Jaorvergadering

1. Äöpening door de veurzitter.

Gojen aovend dames en hiere. Welkóm op ós Algemeine Lejevergadering van Veldeke Venlo op 18 april 2019 heej in dit schoeëne ónderkómme van ’t Akkermansgilde.

2. Verslaag van de Algemeine Lejevergadering van 11 april 2018.

Veurzitter Henk Buskes merk op det d’r op de vurrige jaorvergadering jaomer genóg genne microfoon waas, maar dit jaor gelökkig waal. Vaerder löp Henk Buskes de notule van ’t vurrig jaor door. Róndvraog:

Frans van de Rijdt vruueg of de deilnemers aan de cursus Venloos laeze en schrieve ouk 1 jaor lang gratis lid zien. Dit is inderdaad ‘t geval en haet ós óngevier 7 nieje leje opgeleverd. Frans van de Rijdt vindt ‘t wiechtig det d’r minse beejkómme. Hae vruueg ouk of d’r ‘n koppeling is tösse de Heemkundige krink Tegele en Veldeke Venlo. Henk vermeldt det de Heemkundige krink de Kroedwis al krieg taege betaling en det de meiste minse ’t te vuuel vinde um beej twieë vereiniginge contributie te betale. Frans van de Rijdt vruueg vaerder of d’r ein jeug- Veldeke kin óntstaon. Henk Buskes vermeldt det weej heejmei bezig zien. Frans vruueg ouk nog of d’r nog waat gedaon wuurt met ‘n jeugjury beej de declamatiewedstriede. Dit is neet beej ós bekind. Diana Vullings geit dit bespraeke in de declamatiewerkgroep. Ine Bleijs: De Slumste Venlonaer is zónder mier ’ne fantastische kwante quiz dae neet verlaore meug gaon. Aevel de kins det gennen taalwedstried neume. Is ’t daorum meschiens ’n idee um ouk iets in d’n trant van ‘ne taalwedstried te organise? Diana Vullings en Anneke van Kleef neme dit mei. Niks mier aan de orde ziende, bedank Henk Buskes de notuliste veur de notule van 2018.

3. Bestuursverkezing.

Aaftraejend zien Wilma Janssen en Anneke van Kleef. Zeej stelle zich weer herkeesbaar. Wiel Maassen waas ein jaor aspirant-bestuurslid en ‘t bestuur stelt veur um Wiel Maassen as bestuurslid te beneume. Anneke van Kleef, Wilma Janssen en Wiel Maassen waere ónder hard applaus geaccordeerd. Ouk vermeldt Henk Buskes det Sjoerd van den Nieuwenhof de nieje webmeister is en det Marc Overdevest de Kroedwis vorm geit gaeve.

4. ’t Jaorverslaag van de Sikkertaris.

Anneke van Kleef luues ’t jaorverslaag veur. Kiek in de beejlage.

5. Jaorciefers 2018 en de begruueting 2019 met oetleg door de penningefoekser.

Vanwaege aafwezigheid van Martin Doesborg neemp Wiel Maassen dit op zich. Wiel leet de ciefers netjes allemaol oet. Tösse de begruueting van d’n Oeuvrepries en de oetgaves is ‘n groeët verschil. Henk Buskes leet oet det Gé Reinders ‘n optraeje haet gegaeve in de Maaspoort en Veldeke haet heej ‘n eige beejdrage aan geleverd. Ton in ’t Zandt vruueg euver de koste van de Limburgse jeugdeclamatie. Dit betaalt Veldeke Limburg. De inkómste van Veldeke Limburg zien groeëter. Dit kump door ’t stimuleringsfonds van Veldeke Limburg. Weej perbere neteurlik veur officiële aevenemente waat geld los te kriege. Ine Bleijs vruueg wat ‘’de beuk’’ inhelt. Dit betref de kaokbeuk en waat andere bukskes. Dees zien aafgeschreve. Ton in’t Zandt zaet det ’t aantal leje neet mier klop. Dit wuurt op de site aangepas. Wiel vertelt ouk efkes euver ’t aantal leje. Vaerder zien d’r gen vraoge mier en is alles dudelik. Ónder dank aan de samesteller.

