Sinds begin november ligge de volgende dialekbeuk geschreve door Loot18 beej d’n bookhandel:
Dialekprintebukske JUP en “DRUP” de speultuin, ’t ierste deil mit de “avonture” van Jup en Drup.
Dit deil van de nieje serie printebukskes JUP en “DRUP” geit euver de speultuin. ‘t Is ein geschreve en geteikend verhaol euver twieë bevrinde buurjónges die zich in de speultuin ammezere. Eur belaevenisse zien herkinbaar net zoeëas de speultoestelle.
“DOORSPEK 100 -twieë-”
Twieëde gedichtebundel in ‘t Venloos dialek.
Ouk “Doorspek 100 -twieë-“ besteit weer oet ‘n hónderdtal in Venloos dialek geschreve werke. De naam Doorspek verwies nao ein reeks grappige verwaordinge en gedachte (spinsels) die as ‘t waore de gedichte larderen (doorspekken).
Op zóndaag 27 oktober 2024 woort in Feeszaal “’t Tref” in Venlo-Zuud de jaorlikse kwismiddag gehalde um d’n titel “de Slumste Venlonaer van 2024”. Deze middag woort veur de 25e kier georganiseert door Dialekvereiniging Veldeke Venlo. De kwis waas veur de 25e (en ziene letste) kier oetgedach en geprissenteerd door Hans Jacobs.
Kwismeister Hans Jacobs.
Volgend jaor wilt hae gaer in de zaal zitte en dan zelf ouk meidoon. Hae haop dan ouk neet mit de “poedelpries” nao hoes te mótte gaon. Veur deze kwis hadde zich 27 koppels aangemeld. Vuuel deilnemers doon al jaore mei aan de kwis.
Tien en Fried van Feeszaal ’t Tref hadde de zaal al weer moeëj aangekleid en ingedeild. De deilnemers dröppelde binne en nome eur plaatse achter de taofels in. Nao ein welkómswaord door d’n opperspraekstalmeister Wiel van Aarssen, woort wethalder Jacques Smeets aan de zaal veurgesteld. D’n hier Smeets begós, op verzeuk van Hans Jacobs, aan de ierste serie vraoge. En waal euver de politiek in Venlo. De köpkes van de deilnemers hoors se krake in de zaal. Dao nao ging de wethalder zelf meidoon. Achteraaf vond hae ’t hiel gezellig en lierzaam en wilt ’t volgend jaor ouk weer mei doon.
Wethalder Smeets noom deil aan de kwis ónder ’t genot van ein glaeske beer.
Ouk Cock Ooms en Dick Evers kwame vraoge stelle aan de deilnemende koppels. Nao 5 vraoge-róndes woort ein korte pauze ingelas. Nao de pauze meuste de deilnemers nog ens 5 spelróndes speule. Marcel Hoogenhuis kwam de deilnemers teste op eur kinnis van de 2e waereldoorlog. In de letste spelrónde meus ein deil van de deilnemende koppels tegeliek 5 verscheie leedjes zinge. Waat ein kakofonie waas det. Neet um aan te Hure! De jury (Diana, Martin, Wil en Frans) ging aan ’t telle um tot einen oetslaag te kómme. En dae woort door Hans Jacobs geprissenteerd. De gansen oetslaag steit heejónder.
De poedelpries woort gewónne door ’t koppel “de Däölkes”. De 4e pries ging nao “Festina Lente”. Zeej krege ’t book euver ‘t 100 jäörig bestaon van Feeszaal “’t Tref”.
Henriëtte Bakker (Óngenuujd) ging same met Jos Vullings aan de haol mit d’n 3e pries.
Harrie Lucker en Niecky van Steenkiste wónne as koppel “Kwanten Trammelant” d’n 2e pries. Zeej meuge gaon kieke naar de voetbalwedstried VVV taege Emmen.
En zoeë as al jaore gebroekelik ginge pap René en dochter Danee Dings (de Dingskes) mit de ier strieke!
Dit kier waas pap René ’t beste in de ónderlinge stried um d’n titel en meug zich ein jaor lank “de Slumste Venlonaer” neume.
