Verslaag van de kwis “de Slumste Venlonaer” 2024

Op zóndaag 27 oktober 2024 woort in Feeszaal “’t Tref” in Venlo-Zuud de jaorlikse kwismiddag gehalde um d’n titel “de Slumste Venlonaer van 2024”. Deze middag woort veur de 25^e kier georganiseert door Dialekvereiniging Veldeke Venlo. De kwis waas veur de 25^e (en ziene letste) kier oetgedach en geprissenteerd door Hans Jacobs.

Volgend jaor wilt hae gaer in de zaal zitte en dan zelf ouk meidoon. Hae haop dan ouk neet mit de “poedelpries” nao hoes te mótte gaon. Veur deze kwis hadde zich 27 koppels aangemeld. Vuuel deilnemers doon al jaore mei aan de kwis.

Tien en Fried van Feeszaal ’t Tref hadde de zaal al weer moeëj aangekleid en ingedeild. De deilnemers dröppelde binne en nome eur plaatse achter de taofels in. Nao ein welkómswaord door d’n opperspraekstalmeister Wiel van Aarssen, woort wethalder Jacques Smeets aan de zaal veurgesteld. D’n hier Smeets begós, op verzeuk van Hans Jacobs, aan de ierste serie vraoge. En waal euver de politiek in Venlo. De köpkes van de deilnemers hoors se krake in de zaal. Dao nao ging de wethalder zelf meidoon. Achteraaf vond hae ’t hiel gezellig en lierzaam en wilt ’t volgend jaor ouk weer mei doon.

Wethalder Smeets noom deil aan de kwis ónder ’t genot van ein glaeske beer.

Ouk Cock Ooms en Dick Evers kwame vraoge stelle aan de deilnemende koppels. Nao 5 vraoge-róndes woort ein korte pauze ingelas. Nao de pauze meuste de deilnemers nog ens 5 spelróndes speule. Marcel Hoogenhuis kwam de deilnemers teste op eur kinnis van de 2^e waereldoorlog. In de letste spelrónde meus ein deil van de deilnemende koppels tegeliek 5 verscheie leedjes zinge. Waat ein kakofonie waas det. Neet um aan te Hure! De jury (Diana, Martin, Wil en Frans) ging aan ’t telle um tot einen oetslaag te kómme. En dae woort door Hans Jacobs geprissenteerd. De gansen oetslaag steit heejónder.

De poedelpries woort gewónne door ’t koppel “de Däölkes”. De 4^e pries ging nao “Festina Lente”. Zeej krege ’t book euver ‘t 100 jäörig bestaon van Feeszaal “’t Tref”.

Henriëtte Bakker (Óngenuujd) ging same met Jos Vullings aan de haol mit d’n 3^e pries.

Harrie Lucker en Niecky van Steenkiste wónne as koppel “Kwanten Trammelant” d’n 2^e pries. Zeej meuge gaon kieke naar de voetbalwedstried VVV taege Emmen.

En zoeë as al jaore gebroekelik ginge pap René en dochter Danee Dings (de Dingskes) mit de ier strieke!

Dit kier waas pap René ’t beste in de ónderlinge stried um d’n titel en meug zich ein jaor lank “de Slumste Venlonaer” neume.

De winnende deilnemers krege, veurdet zeej nao hoes ginge, ’n stóffe rökzekske mit inkele kedootjes oetgereik!

Aan ’t ind van de middaag haet Wiel van Aarssen ederein bedank dae deze middag meuglik haet gemak, veur ziene of euren inzet en daagde de deilnemers oet um volgend jaor ouk weer mei te doon.

Weej make binnekort de datum van “de Slumste Venlonaer 2025” bekind.

Gerard Derkx

Foto’s: Jos Verbong

“Poepediepoep mót oèt” printebook in ’t Venloos

’t Printebook “POEPEDIEPOEP mót oèt” is ’t geschreve en geteikende verhaol euver d’n hónd Poepediepoep. D’n teks is in ’t Venloos en Nederlands en d’r is ouk ’n Duitse versie. Dan hit d’n hónd Kackediekack.

’t Verhaol start in de morge nao ’t opstaon en d’n hónd zien behoefte mót doon. Kinder die ’t verhaol veurgelaeze kriege kinne ’t via de teikeninge volge of de teikeninge zelf ‘laeze’ um ’t verhaol te volge. Daonaeve is ’t veur ederen hóndeigenaer ’n geheugesteuntje waat te doon as d’n hónd gepoep haet.