6. Verslaag van de kascóntrolekemissie.

Dit verslaag is van Wiel Maassen en Tiny Driessen en beneuming van de nieje kascóntrolekemissie. Tiny Driessen neemp ’t waord en luues ’t verslaag veur. Zeej verlieëne de penningefoekser decharge. (kiek in de beejlage) ‘t 2e Kaskemissielid wuurt Frans van de Rijdt. ‘t Bestuur bedank de kaskemmissie veur euren inbring.

7. Bestuursmeideilinge

Op waeg nao Kersmis geit dit jaor neet lökke vanwaege de aafnemende belangstelling en ’t feit det d’r vuuel aevenemente in december zien. Waat betref de lejewerfactie: ‘t Bestuur haet beej ein gezaete. Henk Buskes wilt efkes waat beneume: Naamsbekindheid, ‘n niej logo en dao kinbaarheid aan gaeve. Nieje activiteite o.a. ‘ne fietstoch, wandeltoch. Waat betref de lejewerving \oel aan alle doelgroepe, minse ‘n gadget aangebaoje kinne waere. Korting, vrind of vrindin van Veldeke waere, dit is allemaol aan de orde gewaes. D’n hier Thei Laemers wilt waal ‘ne fietstoch oetzette, veur idderein, ouk met ‘nen E-bike.

8. Veuroet kieke op 2019.

Henk Buskes neemp de agenda van 2019 door. Beej de declamatiewedstriede zoele weej reclame kinne make ónder de toeschouwers um lid te waere. Henk Buskes vermeldt efkes det weej nao minse zeuke die met ós meidinke, weej hebbe beejveurbeeld ‘n facebookpagina. Piet Steunenberg zaet det hae ‘t discriminerend vindt veur minse zónder computer, of weej heej aan wille dinke. Is d’r veur de kinder ouk ‘ne Slumste Venlonaer? Nae, meschiens iets um euver nao te dinke. Beej “De Slumste Venlonaer” kinne ouk neet-leje mei doon.

9. Róndvraog.

D’n hier Laemers haet ‘n meideiling: Weej zien bezig met ‘n film te make. ’t Archief van Venlo mak dees film. Hae en 2 dames zien heej mei bezig. In ’t Venloos of Nederlands? De film wuurt gemak in ’t Venloos!

Oktober – november – december 1944. D’n hier Laemers hilt ós op de huuegte.

Wil vd Laar: ’t Limburgs is ‘n hot item beej de Euverheid. Dit is ’t zeker. Weej wille dit zeker op gaon pakke, weej hebbe dit ouk al behandeld. Ouk met ’t SOB is ’t bestuur in ónderhandeling.

Tiny Driessen: in de ‘’Kóm ens veur’’ steit gen locatie vermeld beej de activiteite. Op de website waal, maar neet in de Kroedwis. Dit wuurt aangepas. Piet Steunenberg: Of d’r met zien idee (kaarte) al waat is gedaon? Dit is waal aangehaold.

Ton in t Zandt vruueg of de veurstelle oet de enquête ouk opgepak waere. Weej hebbe dit bespraoke. Beej de lejewerfactie hebbe weej dees punte ouk mei genaome. Ton in ’t Zandt zoel dit gaer in de Kroedwis zeen. Weej neme dit mei nao ’t bestuur.

Wievuuel pagina’s haet de Kroedwis? vruueg Wil vd Laar. Vraog ouk adverteerders,met dees inkómste kin ‘t blaad zich zelf bedruipe. Weej bespraeke dit ’ne kier met de Kroedwisredactie.

Frans van de Rijdt haolt aan det d’r ‘nne haop kaokbeuk zien verkoch. Meschiens is ‘t leuk ‘ne kaokmiddaag veur leje en potentiele leje te organisere. Weej neme dit ouk mei.

