Versjláag Tegelse declamatiewedsjtriéd Veldeke

Vriedig 21 april ware weej wir te gas beej De Harmoniezaal in Tegele, woë de finale-aovend van de Tegelse declamatiewedsjtriéd van Veldeke plaatsvóng. De zaal sjtruimde al sjnel vaol met deilnimmers, femielies, vrinde, lieërkrachte en angere fans, die door besjteurslid Pieter Ebus woorte welkóm geheite. Daonao noom Iris Vercoulen de microfoon euver öm de kinger te óntvange en ze te begeleide beej ’t declamere van eur versje. Wat ’n fieës öm al die talentjes te zeen! We krege d’r allemaol kriemels van in d’m bóek. Kei sjpannend huuer, öm as deilnimmer vanaaf die hoeëge buun in zónne volle zaal te kiéke met de sjiénwerpers op dien sjnóet. Maar wat zien weej as werkgroep gruuets det ze d’r wir allemaol sjtinge.

In de pauze meugde idderein zich laote verwóngere door de goochelkunste van Hayke Bongaerts en kós idderein efkes lekker lache en óntsjpanne. Det waas vur de jury waal angers, want die hadde de zjwaore taak öm alle declamaties te beóerdeile. Deze kieër hadde we ’n bezónger, prinsesselik dreejtal daotoe bereidgevónge, namelik ’t damestrio van 2023 van VG De Beerpiep: Sandra, Esther en Wendy. Zeej zote zichbaar te geniete en sjtinge naoderhank te popele öm wir ens ’n buun te beklumme en de priésóetsjlaag bekend te make!

D’n óetsjláag van de Tegelse finale-aovend is as volg:

Óngerbouw	Middebouw	Baovebouw
1. Ize Willems	1. Siem Stapel	1. Lynn Helmes
2. Vayèn Smedts	2. Bente Daniels	2. Phoebe Hauzer
3. Liza Hanraets	3. Isa Berends	3. Jayson Daemen

Umroop P&M zal op 18 mei beej Dwars door Limburg beelde laote zeen van ós declamaties. https://www.omroeppenm.nl/dwars-door-limburg

De nummers 1 en 2 zeen we truuk beej de Limburgse finale op 3 juni 2023 in Dok 6, Panninge.

D’n hier Jos Verbong haet foto’s gemak die te zeen zien op de website van Veldeke Venlo https://veldekevenlo.nl/ en op ós eige Facebook pagina: Declamatiewedsjtriéd Veldeke Tegele.

Groeëten dank aan alle deilnimmers, sjriévers, lieërkrachte, aanwezige en idderein dae zich haet ingezatte vur deze sjoënen aovend. As dit enthousiasme zoeë doorgegaeve blief waere, den zien weej nag jaore verzekerd van vuuel verbinding en identiteit binne de Tegelse gemeinsjap.

Werkgroep Tegelse declamatiewedsjtriéd Veldeke,

Truus Verbong, Nicol Ebus en Susan Janssen

Declamatiewedstried van de jeug in Tegele

Op vriedaag 21 april 2023 um 19.30 oor wuurt in de Hermeniezaal in Tegele de declamatiewedstried gehalde.

D’n inloup is vanaaf 19.30 oor en idderein is van herte welkóm.

De winnaers van de diverse laeftiedsgroepe doon mei aan de Limburgse finale die gehalde wuurt op 3 juni 2023.

Werkgroep declamatie Tegele:

Nicol Ebus, Suzanne Janssen en Truus Verbong,

Oetsjlaag Tegelse Declamatiewedsjtriéd Veldeke 2022

’t Waas alwir dreej jaor geleje det de Tegelse declamatiewedsjtriéd – toen nag in ’t Zaelke – had plaatsgevônge. Eindelik waas ’t wir zoë wiéd. Op Gójje Vriedig 15 april 2022, kwame hiel vuël kinger, breurkes, zuskes, elders, opa’s, oma’s, sjriévers en liërkrachte same in de verniejde Harmoniezaal in Tegele. Wat hebbe we wir genaote van zoëvuël minse die ’t Tegels dialek ’n werm hert toedrage. Óndanks get technische mankemente hebbe de kinger kenne sjtraole op de buun. Kinger, van klein toet groët, van verlaege toet get vrejer, met ’n kort of ’n lank versje, ze sjtinge d’r! Nao de äopening van Veldeke-veurzitter Henk Buskes, wis presentatrice Yvonne Rijs alle deilnimmers gerös te sjtelle. Monique Munten, Ruud Munten en Frans Hovens, leje van Optochgroep “Nag Ech Tegels”, hadde as jury de oëre gesjpits öm te luustere of d’r nag ech Tegels woort gesjpraoke.

