Slumste Venlonaer 2015

De Slumste Venlonaer

Wat had e ’t weer schoeën inein gedreid. De bedinker van de ónderdeile beej de Slumste Venlonaer verrasde weer met ‘ne niejen opzet en nieje spelkes. Chapeau veur Hans Jacobs. Ein daverend applaus kreeg hae dan ouk nao aafloup van deze zieër gezellige middaag.

D’r ware 22 koppels aangemeld op zóndaag 25 oktober. Plaats van handeling waas de Venlonazaal. Begós woort met ’n veurstelrundje van de koppels: ‘ne gas nieje deilnemers en vuuel aldgedeende. Heej bleek, det de meiste kwame veur de gezelligheid en det ’t niks oetmakde of se wóns of letste woors. In de loup van de middaag woort det links en rechs waal wat beejgesteld…In taegestelling tot andere jaore gen groeët scherm, gennen beamer, allein ‘ne microfoon en ’n spraekgestoolte. Nege ónderdeile ware d’r en veur ’n aantal had Hans SBV-ers genuuejd, oftewaal Sympathieke Bekinde Venlonaere. En die hadde te make met det spelónderdeil.

As ierste ware aan de beurt de hiere Bert Ebus en Roel Versleijen met de bekinde vraog: wae sprik de waorheid? De wäörd ware dit jaor: mesomme, poelepetaot en vreigelaer. Zeuk ze maar ens op. Daonao kwaam Jos Rutten. As ald-speuler van VVV had hae dao 10 vraoge euver. Beej mennig damesteam waas d’r gekuum en gesteun. Hans troeësde eur met te zegge det d’r ouk ’n vraogerónde euver breije kwaam…. Gelökkig ware d’r wat mierkeuzevraoge beej, dus d’r kós gegok waere. Spelke 3 ging euver Venlose spraekwäörd. Fred van den Bogaard waas extra vruug opgestaon um zich veur te bereije en beeldde in totaal 7 spraekwäörd oet. D’r ware ’n paar mekkelike maar ouk gans meujlike beej. Maar Fred kweet zich good van zien opdrachte, ouk as d’r gevraog woort um ’t nog ens te doon of wat lanksamer. Ruud Stikkelbroeck waas de volgende SBV-er dae ’t ein en ander ging teste euver de kinnes van Umroop Venlo oftewaal de Stadsumroop. Neet mekkelik, en det waas in de zaal huurbaar. En d’r mog neteurlik neet gegoogled waere of hölpliene aangerope. In ’t Venloos wäördbook waas d’r ouk niks euver te vinde. Daonao kwaam ‘ne mekkelikere…..dach me. Foto’s van vruger en de vraog waas of det foto’s van Venlo ware, en zoeëjao, waat steit d’r dan op. Welke straot of welk gebouw. En met waat foto’s die oet ’t ganse land kwame woort mennigein heej op ’t verkierde bein gezatte. Stónd die meule noow waal of neet heej. En det spaorlienke, det löp toch euver Blierick…of neet. De volgende SBV-er waas Toine Schreinemachers, veurzitter van de Stichting óndernemers binnestad Venlo. Hae had ouk 10 vraoge euver de binnestad, wievuuel winkels, wievuuel bezeukers en zoeë vaerder. Jao, en as se dan neet wets wie de parkeergarages heite… Of wae allemaol veurzitter is gewaes van de stichting…. En met idder good antwaord waas ’n punt te verdene. Verdölds lastig. Gelökkig waas spel 7 mekkelik, teminste, as se wis waat ’t waord beteikende. En as se ’n bietje kreatief waas. 4 Wäörd woorte gegaeve en die meusteoetgeteikend waere: gölger, fläöstere, wieksdoeës en räökeliezer. Begin d’r maar aan. De kolleksie met teikeninge die later beejein waas verzameld sprook veur zich. D’r ginge stumme op um die aan te beje aan ’t Limburgs Museum. As letste SBV-er kwaam Harry Pouwels. Dae waas ónder de pauze al gesignaleerd in de zaal en me dach neteurlik det dae vraoge kwaam stelle euver Jocus. Heej en dao ware al veurbereidinge getroffe. En gelökkig veur die det gedaon hadde, d’r ware gen vraoge euver ’t gashoes. Jocus en vastelaovend waas ’t ónderwerp. Ouk inkele mierkeuzevraoge maar ouk ’weit‘-vraoge. En ’t koppel det alle vorste van Jocus vanaaf ’t begin good had gehad, det zoel gewónne hebbe. Net veur de pauze had Hans al aangegaeve det d’r ’n muzikale vraog ging kómme met de vraog of ’t koppel vas nao woel dinke wae d’r ging zinge. En det kwaam beej ónderdeil 9 aan de beurt. Eine van de koppels meus op de buun kómme en daonao kwaam de instruksie. Alle ’zengers en zangeresse‘ krege ‘nen titel van ’n leedje te zeen en die meuste tegeliek gezónge waere. De andere helf van ’t koppel meus dan luustere en opschrieve welke leedjes allemaol veurbeej kwame. ’t Bleke d’r oetintelik 5 te zien. Nao ein minuut gezónge te hebbe woort ’t koeër bedank veur eur beejdrage. Daonao kós de jury bestaonde oet Wilma Janssen en Frans van de Rijdt aan ’t telwerk beginne. En det waas nog neet 1,2,3 gebeurd. Dao waas in veurzeen door de priesoetreiking te doon van de faatse trofeje van de optochte in Venlo en Blierick. Önder de toeëne van Schots en Scheif kwame de winnaers de buun op: de hiere Peeters en Peters oet Blierick en Bert Ebus oet Venlo. D’n aanmoedigingspries woort oetgereik aan Ben de Wit oet Venlo. ’t Ware weer prachtige beeldjes gemak door Marielle Franssen die de veurzitter mog oetreike.