Henk Geenen: De aanmeldpagina op de website klop neet hielemaol. Wilma Janssen neemp dit mei en geit dit probleem prettig oplosse.

10. Sloeting.

Henk Buskes bedank idderein veur de aanwezigheid en guuef waat oetleg euver ’t Akkermansgilde, waovan weej zoeë ‘n prissentatie te zeen kriege door d’n hier Bert Kok.

Notuliste

Anneke van Kleef

Juni 2019.

• 

• 

• 

1. Äöpening door de veurzitter d’n hier Henk Buskes:Van herte welkóm, Henk leet oet det d’r jaomer genóg genne microfoon beschikbaar is. Welkóm op dees algemeine lejevergadering. Oet de, ónder de leje gehalde, enquête bleek det de meiste minse ‘nen doordewaeksen daag plezeriger vónde en de vergadering wuurt noow dus gehalde beej “Beej Benders”. De aanwezige hebbe iers ‘n rondleiding gehad beej “Beej Benders”, die erg intersant waas.
2. Verslaag van de Algemeine Lejevergadering van 9 april 2017:Zien d’r vaerder aan- of opmerkinge? D’r zien gen aan- of opmerkinge en de notule waere ónder dank aangenaomeBestuursverkezing:
3. Aaftraejend zien Wiel van Aarssen en Martin Doesborg. De hiere stelle zich weer herkeesbaar.Zeej waere ónder luud  applaus aangenaome. Ouk Wiel Maassen wuurt veurgesteld as aspirant lid en de veurzitter leet aan de vergadering oet det hae ein jaor mei geit dreie mit ‘t bestuur.       
4. ’t Jaorverslaag van de sikkertaris:Umdet d’r genne microfoon waas, haet bestuurslid Bas Vissers dit veurgelaeze, waat hae veurtreffelik deej.
5. Jaorciefers 2017 en de begruueting 2018 mit oetleg door de penningefoekser:De ciefers waere geprojecteerd met d’n beamer en ózze penningefoekser Martin Doesborg leet alles oet. D’n hier Hermans: ‘t Aantal opzegginge is erg groeët. Martin leet oet det de gemiddelde laeftied erg hoeëg is en det dit de neteurlike aafvloejing is.Verslaag van de kascóntrolekemissie en beneuming van de nieje kemissie: De kascóntrolekemissie besteit oet d’n hier Wiel Maassen en mevrouw Ria Hermans. Zeej zien op  17 jannewari 2018 beej Martin gewaes. Wiel neump nog efkes alles op en guuef aan det alles klopde en guuef de penningefoekser dechargeDe veurzitter vruueg veur ‘n nieje kaskemissie en lid Tiny Driessen guuef zich op. Tiny Driessen geit same met Wiel Maassen volgend jaor de stökke cóntrolere. Ouk leet Henk Buskes oet det Wiel Maassen waarschienlik in ‘t bestuur kump, maar det hae tot op det moment nog gen officieel bestuurslid isVeuroet kieke op 2018: Henk guuef verslaag van d’n agenda veur 2018.Ria vruueg of d’r neet mier activiteite zien in de zomer. Nae, jaomer genóg nog neet. Maar  weej zien d’r waal veur aan ’t kieke.

