Tegele

Versjláag Tegelse Declamatiewedsjtriéd Veldeke 2024

Versjláag Tegelse Declamatiewedsjtriéd Veldeke 2024

Met ’t veurjaorswaer wilt ’t dit jaor maar neet vlotte. Maar in de Harmoniezaal in Tegele sjeen de zôn! Dao sjtinge vriedigaovend 19 april maar leefs 22 zunkes te sjtraole oppe buun. Wie klein of groët ze ouch ware, ze wiste de herte van alle aanwezige te verwerme en tegeliékertiéd kiepevel te bezörge. Wat ’n talente! In Tegele hebbe weej ’t gelök euver ‘ne trouwe sjriéversgroep te besjikke en meuge weej geregeld nieje sjriévers verwelkômme. Dao zien weej hiel gruëts op en dankbaar veur. Want sônger sjriévers gen gedichjes en minder kans öm de kinger
enthousias te make vur ôs Tegels dialek.

Nao ’t äopeningswaord van d’n hiër Bas Vissers, a.i. veurzitter van Veldeke Krink Venlo, noom Iris Vercoulen de presentatie euver door idderein welkôm te heite en de jury veur te sjtelle. Dit jaor hadde de dames Angelique Frijdal, Ingrid Dambacher en Ine Holtman de iër, maar ouch de zjwaore taak, öm punte toe te kenne aan alle veurdrachte. Dees dames hebbe meigedaon aan de lets opgeveurde Tegelse Revue in 2007 en drage Tegele en ’t dialek ’n werm hert toe.

De deilnimmende kinger veulde zich gedrage door ‘ne zaal vol met fans: complete femielies, vriendjes en vriendinkes, juffe en meisters van de sjoële, sjriévers en angere belangsjtellende wiste de waeg nao de Harmoniezaal. ’t Waas den ouch al wiéd veur de sjtart bômvol. Geweldig öm det idder jaor wir te zeen. Vur de kinger ’n terechte beloëning, zôn groët applaus. Van kinger die eure knuffel neet wille loslaote toet kinger woëbeej “alles taege zit”, in de gedichjes kwaam ‘t allemaol vurbeej. In de pauze kôs de jury nag efkes de köpkes beejein sjtaeke en ginge ôngertösse de vutjes van de vloer oppe buun en in de zaal. ‘ne Gemingde dansgroep van mini’s en juniore van V.G. d’n Oeles, besjtaonde óet maar leefs 22 sjterre, trakteerde ’t publiek op ‘nen dans op ’t toepasselikke liedje “Doezend Sterre”.

Óeteindelik kwaam toch éch ’t moment van de jury-óetsjláag.
D’n óetsjláag van de Tegelse finale-aovend op 19-4-2024 is as volg:

Ôngerbouw

1e Emma Verlinden met gedich: Miene knuffel van Mariska Reer
2e Djemke Schouwenberg met gedich: Miene knuffel van Mariska Reer
3e Jesper Stapel met gedich: Miene knuffel van Mariska Reer

Middebouw

1e Vayèn Smedts met gedich: De kleuterklas van Mariska Reer
2e Esmee Wijnhoven met gedich: De kleuterklas van Mariska Reer
3e Fenna Burhenne met gedich: De kleuterklas van Mariska Reer

Baovebouw

1e Nikki Krijn met gedich: Alles zit taege van Jack Pelzer
2e Lana Wijnhoven met gedich: Uniek van Hanneke van der Sommen
3e Lynn Helmes met gedich: Gelöksgeveul van Truus Verbong

Proficiat allemaol!

Fotograaf Jos Verbong haet de gansen aovend sjoën foto’s gemak.

Op zaoterdig 25 mei is de Limburgse finale in de Hanenhof in Gelaen. Dao zulle de 1e en 2e priéswinnaers Tegele gaon vertaegewoordige.

Weej danken alle kinger die hebbe meigedaon -vur ôs ziet geej allemaol winnaers- en haope uch volgend jaor wir truuk te zeen. Ouch ein groët “dank je wel” aan alle elders en liërkrachte die de kinger begeleid hebbe in ’t veurtrajek. Weej haopen ouch beej de volgende editie wir op net zoëvuël enthousiasme te meuge raekene. Zet maar veskes oppe klender: vriedig 18 april 2025 öm 19.30 oor is de Tegelse finale van de Declamatiewedsjtriéd van Veldeke in de Harmoniezaal in Tegele!