In de pauze ginge de vutjes van de vloer en de hendjes opein met de Mini-dansgarde van VG d’n Oeles.

Weej zien d’r bliéj mei det fotograaf Bart Douben de gansen aovend al det sjoëns haet vasgelag. De foto’s kent geej binnekort zéen op ós eige Facebookpagina Declamatiewedsjtriéd Veldeke Tegele. Volg ós en haaj ós in de gate, want as werkgroep gaon we ós úterste bes doon öm ’t Tegels dialek met get verniejinge laevend(ig) te haje.

D’n óetsjláag van de finale-aovend is as volg:

Óngerbouw:

Jip Hendriks met Wiebele van Linda Hanraets-Weber
Divainney Schermer met Fruit aete van Truus Verbong-Simons
Liza Hanraets met Wiebele van Linda Hanraets-Weber

Middebouw:

Mischa van Enckevort met De sjnië in van Hanneke Konings
Max Verlinden met Met pap op sjtap van Leonie v.Hulten- v.Rhee
Tom Groenewegen van der Weijden met De sjnië in van Hanneke Konings

Baovebouw:

Minou van Hees met Ein good idee van Hanneke van der Sommen
Jikke Thissen met Ein good idee van Hanneke van der Sommen
Max Smeets met Race oma van Leonie v.Hulten-v.Rhee

Dit jaor is d’r vanwaege de ónzekere Coronatiéd gen Limburgse finale.

Ouch volgend jaor haope weej d’r same met uch wir ’n fiësje van te meuge make.

Bedank allemaol!
Groetjes,

Names de werkgroep Tegele
Van dialekvereiniging Veldeke Venlo

Susan Janssen
Nicol Ebus
Truus Verbong

Gedichte-Tegelse-Declamatiewedsjtried-2022 Downloaden

Venlo 2017

Vriedaag 31 maart 2017 vónd in de Venlonazaal weer de finale plaats van de Venlose declamatiewedstried.

39 kinder van de basisschoeële oet Venlo en Blierick declameerde eur gedich. Sómmige toepasselik gekleid of oetgedos met attribute veur beej eur gedich. Erg leuk! De zaal waas al op tied bómvol met kinder, elders en opa’s en oma’s D’n aovend woort weer geprissenteerd door Hans Jacobs. Met ‘nen houp joeks en jen reep hae de finaliste met gruupkes van vief de buun op en stelde hae de kinder op eur gemaak, wie weej det van um gewind zien. Nao 19 veurdrachte woort d’r ’n kleine pauze ingelas met ’n prachtig muzikaal optraeje van Kiki Severijns op trompet. Daonao kwame de andere 20 kinder aan de beurt um eur gedich te declamere.

De jury bestónd oet Hay van Hoorn, René Dings en Juul Stokbroekx, alledreej bekind oet ’t theater- en tenielwaereldje. Zeej hebbe genaote en stónde d’r van te kieke waat Venlo ‘nen houp talentjes haet. ’t Waas ’n zwaore taak, maar d’r zien toch ’n aantal winnaers oet de bus gekómme. Juul Stokbroekx leet de kinder neet langer in spanning en makde d’n oetslaag bekind:

Ónderbouw

1e Pries	Sophie Sassen	Willibrordusschoeël	met ’t gedich ‘’ ’t Nieje kledje’’
2ePpries	Trijntje Nellissen	Willibrordusschoeël	met ’t gedich ‘’Willie de goldvis”
3e Pries	Esmee Peeters	De Koperwiek	met ’t gedich ‘’Waat wils se noow ?’’

Middebouw

1e Pries	Jop Gubbels	De Koperwiek	met ’t gedich ‘’Supermen!’’
2ePpries	Yanna Schreurs	De Koperwiek	met ’t gedich ‘’Logere’’
3e Pries	Donné Lothmann	De Koperwiek	met ’t gedich ‘’Supermen!’’