Róndvraog. Ine Bleijs: In de notule wuurt de Slumste Venlonaer ‘nen taalwedstried geneump. Ine Bleijs vindt dit dus gaar neet. Weej neme dit mei.Cursus Venlo.D’n hier Hermans vruueg veur ‘n kedobón um eventueel aan te beje. Henk vermeldt det dit waal kin, ouk eventueel veur ‘n lidmaatschap. Dit wuurt meigenaome in ’n bestuursvergadering.Frans van de Rijdt vruueg of aan de cursiste meschiens 1 jaor gratis lidmaatschap aangebaoje kin waere. Dit neme weej mei. Pieter zag det dit akkoord is vanoet Veldeke Limburg.Lei Geraards:  Is ’t waat um Kroedwisse te gaon verkoupe? Ouk bv aan de Heemkundevereiniginge. De Kroedwis en d’n bookhandel?  Verkoup? Meschiens beej de Bieb ‘n paar neerlegge. De wachkamers beej d’n tandarts etc. Ouk dit wuurt meigenaome.  Ria Hermans haet ’n opmerking euver de Venlose scheurkelender. Deze wuurt neet door ós gemak.Frans van de Rijdt vruueg of d’r ‘n koppeling meugelik is tösse Veldeke en de Heemkunde. Henk neemp dit mei.D’n hier Hermans: wao plaats geej de activiteite? Henk vertelt det Facebook op dit moment groeët is. Ze staon ouk op de website.Ger Sternheim: Verjónging, dao mót geej aan gaon werke. Det klop. ’t Blief lastig um jónge minse beej de club te kriege.  Henk vertelt wie ze um vroge. Ouk hae waas van meining det ’t ‘n “alde clubke” waas.Ein veurdeil”: De jónge minse waere ouk ald.Mevr. Hermans vruueg of weej neet actiever  kinne zien met lejewerving? Weej neme dit ouk mei, meschiens met declamatie, Nach van ’t Limburgse Leed etc.Frans waas aafgeloupe maondaag beej de veurrónde van de declamatie gewaes. De kinder deje ’t fantastisch. Maar hae vónd ’t aantal erg weinig, ouk in de finale. Dit haet ózzen aandach. Meschiens is ’t waat um de kinder ‘n programma (Veldeke veur jóngere) m.b.t. Dialek, gedichte en andere aktiviteite aan te beje.Piet Steunenberg: de bieb in Tegele wuurt verplaats. Meschiens kin Veldeke beej de äöpening gepromoot waere.Martin luuet efkes de Veldeke-website zeen en waat d’r allemaol kin.  ’t Veugelke op de website is ’t veugelke van Sintermerte, d’n iesvogel.Anbi: Veldeke is ‘n algemein nut beogende instelling. Volges de belastingdeens kin ’n schinking aan ein anbi vereiniging aafgetrokke waere van de belasting.Op de website steit ouk de begruueting. Dit is verplich veur ’n anbi-vereiniging. De ciefers mótte aopenbaar zien. Martin luuet zeen waat d’r allemaol op de site steit, ouk de geschiedenis.De website hebbe weej zoeë mekkelik meugelik opgezatte. Martin haet heej vuuel werk aan gedaon. Ouk Facebook wuurt vuuel bekeke.Sloeting.Henk bedank veur d’n opkóms.  

Herteliken dank aan Beeh Benders veur de gasvreejheid. En veur strakkes good thoes. DANKEWAAL.Notuliste Anneke van Kleef.