Werkgroep Tegelse Declamatiewedsjtriéd Veldeke,
Truus Verbong
Nicol Ebus
Susan Janssen

Versjláag Tegelse declamatiewedsjtriéd Veldeke

Versjláag Tegelse declamatiewedsjtriéd Veldeke

Vriedig 21 april ware weej wir te gas beej De Harmoniezaal in Tegele, woë de finale-aovend van de Tegelse declamatiewedsjtriéd van Veldeke plaatsvóng. De zaal sjtruimde al sjnel vaol met deilnimmers, femielies, vrinde, lieërkrachte en angere fans, die door besjteurslid Pieter Ebus woorte welkóm geheite. Daonao noom Iris Vercoulen de microfoon euver öm de kinger te óntvange en ze te begeleide beej ’t declamere van eur versje. Wat ’n fieës öm al die talentjes te zeen! We krege d’r allemaol kriemels van in d’m bóek. Kei sjpannend huuer, öm as deilnimmer vanaaf die hoeëge buun in zónne volle zaal te kiéke met de sjiénwerpers op dien sjnóet. Maar wat zien weej as werkgroep gruuets det ze d’r wir allemaol sjtinge.

In de pauze meugde idderein zich laote verwóngere door de goochelkunste van Hayke Bongaerts en kós idderein efkes lekker lache en óntsjpanne. Det waas vur de jury waal angers, want die hadde de zjwaore taak öm alle declamaties te beóerdeile. Deze kieër hadde we ’n bezónger, prinsesselik dreejtal daotoe bereidgevónge, namelik ’t damestrio van 2023 van VG De Beerpiep: Sandra, Esther en Wendy. Zeej zote zichbaar te geniete en sjtinge naoderhank te popele öm wir ens ’n buun te beklumme en de priésóetsjlaag bekend te make!

D’n óetsjláag van de Tegelse finale-aovend is as volg:

ÓngerbouwMiddebouwBaovebouw
1. Ize Willems1. Siem Stapel1. Lynn Helmes
2. Vayèn Smedts2. Bente Daniels2. Phoebe Hauzer
3. Liza Hanraets3. Isa Berends3. Jayson Daemen

Umroop P&M zal op 18 mei beej Dwars door Limburg beelde laote zeen van ós declamaties. https://www.omroeppenm.nl/dwars-door-limburg

De nummers 1 en 2 zeen we truuk beej de Limburgse finale op 3 juni 2023 in Dok 6, Panninge.

D’n hier Jos Verbong haet foto’s gemak die te zeen zien op de website van Veldeke Venlo https://veldekevenlo.nl/ en op ós eige Facebook pagina: Declamatiewedsjtriéd Veldeke Tegele.

Groeëten dank aan alle deilnimmers, sjriévers, lieërkrachte, aanwezige en idderein dae zich haet ingezatte vur deze sjoënen aovend. As dit enthousiasme zoeë doorgegaeve blief waere, den zien weej nag jaore verzekerd van vuuel verbinding en identiteit binne de Tegelse gemeinsjap.

Werkgroep Tegelse declamatiewedsjtriéd Veldeke,

Truus Verbong, Nicol Ebus en Susan Janssen

Oetsjlaag Tegelse Declamatiewedsjtriéd Veldeke 2022 

Oetsjlaag Tegelse Declamatiewedsjtriéd Veldeke 2022 

’t Waas alwir dreej jaor geleje det de Tegelse declamatiewedsjtriéd – toen nag in ’t Zaelke – had plaatsgevônge. Eindelik waas ’t wir zoë wiéd. Op Gójje Vriedig 15 april 2022, kwame hiel vuël kinger, breurkes, zuskes, elders, opa’s, oma’s, sjriévers en liërkrachte same in de verniejde Harmoniezaal in Tegele. Wat hebbe we wir genaote van zoëvuël minse die ’t Tegels dialek ’n werm hert toedrage. Óndanks get technische mankemente hebbe de kinger kenne sjtraole op de buun. Kinger, van klein toet groët, van verlaege toet get vrejer, met ’n kort of ’n lank versje, ze sjtinge d’r! Nao de äopening van Veldeke-veurzitter Henk Buskes, wis presentatrice Yvonne Rijs alle deilnimmers gerös te sjtelle. Monique Munten, Ruud Munten en Frans Hovens, leje van Optochgroep “Nag Ech Tegels”, hadde as jury de oëre gesjpits öm te luustere of d’r nag ech Tegels woort gesjpraoke. 