De winnende deilnemers krege, veurdet zeej nao hoes ginge, ’n stóffe rökzekske mit inkele kedootjes oetgereik!
Aan ’t ind van de middaag haet Wiel van Aarssen ederein bedank dae deze middag meuglik haet gemak, veur ziene of euren inzet en daagde de deilnemers oet um volgend jaor ouk weer mei te doon.
Weej make binnekort de datum van “de Slumste Venlonaer 2025” bekind.
In september 2023 óntving Dialekvereiniging Veldeke Venlo in Venraoj de vlag van Veldeke Limburg as teike det zeej in 2024 de Kringe Kóntak Daag (KKD) meugde organisere. In jannewari 2024 woort d’r op verzeuk van ’t bestuur van Veldeke Venlo eine werkgroep geformeerd dae dezen daag meus organisere. Deze werkgroep bestónd oet Lei Fransman (veurzitter), Gerard Derkx (sikkertaris), Pieter Ebus (penningfoekser), Willem Menge (PR), Jos Verbong (akkomodasies Op Steyl) en Wiel van Aarssen (kontaktpersoeën bestuur Veldeke Venlo).
‘t Schötteriemuseum in Steyl
Al gauw woort beslaote det de KKD 2024 op Steyl zoel waere gehalde. Dit umdet dao verschillende interessante bezeenswaerdighede vlak beej mekaar ligge. ‘t Programma woort in mekaar gedreijd en oetgewerk. Spónsore woorte gevónde veur ’t aafscheidskedo. Weej krege zelfs van ein verzekeringsmaatschappie ein stök euver Steyl in hand. Det hebbe weej vertaald nao ’t Venloos. En eine manager van die maatschappie haet ós nog geholpe um ’t stök good te vertale.
‘t Schötteriemuseum woort as oetgangspunt gekaoze. Dao begóste weej op zaoterdaagmorge mit de óntvangs van de deilnemers. Beej binnekóms krege de deilnemers kóffie of thee aangebaoje. Daonao kwame de bruuedjes mit ein tas soep. Jaomergenóg maar in totaal 37 persoeëne. Wao ónder ózze wethalder van Cultuur (mevrouw Marij Pollux) en ózze gedeputeerde veur Cultuur (d’n hier Jasper Kuntzelaers).
Mevrouw Pollux kreeg nao eur äöpeningswaord ein boeket blome aangebaoje. D’n hier Jasper Kuntzelaers noom ós mei op de reis nao Friesland. Dao hebbe zeej kinnis gemak mit de waeg dae weej mótte bewandele um ouk ein erkinde taal conform ’t Europees Handvest Deel III te waere. Veur zien wäörd kreeg hae ein fleske “Grand Prestige” aangebaoje. Daonao woort de groep in 2 subgroepe verdeilt. Eine groep ging nao ’t Kaetelhoes en d’n andere groep kreeg ein róndleiding in ’t Schötterie-museum. Nao óngevier 1 oor woorte de groepe gewisseld.
Rónd 15:30 oor kwame weej weer beejein in ’t museum. Dao begós ’t gezellig samezien ónder ’t genot van ein glaeske. Tössedoor traoj Ton Engels op mit gezónge Limburgse leedjes. Ouk traoje 2 kinder op mit eur deklamasie. De kinder krege veur eur optraeje inkele kedootjes. ‘t Werm en kalt buffet veel beej idderein in de goje smaak.
Aan ’t ind van d’n daag kreeg d’n hier Reg Van Loo, veurzitter van Veldeke Limburg ’t waord. Hae woort gevraog de vlag van Veldeke Limburg offisjeel euver te drage aan de Kring Ech. Zeej meuge de Kringe Kóntak Daag 2025 organisere. Zeej makde d’n daag al bekind: zaoterdaag 13 september 2025 treffe weej ós weer, maar dan in Ech. De órganisatore danke alle deilnemers en vreejwilligers veur eur beejdrage aan ’t sukses van dezen daag.
’t Printebook “POEPEDIEPOEP mót oèt” is ’t geschreve en geteikende verhaol euver d’n hónd Poepediepoep. D’n teks is in ’t Venloos en Nederlands en d’r is ouk ’n Duitse versie. Dan hit d’n hónd Kackediekack.