1. Äöpening door de veurzitter,  Henk Buskes: Gojen daag allemaol. Schoeën det geej ziet gekómme met dit moeëje waer. D’r zien inkele aafmeldinge, te weite:Mevr. J. Stockbroexckx. Dhr. en mevr. Kuijpers. Dhr. en mevr. Zanders. Mevr J.Alsters. Veldeke Krink Venlo besteit dit jaor 70 jaor is ouk d’n aldste krink van Veldeke Limburg. De redaksie van de Kroedwis haet daorum ouk ‘ne jubileum-Kroedwis gemak. De kroedwis besteit dit jaor 35 jaor (applaus van de vergadering).
2. Notule van de Algemeine Lejevergadering van vurrig jaor: Gen aan- of opmerkinge en sie waere ónder dank aangenaome.
3. Bestuursverkezing: Aaftraejend is Diana Vullings. Diana stelt zich ouk weer herkeesbaar en wuurt, ónder applaus, weer aangenaome. Annemie Schleepen haet te kinne gegaeve te stoppe met ’t bestuur en zich gans te gaeve veur de declamatie. Ónder applaus krieg Annemie ouk ein bedankje van de vergadering. Bas Vissers wuurt veurgedrage aan de ALV um ’t bestuur te kómme versterke. Ouk Bas wuurt, ónder applaus en hand opstaeke, aangenaome. Bas verzörg op dit moment de cursus Venloos. Henk Buskes vertelt vaerder det Frans v.d.Rijdt geit stoppe waeges gezóndheidsraeje. Mier as 10 jaor haet Frans ’t bestuur versterk, maar zal zeker nog nauw betrokke waere en op de achtergrónd mei dreie. Frans bedank! Ouk dit geit met applaus. ’t Bestuur haet Frans bedank met ’n aetbón.
4. ’t Jaorverslaag van de sikkertaris: Anneke van Kleef luues ’t verslaag veur. D’r zien 2 vraoge: Wie geit ’t met de verkoup van ’t waordebook ? ‘t Geit heej good mei. En is ’t Venloos quizbook ouk van Veldeke? Nae, dit is neet van Veldeke, maar van Paul Seelen.
5. Jaorciefers 2016 en de begruueting 2017: De penningefoekser guuef teks en oetleg heej euver. Heej guuef ouk nog efkes teks en oetleg euver ‘t gebeure “Ode aan Sef Cornet” . D’r zien vaerder gen vraoge en de jaorciefers en begruueting waere ónder dank aangenaome.
6. Controle kaskemissie: De kaskemissie besteit oet: Mevr. Ria Hermans en d’n hier Laemers. Op 24-3-2017, in opdrach van Veldeke Venlo zien de jaorciefers gecontroleerd. De liquide middele 31-12-2016, banksaldo en kas. ‘t Juuste is weergegaeve en daorum wuurt decharge verlieënd aan ’t besteur. Maar de kaskemissie haet nog 1 opmerking: ’t saldo van ‘t “Sef Cornet” gebeure vónde zeej aan de lieëge kant. D’r Waas totaal gen wins met 4 oetverkochde veurstellinge. Henk Buskes leet oet det ouk de Maaspoort geld kos en de verkoup van de kaarte op zich haet genaome. Leech, heur Maaspoort ect kos ouk de nuuedige cente en zoeë haet de Maaspoort toch zien steinke beejgedrage. D’n hier Laemers zit noow twieë jaor en Henk Buskes vruueg de vergadering wae zich beschikbaar wilt stelle veur de kaskemissie. Jaomer genóg stik nemes de vinger op en Martin Doesborg geit zelf emes benadere.
7. Veuroet kieke op 2017: Dao kint geej de agenda veur 2017 veur naokieke.
8. Róndvraog: Mevr. V.d. Berg vruueg of Palmhöltjes via Veldeke geit. Henk antwaort det dit ein gebeure is van de Gemeinte Venlo, ‘t Kindercomité. D’n hier Schreurs vruueg waorum Theetied neet door is gegaon. Henk antwaort: umdet d’r te weinig aanmeldinge ware en ’t neet rendabel waas um dit door te laote gaon. Dit waas erg jaomer umdet d’r ouk goje artieste ware. Of dit nog eine kier door geit, weite weej op dit moment neet. Mevr. Schreurs vruueg wannier de declamaties zien begós in Venlo. Diana Vullings antwaort det het dit in ein stök in de jubileum-Kroedwis haet geschreve en ’t wuurt efkes naogekeke. Zeej zien begós in 1972, dus 45 jaor al. Top prestatie.  Henk Buskes vruueg de vergadering of de volgende vergadering lever s’aoves wuurt gehalde of toch op ‘ne zóndaag. Beej handopstaeke lever door de week op ‘nen aovend.
9. Sloeting: Niks mier aan de orde ziende sluut de veurzitter de vergadering en bedank idderein veur de aanwezigheid.

• Sef Derkx hilt ’n moeëje en interessante prissentatie euver de Venlose beerbrouwerieë. Bedank Sef !

1.Äöpening door de veurzitter d’n hier Henk Buskes

Idderein van herte welkóm op de algemeine lejevergadering van Dialekvereiniging Veldeke Venlo. De opkóms is enorm en nao de vergadering verzörg ’t Schötteriemuseum ’n róndleiding heej in dit moeëj museum.