In de pauze ginge de vutjes van de vloer en de hendjes opein met de Mini-dansgarde van VG d’n Oeles. 

Weej zien d’r bliéj mei det fotograaf Bart Douben de gansen aovend al det sjoëns haet vasgelag. De foto’s kent geej binnekort zéen op ós eige Facebookpagina Declamatiewedsjtriéd Veldeke Tegele. Volg ós en haaj ós in de gate, want as werkgroep gaon we ós úterste bes doon öm ’t Tegels dialek met get verniejinge laevend(ig) te haje. 

D’n óetsjláag van de finale-aovend is as volg: 

Óngerbouw: 

  1. Jip Hendriks met Wiebele van Linda Hanraets-Weber 
  2. Divainney Schermer met Fruit aete van Truus Verbong-Simons 
  3. Liza Hanraets met Wiebele van Linda Hanraets-Weber 

Middebouw: 

  1. Mischa van Enckevort met De sjnië in van Hanneke Konings 
  2. Max Verlinden met Met pap op sjtap van Leonie v.Hulten- v.Rhee 
  3. Tom Groenewegen van der Weijden met De sjnië in van Hanneke Konings 

Baovebouw: 

  1. Minou van Hees met Ein good idee van Hanneke van der Sommen 
  2. Jikke Thissen met Ein good idee van Hanneke van der Sommen 
  3. Max Smeets met Race oma van Leonie v.Hulten-v.Rhee 

Dit jaor is d’r vanwaege de ónzekere Coronatiéd gen Limburgse finale. 

Ouch volgend jaor haope weej d’r same met uch wir ’n fiësje van te meuge make. 

Bedank allemaol! 
Groetjes,

Names de werkgroep Tegele 
Van dialekvereiniging Veldeke Venlo 

Susan Janssen  
Nicol Ebus 
Truus Verbong 

Gedichte-Tegelse-Declamatiewedsjtried-2022Downloaden
Tegelen 2016

Tegelen 2016

’t Tegels dialek zit ouch beej de jeug in ’t blood.

Vriedig 15 april 2016 waas alwir de 17de Tegelse declamatiewedsjtriéd! Ouch dit jaor deje alle zes de Tegelse basissjoële met. De deilnimmerkes kwame met eur femielie en vrinde beejein in ’t Zaelke öm dao eine leuke aovend te belaeve. Vur-al maedjes en eine gas sjtoere jônges sjtinge op de buun öm eur gedichje te declamere.

De sjriévers van de sjpiksjplinternieje gedichte ware dit jaor, Herman Bors, Linda Hanraets, Leonie van Hulten, Truus Jacobs, Susan Janssen, Hanneke van der Sommen en Truus Verbong. De jury, die besjtông óet 3 leje van Vv. De Kaetelaers (Erik Goossens, Marcel van Heel en Ted Huijbers), had de zjwaore taak öm óet alle talentjes de winnaers de keze! ’t Niveau waas hoëg en ’t was sjoën öm te zeen det ’t Tegels dialek ouch beej de jeug in ’t blood zit. Op nao ’t volgend jaor!

 De winnaers van d’n óngerbouw: 

  1. Gijs Broekman met “Wat ein waer” van Truus Verbong (St. Jozefsjoël) 
  2. Puk Willemsen met “Hinkele” van Leonie v. Hulten (PassePartout) 
  3. Anouk Raijer met “Hinkele” van Leonie v. Hulten (St. Jozefsjoël)

De winnaers van de middebouw: 

  1. Bo Schraven met “Kratspaol” van Truus Jacobs (St. Jozefsjoël) 
  2. Zoë Kuijpers met “Kratspaol” van Truus Jacobs (St. Jozefsjoël) 
  3. Evy Kessels met “Wir nao sjoël” van Truus Jacobs (Het Maasveld) 

De winnaers van de baovebouw:

  1. Sam Hendrikx met “Miene gsm” van Herman Bors (St. Jozefsjoël)
  2. Laura v.d. Wouw met “Miene gsm” van Herman Bors (PassePartout)
  3. Mila Schraven met “Miene gsm” van Herman Bors (St. Jozefsjoël) 

Foto’s van dezen aovend zien gemak door Jos Verbong. Alle nummers 1 meuge eur gedichje nag ens declamere beej de Limburgse finale op zaoterdigmiddig 21 mei in Dok 6 in Panningen.Op de groepsfoto sjtaon de nummers 1, 2 en 3 van iddere laeftiédscategorie.