’t Groeëte ougenblik brook aan: d’n oetslaag. Vol spanning ging ’t van de letste nao d’n ierste. De poedelpries waas dit kier veur 2 koppels: Johan en De Kwaakers ware met 46 punte geëindig. ’t Rieke woort vaerder aafgewerk en oetintelik bleek det de letste 4 koppels allemaol op de ierste rie zote: Op de 4e plaats eindigde Noeëts Druueg 2 (Ton Janssen en Joep van Kleef), 3e woort 11m2 (Tjeu Driessen en Hans van Kleef), de 2e plaats waas veur Noeëts Druueg 1 (Bert Driessen en Gerard van Gestel) en de winnaers ware Fanfarissimo bestaonde oet Bert Ebus en Roel Versleijen. Die twieë meuste nog taegenein aafkampe door in de snelsten tied te zegge wao de opgeneumde Venlonaere bekind van ware: beroop of hobby.

De slumsteVenlonaer 2015 woort oetintelik Bert Ebus. Hae had de meiste good en ouk de kortsten tied. De priesoetreiking woort gedaon door de veurzitter. En in de aafsloeting bedankde hae alle vreejwilligers die hadde beejgedrage aan ’t slage van deze middaag. Wie in ’t begin al geschreve, met name Hans had ’t weer schoeën oet d’n aek gedreid. En wie ierdere aafleveringe ouk al geschreve: de thoesblievers hadde óngeliek. Die hebbe waal kinne genete van ‘ne schoeëne kermiszóndaagmiddaag maar neet van de gezelligheid, de lol en ’t plezeer en neet te vergaete de opgedaone kinnes euver Groeët Venlo beej dees aaflevering van de Slumste Venlonaer. Volgend jaor toch ‘ne gas täöfelkes d’r beej? Noteer maar vas: zóndaag 24 oktober. Ónder veurbehald neteurlik. Um met ‘ne bekinde spreuk te eindige: “Det wilt geej toch neet misse!”

Gerard van Gestel