2.Notule van de algemeine lejevergadering van 15 maart 2015:

Op ’t scherm kómme de notule te veurschien en Henk Buskes guuef teks en oetleg. Hae löp alle puntjes nog efkes nao. Veldeke Limburg besteit dit jaor 90 jaor en iddere krink organiseert waat. Hae kump heej later nog op truuk. Op de vraog of d’r op- en of aanmerkinge zien, wuurt heej gen gebroek van gemak. Ónder dank aan de samesteller, waere de notule goodgekeurd.

3.Besteursverkezing. Aaftraejend is Henk Buskes. Hae stelt zich weer herkeesbaar:

Frans v.d.Rijdt neemp ’t waord euver. In zien waord roemp hae de werkzaamheje van de veurzitter. Noeëts is iets te vuuel, ouk is hae intösse bestuurslid gewaore van Veldeke Limburg. Frans vruueg dan ouk aan de jaorvergadering, beej hand opstaeke, of Henk Buskes weer as veurzitter aan de slaag meug. Ónder groeët applaus en beej hand opstaeke goodgekeurd. Henk Buskes neemp ’t waord weer euver. Hae bedank de vergadering, de werkzaamheje veur Veldeke haet hae altied mit vuuel plezeer gedaon. Ouk zien nieje werkzaamheje beej Veldeke Limburg zulle ein veurdeil zien veur krink Venlo.

4.Jaorverslaag.

Dit steit op ’t thoesblaad en noow ouk op ’t scherm: Anneke van Kleef luues ’t verslaag veur. Alle evenemente waere efkes beneump.

5.Jaorciefers 2015 en de begruueting 2016 met oetleg door de penningefoekser:

Martin Doesborg neemp de ciefers door en guuef dao, wao nuuedig, efkes teks en oetleg. De € 700,00 van de provincie is veur de declamatiewedstried. Op dit moment zien weej nog waal gezónd, maar mótte d’r op toe zeen det dit good blief gaon, anders zien weej genoeëdzaak iets te gaon schrappe. Martin guuef teks en oetleg euver ’t lejebestand.  Te kort € 1.500,00, in de loup der jaore. Meschiens mótte weej toch iets gaon schrappe. As d’r gen vraoge mier zien, waere de jaorciefers en de begruueting, ónder dank aan Martin Doesborg, goodgekeurd.

6.Verslaag van de kaskóntrolekemmissie en de beneuming van de nieje kemissie:

Kaskóntroleurs Thei Laemers en Wiel Janssen hebbe de kas gekóntroleerd beej de Paerdskoel in Blierick. Thei Laemers neemp ’t waord: Weej hebbe de kas gekóntroleerd op 18 maart 2016 euver de geldzake van 2015. De liquide middele stumme euverein met de banke. De oetgaves zien oké. Heejbeej wuurt décharge verlieënd aan de penningefoekser, ónder groeët applaus. Thei Laemers haet nog ein toevoging: Weej meuge gruuets zien op deze penningefoekser. Thei Laemers blief nog ein jaor zitting neme in de kaskóntrolekemmissie en mevrouw Ria Hermans wilt de volgende kier controlere..

7.Veuroetblik op 2016:

D’n agenda steit beej ós op ’t thoesblaad. Henk guuef teks en oetleg beej de evenemente die Veldeke dit jaor geit organisere. Beej ’t Sef Cornet gebeure guuef hae waat extra oetleg: Veldeke Venlo brink in ‘t jaor van de Limburgse dialecte ein “Ode aan Sef Cornet”. Sef Cornet is de vader van “De Venlose Revue” en haet ’n belangrieke beejdrage geleverd aan de Venlose volkscultuur. Hae makde van 1913 wies 1950 furore met ruum twintig revues, cabarets en variété veurstellinge. Same met zien broor Matthieu schreef hae de