Tegele 2015

Tegele 2015

Versjláag Tegelse declamatiewedsjtriéd 2015

Op vriedig 17 april 2015 vông in ’t Zaelke in Tegele de 16e Tegelse declamatiewedsjtriéd van Veldeke plaats. Maar leefs dertig kinger trakteerde ‘t publiek en de jury op ‘n geweldige veurdrach van eur gedich in ‘t Tegels dialek, det ze van teveure óet ‘t groëte aanbod, passend beej eure laeftiéd, kôste keze. De sjriévers van dees gedichte ware dit jaor Truus Verbong, Leonie van Hulten, Truus Jacobs, Linda Hanraets, Hanneke van der Sommen, Herman Bors, Leo de Ronde en Susan Janssen. Rônk 19.00 oor sjtruimde de zaal al vaol zoëdet me verzekerd waas van ‘n gôj plaats öm al det sjoëns te kenne zeen en huëre. ‘t Is altiéd wir ‘n fiës öm te zeen wiekleine en groëte kinger zich ein versje hebbe eige gemak en wie ze dit met vuël flair aan ‘t publiek presentere. Eine blik in ‘t publiek, det op ‘t puntje van de sjtool zit, is aevel ouch de meujte waerd: alle naze sjtaon dezelfde kank op richting podium en ‘t plezeer sjtraolt d’r vanaaf, hiel gruëts op ‘t (klein)kink det dao op zien eige meneer de show sjtúlt. D’n aovend woort geäopenddoor Veldeke-veurzitter Henk Buskes en Hanneke van der Sommen noom op ‘n vrintelikke en flotte meneer de presentatie vur zien raekening.

De jury besjting dit jaor óet dreej hiëre van “Wie Laater Wie Zaater”, ‘n gezelsjap det van ‘ne vrindegroep is óetgegreujd toet ‘n klöpdie de Tegelse cultuur (met name de vastelaovend) hoëg in ‘t vaandel haet sjtaon. Heejvan is ‘t Tegels dialek netuurlik ‘n belangriék ôngerdeil. Aan eur de lestige taak öm te bepaole wae d’r óeteindelik ging winne. Dit zien de volgende kinger: 

Ôngerbouw:

  1. Tijs Rijvers met ‘t versje “Lache” van Susan Janssen
  2. Meike van Hees met ‘t versje “Ein aepke” van Truus Verbong
  3. Ryan Achten met ‘t versje “Miene sjtep is kwiét” van Leonie van Hulten

Middebouw:

  1. Zoë Kuijpers met ‘t versje “Móes in hóes” van Leonie van Hulten
  2. Laura van der Wouw met ‘t versje “Mien iërste welske” van Truus Jacobs
  3. Bram Nellen met ‘t versje “Móes in hóes” van Leonie van Hulten

Baovebouw:

  1. Lichelle Kusters met ‘t versje “Gelöksvogel” van Herman Bors
  2. Connor Shilton met ‘t versje “Poepzekske” van Herman Bors
  3. Demi Burhenne met ‘t versje “Poepzekske” van Herman Bors

Foto’s van dezen aovend zien gemak door Jos Verbong

Alle nummers 1 meuge eur versje nag ens declamere beej de Limburgse finale op zaoterdigmiddig 16 mei in ’t Patronaat in Haerle.

Finale Tegelse declamatiewedsjtriéd

Finale Tegelse declamatiewedsjtriéd

Dôw hads netuurlik op vriedig 12 april saoves oppe bank kenne ploefe, nao ’n lange sjoël- en werkwaek. Det had gekend, en det hadde we ouch bes waal gesjnap. Ware ’t neet desse den de finale van de 20e Tegelse declamatiewedsjtriéd van Veldeke in ’t Zaelke hads gemis. En den hadse toch waal éch get gemis. Want wat waas ’t wir leuk! Al öm 19.00 oor ware d’r complete femielies die zich van ‘ne sjtool wôlle verzekere. Drek kôsse de energie in de zaal veule. Kinger die zich fijn hadde gemak en publiek wat zin had in ’n äovendje vermaak in ’t Tegels dialek. 