Baovebouw

1e Pries	Fenna Saak	De Koperwiek	met ’t gedich ‘’D’n ierlike vinder’’
2ePpries	Maud Lucker	De Koperwiek	met ’t gedich ‘’Pechdaag’’
3e Pries	Kiki Severijns	St. Martinusschoeël	met ’t gedich ’’Brr bah’’

De nummers 1 meuge deilneme aan de Limburgse finale op 20 mei 2017 in Dok6 in Panninge. ’t Waas weer ‘ne fantastischen aovend en haopelik doon d’r ’t volgend jaor nog mier kinder mei.

Diana Vullings-Smeets
Venloos

Tegelen 2016

’t Tegels dialek zit ouch beej de jeug in ’t blood.

Vriedig 15 april 2016 waas alwir de 17de Tegelse declamatiewedsjtriéd! Ouch dit jaor deje alle zes de Tegelse basissjoële met. De deilnimmerkes kwame met eur femielie en vrinde beejein in ’t Zaelke öm dao eine leuke aovend te belaeve. Vur-al maedjes en eine gas sjtoere jônges sjtinge op de buun öm eur gedichje te declamere.

De sjriévers van de sjpiksjplinternieje gedichte ware dit jaor, Herman Bors, Linda Hanraets, Leonie van Hulten, Truus Jacobs, Susan Janssen, Hanneke van der Sommen en Truus Verbong. De jury, die besjtông óet 3 leje van Vv. De Kaetelaers (Erik Goossens, Marcel van Heel en Ted Huijbers), had de zjwaore taak öm óet alle talentjes de winnaers de keze! ’t Niveau waas hoëg en ’t was sjoën öm te zeen det ’t Tegels dialek ouch beej de jeug in ’t blood zit. Op nao ’t volgend jaor!

De winnaers van d’n óngerbouw:

Gijs Broekman met “Wat ein waer” van Truus Verbong (St. Jozefsjoël)
Puk Willemsen met “Hinkele” van Leonie v. Hulten (PassePartout)
Anouk Raijer met “Hinkele” van Leonie v. Hulten (St. Jozefsjoël)

De winnaers van de middebouw:

Bo Schraven met “Kratspaol” van Truus Jacobs (St. Jozefsjoël)
Zoë Kuijpers met “Kratspaol” van Truus Jacobs (St. Jozefsjoël)
Evy Kessels met “Wir nao sjoël” van Truus Jacobs (Het Maasveld)

De winnaers van de baovebouw:

Sam Hendrikx met “Miene gsm” van Herman Bors (St. Jozefsjoël)
Laura v.d. Wouw met “Miene gsm” van Herman Bors (PassePartout)
Mila Schraven met “Miene gsm” van Herman Bors (St. Jozefsjoël)

Foto’s van dezen aovend zien gemak door Jos Verbong. Alle nummers 1 meuge eur gedichje nag ens declamere beej de Limburgse finale op zaoterdigmiddig 21 mei in Dok 6 in Panningen.Op de groepsfoto sjtaon de nummers 1, 2 en 3 van iddere laeftiédscategorie.

Venlo 2016

Finale declamatiewedstried op 8 april 2016 in de Venlonazaal!

Waat ‘nen aovend… waat ’n schoeëne finale!!

Um half zeve, begint de zaal al aardig vol te struime, mama’s en papa’s, opa’s en oma’s en ouk nog de breurkes en zuskes, we hadde um hiel iërlik te zien… plaats te weinig. Maar achter in de zaal stónde nog staontaofels wao de minse nog koste staon.
De jury bestónd dit jaor oet Herm, Bert en Marij Pollux, die ’t ein hiele ier vónde um dit te meuge doon.
De klok löp taege zeve oor, de ganse zaal zit bómvol en de spanning van de kinder is hiel good te veule in de zaal, de hertjes kloppe in de kael.