’t Verhaol start in de morge nao ’t opstaon en d’n hónd zien behoefte mót doon. Kinder die ’t verhaol veurgelaeze kriege kinne ’t via de teikeninge volge of de teikeninge zelf ‘laeze’ um ’t verhaol te volge. Daonaeve is ’t veur ederen hóndeigenaer ’n geheugesteuntje waat te doon as d’n hónd gepoep haet.
Louis Tinneveld haet ’t geschreve en de teikeninge zien door Justin Wolters gemak.
Tiedes de algemeine lejevergadering op 25 april zien de prieze oetgereik aan de winnaers. De winnaer van Venlo Toën Feyen kreeg ’t beeldje det is gemak door Mariëlle Franssen oet hand van Bas Vissers. De zjurieleje Henny, Frans en Joep ware getuge heejvan.
Hay Goerts as winnaer van Blierick waas neet aanwezig. Hae krieg ziene pries op ’n ander moment oetgereik.
De veur- en achterkant van de beeldjes.
Inmiddels is ’t beeldje oetgereik aan d’n Blierickse winnaer dae d’r erg blie mit is.
Maar leefs 28 kinger óet Limburg lete zich van de beste kank zeen en huëre op de finale van de Limburgse declamatiewedsjtriéd op 25 mei 2024, dae in d’n Hanenhof in Gelaen gehaje is. Sjtök vur sjtök versjrikkelik good! Complete femielies zote in de zaal volop te geniete.
Aevel, de jury had ’t zjwaor! ’t Waas has ônmeugelik öm winnaers te keze. Toch is ’t gelök.
Van de krink Venlo deje 8 kinger mei. Djemke, Eliza, Emma, Esmee, Izabella, Lana, Nikki en Vayèn. Maar leefs dreej priéze hebbe weej mei nao Noord Limburg genaome. Dao zien weej hiel gruëts op.
Emma Verlinden óet Tegele kreeg de aanmoedigingspriés met ’t gedich miene knuffel van Mariska Reer.
Djemke Schouwenberg óet Tegele had de 3e priés van de ôngerbouw, ouch met miene knuffel van Mariska Reer.
Eliza Derijk óet Venlo wôn de 3e priés van de middebouw met femielie Muuske van Truus Verbong-Simons.
Det d’r Tegelse minse in de zaal ware, bleek waal toen Hans Jacobs (de presentator) begôs te zinge: “En as weej wir nao Tegele gaon”. Alle Tegelse zônge mei.
Waat mak Limburg eigelik ”t Limburg’ det weej noow kinne? In de viefdeilige serie De Waereld in Limburg neemp schriever, muzikant, journalis en historicus Frans Pollux dich mit op ein fascinerende reis door de vuuelzijdige en rieke Limburgse cultuur. De serie is te zeen op L1 vanaf zóndag 2 juni 2024.
De ierste oetzending geit euver Erfgood. Veldeke is neet alleen sponsor maar in ein van de afleveringe ouk vertaegewoordig.
Tiedes de aafgeloupe algemeine lejevergadering zien 4 kandidate veurgesteld as niej bestuurslid: Moniek van Aarssen, Sander Kuilman, Paul Seelen, en Jeanette Velmans. Zeej hebbe zich aan de vergadering geprissenteerd en verteld waorum det ze zich in wille zitte veur de vereiniging. De vergadering haet ze allemaol as bestuurslid gekaoze door middel van ein groeët applaus. Ze zien welkóm geheite en nome plaats achter de bestuurstaofel. Euver de taakverdeiling wuurt in de ieërsvolgende bestuursvergadering gespraoke.
Aangezeen Wiel Maassen nog ein jaor doorgeit (allein neet as penningmeister) besteit ’t bestuur noow oet 7 persoeëne.
