.
Blauw Blood
53 pnt.
’t Twieëde van Noeëts Druueg
53 pnt.
Weej Twieë
53 pnt.
De Venlonaerkes
53 pnt.
De Pinkes
51 pnt.
Weej weite ’t neet
51 pnt.
Weej Same!!
51 pnt.
De Theetäötjes
51 pnt.
Óngenuuejd
51 pnt.
De Fiespernöllers
51 pnt.
ForFarissimo
51 pnt.
2de 11m²
50 pnt.
Festina Lente
50 pnt.
Duo Beejeingerap
49 pnt.
De Hudjes
48 pnt.
Ónverwach
48 pnt.
Döbbel G
48 pnt.
Joetsmedemkes
48 pnt.
De Waakvlemkes
48 pnt.
De Keviepers
47 pnt.
11 m²
46 pnt.
Die andere twieë
46 pnt.
Vrouwluuj 11m²
46 pnt.
Interlink team 1
45 pnt.
Betje Behei
44 pnt.
De Viecurietjes
43 pnt.
De Poedels
43 pnt.
Mabonka
42 pnt.
De maedjes van…..
41 pnt.
De Maasjes
40 pnt. Poedelpries
Elle en Hay Maas
Nao ’t aafkampe tösse Danee Dings en ziene pap René Dings is oetintelik toch René Dings de Slumste Venlonaer 2016 gewaore!! Perfitsia veur René en zien dochter Danee!!