Hans Jacobs geit beginne… hae rup de iërste vief kinder nao baove, de spits is d’r aaf. Wie idder jaor deej ik souflere, maar ik heb mich verbaas wie die kinder de gedichte allemaol in de kop hebbe zitte…Nao twintig kinder die ech waanzinnig eur gedich hebbe veurgedrage, hebbe we efkes pauze en dae woort opgevöld door Sjraar Timmermans, dae ziene buut van de aafgeloupe vastelaovend veur droog… ózze kanjer, dae ouk eine topper waas met gedichjes declamere , noow al veur ’t derde jaor ziene buut kump doon. Danke Sjraar, de waas éch gewéldig!! Wies ’t volgend jaor…

Nao de pauze veulde weej weer de spanning van de kinder, de ein zoot de schravele op de stool, d’n andere had gen nagels miër euver.
Die andere einentwintig kinder zien stök veur stök geweldig, waat haet Venlo ein talent!!! Als idderein dan oetintelik is gewaes, meuge se allemaol op de buun zitte en geluif mich… waat ein spanning onder de kinder… wae zal d’r met ein beeldje nao hoes gaon en wae meug de 21ste mei in Panninge in ’t Dok6 mei doon met de groeëte Limburgse finale??

Hans geit met de priesoetreiking beginne, beej de ónderbouw haet gewónne:

Sophie Sassen van de st. Willibrordusschoeël met ’t gedichje: SJOPPE
Jop Gubbels van OBS de Koperwiek met ’t gedichje: BEEJ DE BRANDWAER
Silke Ernst van de Koperwiek met ’t gedichje: SJOPPE

Beej de middebouw haet gewónne:

Jans Vaessen van ’t Groeneveld met ’t gedichje: TELEFOON
Emily Sassen van de st. Willibrordusschoeël met ’t gedichje: ’t BRILKE
Katie van Wylick van ’t Groeneveld met ’t gedichje: ’t BRILKE

Beej de baovebouw haet gewónne:

Kiki Severijns van de st. Martinusschoeël met’t gedichje: ’t IËRSTE KÖSMUULKE
Maud Lucker van OBS de Koperwiek met ’t gedichje: ’t IËRSTE KÖSMUULKE
Shainy van Cleef van de Montessorischoeël met ’t gedichje: IN VERWACHTING

Alle kinder hiel vuuel bedank veur óg declamere, ’t waas eine fantastische aovend wao we weer op truuk kinne kieke en de nummers 1, hiel vuuel succes in Dok in Panningen!

Annemie Schleepen-Schweitzer
Veldeke Venlo

Limburg 2016

Kiki Severijns en Sophie Sassen oet Venlo winne de houfprieze

DIALEKVEREINIGING VELDEKE VENLO velt in de prieze beej de Limburgse finale declamatie in Kepèl (Panninge) op 21 mei 2016 !

Op zaoterdaag 21 mei 2016 woort de Limburgse finale van de declamatiewedstried van Veldeke gehalde. Dees vónd dit jaor weer plaats in de sjieke zaal van DOK6 in Kepèl (Panninge). Waat waas ’t schoeën en wat leep ’t allemaol good! Zoeëwaal de deilnemerkes as de toeschouwers hebbe genaote van alerhande gedichjes in verscheie Limburgse dialekte.

Oet de 29 Limburgse finaliste zien de volgende winnaers gekómme:

Groep 3-4 / Ónderbouw:

Sophie Sassen, Sjoppe, Venlo
Thijmen Höppner, De ballon, Wieërt
Gijs Broekman, Wat ein waer, Tegele

Groep 5-6 / Middebouw:

Sofie Zeegers, Ein zomerwunjerke, Remund
Isa Meuwissen, Tant Truuj, Ech
Hanna Vranken, Miene drujim, Sustere

Groep 7-8 / Baovebouw:

Kiki Severijns, ’t Ierste kösmuulke, Venlo
Senna Valk. Verkieërdj begrepe. Ech
David Jetten. De toiletbäörstel. Ech

Van herte perficiat allemaol!