Nao d’n aaftrap van Veldekeveurzitter Henk Buskes, noom Hanneke van der Sommen de microfoon euver vur zien frisse en rösgaevende presentatie. Want gank dao maar ens sjtaon op zôn groëte buun. Van króekesjtöpke toet herfshaan, ’t waas d’r allemaol. Versjes euver vriendjes, mundjes, de vot naodrage, prinses zien, nao de middelbare sjoël gaon, ’t kwaam allemaol vurbeej. Jos Verbong haet ze allemaol op de foto gezatte. Die kent geej binnekort zeen op www.veldeke-krink-venlo.nl

Aan de jury, besjtaonde óet Ans Houba, Marian Geurts en Monique Benders, de has ônmeugelikke taak öm óet al det Tegels talent ‘ne gas winnaers te keze. Gelökkig kôste ze efkes röstig in euverleg gaon, want ter iëre van ôs jubileumjaor hadde we ’n sjpetterend optraeje van de mini dansgarde van d’n Oeles. En wat zölle d’r vanóet ’t verleje in ’t Zaelke al vuël danspeskes zien gemak!

De priéswinnaers:

OB

  1. Emmeline Verweij met ‘Wat ich later waere wil’ van Linda Hanraets (Sint Jozef)
  2. Lynn Helmes met ‘Ein mundje’ van Susan Janssen (De Schalm)
  3. Jinte Westerhof met ‘Ein mundje’ van Susan Janssen (De Schalm)

MB

  1. Sander Idink met ‘Sjpeibele’ van Herman Bors (Het Maasveld)
  2. Frederique Gubbels met ‘Ich bön d’r klaor mei’ van Linda Hanraets (De Schalm)
  3. Anouk Raijer met ‘Ich bön d’r klaor mei’ van Linda Hanraets (Sint Jozef)

BB

  1. Laura Lynn Peters met ‘Mien vriendje’ van Leo de Ronde (De Schalm)
  2. Saskia van Horck met ‘Mien vriendje’ van Leo de Ronde (PassePartout)
  3. Tijs Rijvers met ‘Mien planning’ van Hanneke v.d. Sommen (Sint Jozef)

De nummers 1 zeen we op 25 mei wir truuk beej de Limburgse finale, in Dok6 in Panningen.

Ein groët applaus en ein hiéle depe buiging vur álle deilnimmers!

Susan Janssen 

Kiek heej veur de foto’s

De winnende gedichte van de 1e priéswinnaers:

Wat ich later waere wil

Ouch al bön ich pas zes
Ich weit zeker ich waer prinses
Neet zoë ein óet de keuke
Want det ving ich gen leuke

Maar ein met fijne krolle en ein kesjtiël
Koets en ein paerd, gans in sjtiël
Kruënke oppe kop, en maar commandere
Ich gaon euver idderein regere

Bring mich cola en ein bietje sjlôk
Want ich heb heej ’t kruënke oppe kop
En den zaet mam: Jônge dame, wat tunk dich 
Haaj dôw ens gauw op! Ich sjrik en sjtop

Want ouch al bön ich prinses
En wil ich alles nao miene zin
Nao mien mam môt ich loestere
Want die is de keunegin!

Linda Hanraets-Weber

Sjpeibele

Vurrige waek had ich efkes gen zin in sjoël
Einen dáag in bed leek mich net zoë cool
Dus reep ich: mam, mien bed is gans voël
Det kump minstes van gister van dae sjpitskoël

Mien moder reep: ich gluif dich vur genne maeter
En pap dae vroog: wat haet d’r?
Mam kwaam effe later met de thermomaeter
As dae 37 grade aanguëf men-ke, den bös dôw baeter

Sjnel heb ich de thermomaeter oppe verwerming gelag
En ich had mich in de gauwigheid ouch bedach
Öm ein sjtök gesjmolte sjeklaad in mien ôngerbôks te sjtoppe
Den zôl det verhaol van dae sjpitskoël hielemaol kloppe

Met 39,5 meugde ich daen dáag lekker thóes bliéve, hoi hoi
De meisten tiéd heb ich doorgebrach met miene gameboy
En toen ich de volgende dáag wir vur de sjoëldeur sjtông
Zag mien juf: En, geit ’t wir jông?

Herman Bors

Mien vriendje

Mien vriendje is neet van heej, hae kump van wiéd-e-weg
Van woë hae neet kôs bliéve, hae môs vluchte, dao waas ’t sjlech
Zien hóes, zien sjpeulgood, alles kepot
Det ving ich zielig, det ving ich rot

Hae kwaam heej en kôs nemes versjtaon
Alles ging met gebare
Wis neet woë hae haer môs gaon
Iërs dôch ich: “wat ‘ne rare “

Toch sjprik hae nôw ôs dialek
Al is ’t soms gebrekkig
Nag neet hielemaol perfek
Maar hae is wir gelökkig