Louis Tinneveld haet ’t geschreve en de teikeninge zien door Justin Wolters gemak.

De beuk zien vanaaf 1 augustus te bestelle via http://boekenbestellen.nl/boek/poepediepoepmotoetmoetuit

Versjláag Tegelse Declamatiewedsjtriéd Veldeke 2024

Met ’t veurjaorswaer wilt ’t dit jaor maar neet vlotte. Maar in de Harmoniezaal in Tegele sjeen de zôn! Dao sjtinge vriedigaovend 19 april maar leefs 22 zunkes te sjtraole oppe buun. Wie klein of groët ze ouch ware, ze wiste de herte van alle aanwezige te verwerme en tegeliékertiéd kiepevel te bezörge. Wat ’n talente! In Tegele hebbe weej ’t gelök euver ‘ne trouwe sjriéversgroep te besjikke en meuge weej geregeld nieje sjriévers verwelkômme. Dao zien weej hiel gruëts op en dankbaar veur. Want sônger sjriévers gen gedichjes en minder kans öm de kinger
enthousias te make vur ôs Tegels dialek.

Nao ’t äopeningswaord van d’n hiër Bas Vissers, a.i. veurzitter van Veldeke Krink Venlo, noom Iris Vercoulen de presentatie euver door idderein welkôm te heite en de jury veur te sjtelle. Dit jaor hadde de dames Angelique Frijdal, Ingrid Dambacher en Ine Holtman de iër, maar ouch de zjwaore taak, öm punte toe te kenne aan alle veurdrachte. Dees dames hebbe meigedaon aan de lets opgeveurde Tegelse Revue in 2007 en drage Tegele en ’t dialek ’n werm hert toe.

De deilnimmende kinger veulde zich gedrage door ‘ne zaal vol met fans: complete femielies, vriendjes en vriendinkes, juffe en meisters van de sjoële, sjriévers en angere belangsjtellende wiste de waeg nao de Harmoniezaal. ’t Waas den ouch al wiéd veur de sjtart bômvol. Geweldig öm det idder jaor wir te zeen. Vur de kinger ’n terechte beloëning, zôn groët applaus. Van kinger die eure knuffel neet wille loslaote toet kinger woëbeej “alles taege zit”, in de gedichjes kwaam ‘t allemaol vurbeej. In de pauze kôs de jury nag efkes de köpkes beejein sjtaeke en ginge ôngertösse de vutjes van de vloer oppe buun en in de zaal. ‘ne Gemingde dansgroep van mini’s en juniore van V.G. d’n Oeles, besjtaonde óet maar leefs 22 sjterre, trakteerde ’t publiek op ‘nen dans op ’t toepasselikke liedje “Doezend Sterre”.

Óeteindelik kwaam toch éch ’t moment van de jury-óetsjláag.
D’n óetsjláag van de Tegelse finale-aovend op 19-4-2024 is as volg:

Ôngerbouw

1e Emma Verlinden met gedich: Miene knuffel van Mariska Reer
2e Djemke Schouwenberg met gedich: Miene knuffel van Mariska Reer
3e Jesper Stapel met gedich: Miene knuffel van Mariska Reer

Middebouw

1e Vayèn Smedts met gedich: De kleuterklas van Mariska Reer
2e Esmee Wijnhoven met gedich: De kleuterklas van Mariska Reer
3e Fenna Burhenne met gedich: De kleuterklas van Mariska Reer

Baovebouw

1e Nikki Krijn met gedich: Alles zit taege van Jack Pelzer
2e Lana Wijnhoven met gedich: Uniek van Hanneke van der Sommen
3e Lynn Helmes met gedich: Gelöksgeveul van Truus Verbong

Proficiat allemaol!

Fotograaf Jos Verbong haet de gansen aovend sjoën foto’s gemak.

Op zaoterdig 25 mei is de Limburgse finale in de Hanenhof in Gelaen. Dao zulle de 1e en 2e priéswinnaers Tegele gaon vertaegewoordige.

Weej danken alle kinger die hebbe meigedaon -vur ôs ziet geej allemaol winnaers- en haope uch volgend jaor wir truuk te zeen. Ouch ein groët “dank je wel” aan alle elders en liërkrachte die de kinger begeleid hebbe in ’t veurtrajek. Weej haopen ouch beej de volgende editie wir op net zoëvuël enthousiasme te meuge raekene. Zet maar veskes oppe klender: vriedig 18 april 2025 öm 19.30 oor is de Tegelse finale van de Declamatiewedsjtriéd van Veldeke in de Harmoniezaal in Tegele!