Met ’t veurjaorswaer wilt ’t dit jaor maar neet vlotte. Maar in de Harmoniezaal in Tegele sjeen de zôn! Dao sjtinge vriedigaovend 19 april maar leefs 22 zunkes te sjtraole oppe buun. Wie klein of groët ze ouch ware, ze wiste de herte van alle aanwezige te verwerme en tegeliékertiéd kiepevel te bezörge. Wat ’n talente! In Tegele hebbe weej ’t gelök euver ‘ne trouwe sjriéversgroep te besjikke en meuge weej geregeld nieje sjriévers verwelkômme. Dao zien weej hiel gruëts op en dankbaar veur. Want sônger sjriévers gen gedichjes en minder kans öm de kinger enthousias te make vur ôs Tegels dialek.
Nao ’t äopeningswaord van d’n hiër Bas Vissers, a.i. veurzitter van Veldeke Krink Venlo, noom Iris Vercoulen de presentatie euver door idderein welkôm te heite en de jury veur te sjtelle. Dit jaor hadde de dames Angelique Frijdal, Ingrid Dambacher en Ine Holtman de iër, maar ouch de zjwaore taak, öm punte toe te kenne aan alle veurdrachte. Dees dames hebbe meigedaon aan de lets opgeveurde Tegelse Revue in 2007 en drage Tegele en ’t dialek ’n werm hert toe.
De deilnimmende kinger veulde zich gedrage door ‘ne zaal vol met fans: complete femielies, vriendjes en vriendinkes, juffe en meisters van de sjoële, sjriévers en angere belangsjtellende wiste de waeg nao de Harmoniezaal. ’t Waas den ouch al wiéd veur de sjtart bômvol. Geweldig öm det idder jaor wir te zeen. Vur de kinger ’n terechte beloëning, zôn groët applaus. Van kinger die eure knuffel neet wille loslaote toet kinger woëbeej “alles taege zit”, in de gedichjes kwaam ‘t allemaol vurbeej. In de pauze kôs de jury nag efkes de köpkes beejein sjtaeke en ginge ôngertösse de vutjes van de vloer oppe buun en in de zaal. ‘ne Gemingde dansgroep van mini’s en juniore van V.G. d’n Oeles, besjtaonde óet maar leefs 22 sjterre, trakteerde ’t publiek op ‘nen dans op ’t toepasselikke liedje “Doezend Sterre”.
Óeteindelik kwaam toch éch ’t moment van de jury-óetsjláag. D’n óetsjláag van de Tegelse finale-aovend op 19-4-2024 is as volg:
Ôngerbouw
1e Emma Verlinden met gedich: Miene knuffel van Mariska Reer 2e Djemke Schouwenberg met gedich: Miene knuffel van Mariska Reer 3e Jesper Stapel met gedich: Miene knuffel van Mariska Reer
Middebouw
1e Vayèn Smedts met gedich: De kleuterklas van Mariska Reer 2e Esmee Wijnhoven met gedich: De kleuterklas van Mariska Reer 3e Fenna Burhenne met gedich: De kleuterklas van Mariska Reer
Baovebouw
1e Nikki Krijn met gedich: Alles zit taege van Jack Pelzer 2e Lana Wijnhoven met gedich: Uniek van Hanneke van der Sommen 3e Lynn Helmes met gedich: Gelöksgeveul van Truus Verbong
Proficiat allemaol!
Fotograaf Jos Verbong haet de gansen aovend sjoën foto’s gemak.
Op zaoterdig 25 mei is de Limburgse finale in de Hanenhof in Gelaen. Dao zulle de 1e en 2e priéswinnaers Tegele gaon vertaegewoordige.
Weej danken alle kinger die hebbe meigedaon -vur ôs ziet geej allemaol winnaers- en haope uch volgend jaor wir truuk te zeen. Ouch ein groët “dank je wel” aan alle elders en liërkrachte die de kinger begeleid hebbe in ’t veurtrajek. Weej haopen ouch beej de volgende editie wir op net zoëvuël enthousiasme te meuge raekene. Zet maar veskes oppe klender: vriedig 18 april 2025 öm 19.30 oor is de Tegelse finale van de Declamatiewedsjtriéd van Veldeke in de Harmoniezaal in Tegele!
Werkgroep Tegelse Declamatiewedsjtriéd Veldeke, Truus Verbong Nicol Ebus Susan Janssen