Tegele 2015

Versjláag Tegelse declamatiewedsjtriéd 2015

Op vriedig 17 april 2015 vông in ’t Zaelke in Tegele de 16e Tegelse declamatiewedsjtriéd van Veldeke plaats. Maar leefs dertig kinger trakteerde ‘t publiek en de jury op ‘n geweldige veurdrach van eur gedich in ‘t Tegels dialek, det ze van teveure óet ‘t groëte aanbod, passend beej eure laeftiéd, kôste keze. De sjriévers van dees gedichte ware dit jaor Truus Verbong, Leonie van Hulten, Truus Jacobs, Linda Hanraets, Hanneke van der Sommen, Herman Bors, Leo de Ronde en Susan Janssen. Rônk 19.00 oor sjtruimde de zaal al vaol zoëdet me verzekerd waas van ‘n gôj plaats öm al det sjoëns te kenne zeen en huëre. ‘t Is altiéd wir ‘n fiës öm te zeen wiekleine en groëte kinger zich ein versje hebbe eige gemak en wie ze dit met vuël flair aan ‘t publiek presentere. Eine blik in ‘t publiek, det op ‘t puntje van de sjtool zit, is aevel ouch de meujte waerd: alle naze sjtaon dezelfde kank op richting podium en ‘t plezeer sjtraolt d’r vanaaf, hiel gruëts op ‘t (klein)kink det dao op zien eige meneer de show sjtúlt. D’n aovend woort geäopenddoor Veldeke-veurzitter Henk Buskes en Hanneke van der Sommen noom op ‘n vrintelikke en flotte meneer de presentatie vur zien raekening.

De jury besjting dit jaor óet dreej hiëre van “Wie Laater Wie Zaater”, ‘n gezelsjap det van ‘ne vrindegroep is óetgegreujd toet ‘n klöpdie de Tegelse cultuur (met name de vastelaovend) hoëg in ‘t vaandel haet sjtaon. Heejvan is ‘t Tegels dialek netuurlik ‘n belangriék ôngerdeil. Aan eur de lestige taak öm te bepaole wae d’r óeteindelik ging winne. Dit zien de volgende kinger:

Ôngerbouw:

Tijs Rijvers met ‘t versje “Lache” van Susan Janssen
Meike van Hees met ‘t versje “Ein aepke” van Truus Verbong
Ryan Achten met ‘t versje “Miene sjtep is kwiét” van Leonie van Hulten

Middebouw:

Zoë Kuijpers met ‘t versje “Móes in hóes” van Leonie van Hulten
Laura van der Wouw met ‘t versje “Mien iërste welske” van Truus Jacobs
Bram Nellen met ‘t versje “Móes in hóes” van Leonie van Hulten

Baovebouw:

Lichelle Kusters met ‘t versje “Gelöksvogel” van Herman Bors
Connor Shilton met ‘t versje “Poepzekske” van Herman Bors
Demi Burhenne met ‘t versje “Poepzekske” van Herman Bors

Foto’s van dezen aovend zien gemak door Jos Verbong

Alle nummers 1 meuge eur versje nag ens declamere beej de Limburgse finale op zaoterdigmiddig 16 mei in ’t Patronaat in Haerle.

Venlo 2015

Declamatie finale van Veldeke Venlo 2015.

10 april waas ’t dan intelik zoeeë wiet, de finale van de declamatie 2015. Nao dreej spannende veurróndes die we op 16, 17 én 19 maart hebbe gehad, zien d’r 41 kinder door gegaon nao de finale.

We hadde dit jaor dutelik minder kinder als andere jaore, d’r ware eine houp kinder die neet dörfde en die op ’t letste moment aafzagte, heej beej wil ik óg ech mei gaeve… geej hoof ech neet bang te zien veur te declamere, ’t is hartstikke leuk um mei te doon!!! Probeer ’t volgend jaor ens en gaef dich gewoeën op en kiek dan ens op de veurrónde wie se ’t vinds? En meschien det dien moder of vader dich dao beej wilt helpe, want dit meug neet verlaore gaon…!

Dit jaor stond d’r eine catwalk in de zaal dae we mochte lieëne van de Venlonazaal, wao we hiel bliej mei ware, noow koste de kinder hielemaol de zaal in loupe, det waas erg jofel!

We hadde ein super jury dit jaor, die hadde allemaol waat met schrieve, vasteaovendleedjes schrieve en zinge: Wim Roeffen, Hay Geritz en Peter Jansen.

De spanning waas um te snieje wie we um 19.30 oor begóste en wie Henk Buskes ’t veurwoord had gedaon, de microfoon aan Hans Jacobs goof, kwaam de zaal al good los.

Hans reep steeds 10 kinder nao baove die eur gedichje veur droge en oet det gruupke koos hae eine assistent dae de kinder deej intervieuwe, erg leuk…! Zoeë veel d’r hiel waat spanning van de kinder aaf.

Idder kind kreeg van Tiny en Gertie ein oeërkónde en ein kónsumptiebón.

Nao 21 kinder hadde we efkes pauze, kinder en elders koste lekker waat drinke en chips gaon haole. Sjraar Timmermans , dae andere jaore ouk mei deej met de declamatie, deej ziene buut veurdrage… WAT HEBBE WE GELACHE!!!! Volgend jaor kump se weer truuk hé Sjraar?