tekste en de leedjes. Nao zien acteerdebuut in ’t “Groot Cabaret” in 1913, woort hae flot de spil van vuuel veurstellinge. Met weinig kós hae ‘ne zaal laote schatere. Sef waas amusant, ziene flauweköl plekde aan ’t geheuge van zien publiek. Nao zien sterve in 1953 is hae jaomer genóg in de vergaetelheid geraak. Dialekvereiniging Veldeke Venlo bringk ‘m weer ónder d’n aandach met ’n “Ode aan Sef Cornet”. In

de nao-oorlogse revues hebbe o.a. Annie Renkien, Sjraar Peetjens en Jan van Hoften geacteerd. Geanimeerd spraeke zeej noow nog over de gloriedaag van dees meistal oetverkochde veurstellinge. Ine Engels-Cornet, dochter van Sef, haet gelökkig vuuel tekste, waovan

sómmige handgeschreve, bewaard.

De veurstelling die geej got zeen is ‘ne greep oet de tekste van Sef en Matthieu Cornet. Frans Boermans jr., Wim Naus en Sef Peeters hebbe ’n selectie gemak oet ’t vuuele materiaal. Inkele Venlose acteurs laote same met regisseur Marnix Mulder de revues van Sef Cornet herlaeve.  D’r óntstaon inkele issues euver de kaartverkoup. Minse zien bang det de kaarthalders alles wegkape en veur de leje niks euverblief. D’r is op dit moment gen veurrang veur leje, dit alles löp via de Maaspaort mit eur regels. Deze laeftiedsgroep geit ouk meistal rónd dezen tied op verkansie. Geopperd wuurt det ze euveral kins internette. Sef Peeters vruueg of dit meschiens met veurinschrieving kin plaats vinde veur Veldekeleje. Henk Buskes luuet de leje weite det weej dit meineme nao de iers volgendebesteursvergadering en dit gaon bespraeke. Ria Hermans vruueg of de leje nao de generale repetitie meuge kómme? De SOB duit dit dökker. Ouk dit wuurt mei genaome. Dit is ein punt veur de volgende besteursvergadering en weej laote ’t de leje zoeë flot meugelik weite. Ger Sternheim vruueg of d’r eine gewoeëne kaartverkoup is. Nae alles via de Maaspaort. Andere kaarte via de verkoupadresse (theetied enz.) De leje hove neet bang te zien. Veldeke haet gaer volle zale en zal perbere gen leje te weigere. Gevraog wuurt of de Ode aan Sef Cornet meschiens in de groeëte zaal kin. Det geit jaomer genóg neet, umdet dergelike tenielstökke baeter oetkómme in de kleine zale en ouk de aankleiing gen kapitale hoof te koste. D’r zien nog inkele opties genaome beej de Maaspaort veur 4 veurstellinge. Dus moch ’t zoeë flot gaon, kinne weej nog altied, in euverleg, nao de andere data kieke.

8.Róndvraog:

Ger Sternheim vruueg waorum d’r 2 tiedstippe ware. Henk Buskes antwaort det dees vraog terech is en jaomer genóg is dit gebeurd. Heej veur ós excuses.

Herman Wiermans vruueg of d’r nog ein niej waordebook kump. Henk Buskes guuef teks en oetleg. Dit is erg vuuel werk Frans v.d.Rijdt en zien dochter zien noow aan de letste kóntroles aan ‘t werke. Dus Veldeke is heejmei drök doonde en weej gaeve zoeë flot meugelik oetsloetsel. Martin Doesborg guuef aan det zeej mit 2 spellinge te make hebbe. Dink maar aan pannenkoek/pannekoek. De vreejwilligers zitte elke waek achter de computer um te werke aan dit waordebook.

Truus Verbong guuef aan det ’t neet Schötterie is maar Sjötterie is.

9.Sloeting:

Niks mier aan de orde ziende bedank Henk Buskes de vergadering veur euren inbring en dank idderein veur de groeëte opkóms en dhr. Luc Wolters neemp ’t noow euver um ’t ein en ander te vertelle euver dit museum.

Notuliste: Anneke van Kleef.