Werkgroep Tegelse Declamatiewedsjtriéd Veldeke,
Truus Verbong
Nicol Ebus
Susan Janssen

Nietsbreef april 2024

Venlo, 10 april 2024

Beste leje en dónneteurs van Veldeke Venlo,

Weej wille gaer ef kort de volgende zake ónder óggen aandach bringe,

1. De oetreiking van de Faatsepries zal plaatsvinde op dónderdaag 25 april tiedes de jaorvergadering. Middels dit mailtje rope weej de laureate van Blierick (Hay Goerts) en Venlo (Toën Feyen) op um beej ós jaorverdagering aanwezig te zien, wao zeej de op maot gemakde beeldjes van Marielle Franssen oetgereik kriege. Ouk zien uiteraard alle faatse-juryleje genuued.

2. Daoreuver gespraoke: heb geej óg al aangemeld veur ós Jaorvergadering op dónderdaag 25 april in ’t Ald Weishoes? We beginne um 20.00. Geej ziet as leje en dónneteurs allemaol genuued. ([email protected], aanmelding is verplich: Weej wille namelik gaer weite wievuuel minse d’r kómme, en det vanwaege de kóffie en de flaai!)

Op de jaorvergadering traejt aaf (en is neet herkeesbaar) de veurzitter a.i. Bas Vissers. Hae neemp ouk aafscheid van de vereiniging.

Vaerder zien d’r dreej nieje kandidaat-bestuursleje die weej óg gaer wille veurstelle: Monique van Aarssen, Paul Seelen en Jeannette Velmans.

3. Weej zitte in ’t bestuur dringend verlaege um eine penningmeister. Kint of ziet geej emes dae det waal zoel wille en kinne, meld det dan ouk via ’t mailadres [email protected] of laot ’t aan emes van ós weite op 25 april a.s.

4. Op 28 april a.s. viert de Martinusbasiliek heur ieërste lustrum en wil det oetgebreid viere door van 19 tot en met 28 april allerlei activiteite te organiseren, die veur óg allemaol zier zeker ouk interessant zal zien. ’N Euverzich van al die activteite in dae lustrumperiode vind geej op www.rkvenlo.nl

Names ’t bestuur van Veldeke Venlo,

Bas Vissers, veurzitter a.i.

Jacques van Daelen, secretaris

Dialekvereiniging Veldeke Venlo

Karel van Egmondstraat 130A

5913 CR Venlo

Algemeine lejevergadering op 25 april

Heejbeej nuueje weej alle leje en dónneteurs veur de Algemeine Lejevergadering 2024 van Veldeke Venlo. Dees vergadering wuurt gehalde op dónderdaag 25 april 2024 um 20.00 oor in Stadsherberg Ald Weishoes aan de Groeëte Kerkstraot 31. Vanaaf 19.30 oor steit de kóffie mit flaai veur óg klaor in “De Kapel” van ’t Ald Weishoes.

Veur dees algemeine lejevergadering mót geej óg via de mail [email protected] aanmelde. Zit in ’t ónderwerp van d’n e-mail: aanmelding veur de vergadering van 25 april aanstaonde.

D’n agenda zuut d’r as volg oet:

1. Äöpening door de veurzitter um 20.00 oor.
2. Jaorverslaag van de sikkertaris.
3. Bestuursverkezing.
Aaftraejend zien Bas Vissers as veurzitter a.i en as algemein bestuurslid en Wiel Maassen as bestuurslid.
Eventuele kandidate veur ein bestuursfunctie kinne zich melde beej de sikkertaris.
4. Jaorciefers van 2023 en de begruueting van 2024 mit oetleg door de penningmeister.
5. Verslaag van de kasketrolekemissie.
6. Bestuursmeideilinge.
7. Veuroetkieke op jaor 2024 c.q. agenda 2024.
8. Róndvraog: as geej vraoge heb, gaer veur 22 april via d’n e-mail nao ’t sikkertariaat steure.
9. Sloeting.

’t Ieëwige laeve: Jeanne Alsters

In de Volkskrant van vandaag -23 jannewari- steit ’n artikel van Patrick Meershoek euver Jeanne Alsters. Zeej wuurd beschreve as de “bescheije grande dame en veurvechter van ’t Venloos dialek”.