Hans haet nao de pauze de jury gevraog wie se ’t vónde…. ERG MOEILIK DUSSSS….! Wat zitte d’r kanjers beej zeg!

De twieëde helf van de aovend verleep ouk erg leuk, de spanning zoot d’r nog altied good in…

Wie alle 41 kinder gewaes ware, hebbe weer ein pauze gehad, um alles op ein riej te zette wae d’r beej de ierste dreej zoel e zitte.

Wie dan ’t moment dao waas det de prieze oetgereik woorte, mochte alle 41 kinder baove op de catwalk gaon zitte, ooooooh… WAAT WAAS ’T SPANNEND…..!!!

De jury neumde de winnaers op en krege ein VVV-bón en ein tóf beeldje!

De winnaers van de ónderbouw:

Jans Vaessen van ’t Groeneveld met: Bedtied
Imke Driessen van de Zuidstroom met: Bedtied
Emily Sassen van de St. Willibrordusschoeël met: Bedtied

Middebouw:

Maud Lücker van de Koperwiek met: Plat praote
Kiki Severijns van Sint Martinusschoeël met: Aanlinge
Eefke Koninkxs van de Springbeek met: Aanlinge

Baovebouw:

Quin Schatorié van de Sint Willibrordusschoeël met: Pretpark
Michelle Mulders van de Venlose Montessori Schoeël met: Kaal
Deveny van Cleef van de Venlose Montessori Schoeël met Kaal

De nummers 1 kriege ein oetnuuediging um mei te doon met de Limburgse finale op 16 mei in ’t Patronaat in Heerlen.

We haope det d’r volgend jaor weer hiel óntzettend vuuel kinder zien die mei wille doon.

Tot de volgende kier!

Annemie Schleepen-Schweitzer

Dialekvereiniging Veldeke Venlo

Limburg 2015

De Limburgse declamatiefinale 16 mei 2015 in Heerle…

Met d’n auto zien we hao Heerle gereje, wao dit jaor in ’t Patronaat de jaorlikse Limburgse finale van de delamatie gehalde woord gehalde.

De zaal zoot aafgelaje vol, de finaliste met eur pap en mam, zuskes, breurkes, opa’s en oma’s. Waat ein spanning waas d’r in de zaal, dae waas ech um te snieje…! Van vuuel plaatse in Limburg ware se dao, Weert, Sustere, Stramproy, Kerkraoj, Ech, Remund, Gelaen en neet te vegaete Venlo en Tegele!

Ós kanjers ware d’r bijna allemaol beej…

Hans Jacobs deej dit jaor veur de derde kier de prissentatie en ik kin óg vertelle det hae ’t grandioos haet gedaon, de ganse zaal ging oet zien daak.

D’r waas ein super jury, die bestaond dit jaor oet: Dwayne Horbach van Veldeke kids, Elly Pótgens, Marleen Schmitz, Suzan Seegers en Ton van de Wijngaard, zeej hebbe ’t kei moeilik gehad met jurere, de deilnemerkes ware stok veur stok kei good!

Als iërste waas Zoë Kuijpers oet Tegele aan de beurt, het meus de spits aafbiete met ’t gedich moes in hoes van Leonie v. Hulten-v. Rhee, als derde waas oet Venlo Lichelle Kusters met ’t gedich gelöksvogel van Herman Bors, als veerde kwaam ózzen held oet Tegele, Thijs Rijvers met ’t gedich lache van Susan Janssen, de ganse zaal loog plat van de lach, zoeë wie hae zien gedich declamameerde! Als veertiende waas Jans Vaessen oet Venlo met ’t gedich bedtied van Hans Jacobs en als letste waas Maud Lucker oet Venlo met ’t gedich plat praote van Hans Jacobs.

In de pauze hebbe we meuge genete van ein optreje van Dwayne Horbach, dae zóng twieë leedjes.

Wie alle kinder gewaes ware, hebbe we efkes ein kleine pauze gehad zoeë det de jury kós euverlegge wae beej de beste zou 3 zou kómme…. Det waas ein moelikke klus veur eur.

Oetintelik kwame se met d’n oetslaag… pfieuw.. idderein had de zenuwe in kael!