’t Ganse artikel is heej te laeze.

Faatse 2023

Blierick 19 fibberwari 2023

Nao oetstel van twieë jaor trok d’r weer einen optoch door ’t Wortelepinneriek in Blierick. ’t Waas ‘ne kleurrieke stoet van groepe en wages. Ouk zoot d’r vuuel meziek in en det brach de minse naeve de kant in de juuste stumming. Ouk dit jaor ware d’r weer verschillende faatse die meitrokke. Inkele ware d’r aangemeld maar de meiste springe gewoeën d’n optoch in.

Aan ós de taak um nao aafloup euver de faatse te klasjenere en ‘ne winnaer te bepaole. Op ’t lets ging ‘t oetintelik tösse twieë kreasies en kwame weej beej de winnaer oet: Sjraar Thijssen mit “vreje oetloupeier” dae dit op zaoterdaagmiddaag veur d’n optoch had bedach.

De Veldeke zjury Blierick: Henny, Jos en Wiel.

Venlo, 20 fibberwari 2023

Weej zóchte ’n plaetske naeve de optochroute um ein good zich te hebbe op de faatse die in de groeëten optoch mit zoele trekke. ’t Waer belaofde vuuel en det haopde weej mit ózzen dreje ouk. Weej hadde veuraaf aafgespraoke det weej allein echte faatse zoele beoerdeile en beej oetzóndering, as d’r te weinig faatse mit zoele trekke, nao twieëtalle kieke. Aevel det hoofde neet, d’r ware 17 faatse in d’n optoch en det is toch waal oetzónderlik te neume.

Naodet weej d’n optoch hadde gezeen en Henny mit edere faatse had gespraoke, zien weej beejein gaon zitte um ós keus te kinne make, det waas lang neet gemekkelik. Weej hebbe d’r lang euver geklasjeneerd, want de originaliteit waas geweldig!! Eigelik hadde weej ederein d’n trofee toe wille kinne, aevel det geit neet.

De winnaer is Bart Daemen gewaore mit zien kreatie: “Minsekinder waat ein plaetje”. Bart had de vinylsingles van alle vastelaovesleedjes beejein verzameld en gegroepeerd op ‘ne stek mit beejpassende teks.

De Veldeke zjury Venlo: Frans, Henny en Joep.

Nietsbreef nummer 1 van 2022

D’n 1e nietsbreef van 2022 is verschene en versteurd aan alle leje en dónneteurs van de krink.

Veurwäördje

Beste leje en dónneteurs,

Veur ’t iers dit jaor weer ’ne nietsbreef. Mit ’ne nietsbreef wille weej as bestuur van Veldeke Krink Venlo ós leje en dónnateurs flot op de huuegte bringe van zake die binne ózze krink speule. Vaerder kint geej netuurlik altied veur alle informatie terech op ós web-site en periodiek beej ózze Kroedwis.

De vaerdere ónderwerpe zien de wandeling op 4 september, de wisseling van ’t sikkertariaat, d’n oeuvrepries 2022, de cursus Venloos laeze en schrieve (wao-euver binnekort mier) en ’t organisere van activiteite mit daobeej behurende kemissies.

De ganse nietsbreef vind ge heej.

Website van Veldeke Krink Venlo in ’n niej jeske

Tiedes de jaorvergadering van de jubilerende dialekvereiniging op 2 mei is de verniejde website geprissenteerd die daezelfden daag de lóch in geit. De link nao de website verandert in veldekevenlo.nl terwiel degene die nog op de alde site inlogge waere doorgesteurt nao de verniejde site. Mit de aanpassing van de naam wuurt ’t mekkeliker um die site te vinde.

De verniejing is nuuedig umdet d’r mier as in ’t verleje gebroek gemak wuurt van ’t bekieke van websites op telefoon en tablet. Ouk zien in de loup van de jaore de technische meugelikhede verbaeterd.

Vanaaf noow kin en meug ederein zich aanmelde veur de nietsbreef. Mit inachneming van de geldende privacyregels waere de persoeënsgegaeves geautomatiseerd verwerk in de administratie.

Mit dees verniejde website haope we minse nog mier as noow te interessere veur ’t gebroek en instandhalde van ’t dialek in waord en geschrif. Daomei wuurt rech gedaon aan ’t doel van de vereiniging: laeventig halde van de volkscultuur en alle plaatselike dialekte.

Slider3

Veldeke Krink Venlo

Stuw Belfeld