Met 35 koppels die zich ’n plaats hadde gezóch in de Venlonazaal woort op zóndaag 29 oktober gestart met De Slumste Venlonaer. D’r ware nog inkele täöfelkes vreej veur de binneloupers.Nao de äöpening door veurzitter Henk Buskes vertelde spelleider Hans Jacobs waat ós allemaol te wachte stónd: 10 spelónderdeile, inkele nieje, inkele alde en waat in ’n nie jeske gestaoke.
Dao ging ’t haer met spel 1: Hans stelde 11 vraoge euver actualiteit en mier en die meuste met jao of nae beantwaord waere. Idder good antwaord goof 10 punte. Mekkelik toch…. of toch neet! Gezeen de scores tösse de 80 en 110 punte mekkelik dus. Spel 2 ging euver ‘ne gas straote in Venlo en waorum die zoeë heite. Keizersträötje, Hakkesplaats, Kwartelemert, Parade en Bolwaterstraot. Det wet toch (haos) idderein…. Beej spel 4 krege we ‘ne gas aafbeeldinge te zeen van persoeëne: wae is dit? waas de vraog. Ein koppel det zich de alde doeëze neump had ze allemaol good: 100 punte.
Umdet de “mystery guest” d’r neet ierder waas, woort noow spel 3 gedaon. En dit spel kwaam 3x truuk, zoeë bleek. De koppels meugde vraoge stelle die met kloppe op de deur beantwaord woorte: jao of nae. Nao 8 vraoge met aaf en toe ‘nen bonus meus se de naam opschrieve van dae klopgeis. Det veel neet mei. Beej spel 6 en 9 ging det net zoeë. Oetintelik had geraoje mótte waere det Sef Thissen, Geert Benders en Renée Vercoulen op die deur stónde te kloppe. Nao binnekóms stelde idder van eur ’n dreejtal vraoge. En det ware neet de mekkelikste kin ik óg vertelle. De vraog van Renée, broed van persenieëlsvereiniging Festina Lente, um op te schrieve wie alle deilnemers geheite zoele hebbe as zeej broed of broedegóm beej de boerebroelof woorte, had idderein good. Geej kint óg veurstelle det d’r waat kwants beejein woort bedach.
Wie Bert Ebus de buun op kwaam wiste de vaste deilnemers al det ’t beej spel 5 ging um de vraog wae de waorheid ging vertelle. Hans en Bert gove idder ’n verklaoring veur ’n Venloos waord maar waat waas de juuste? Beej spel 7 kwaam ’t aan op kaartlaeze: aan de hand van ‘ne plattegrónd met coördinate van ’t centrum van Venlo meus vermeld waere wao ’n elftal gebouwe loge. Of det die juus neet op de kaart stónde. D’r ware 7 koppels die ze allemaol good hadde. Beej spel 8 kwame de puzzelaers aan bod: aan de hand van ’n beschrieving meus ‘ne straotnaam ingevöld waere in de hökskes die dao veur ware. En de letters pasde persies. Veur de meiste waas Picardi ’t perbleem umdet ederein det kint as de Picardie…. Oetintelik kwaam in ‘ne verticale kolom ’t gezóchde waord: meuderke. ’n Kwart van de koppels had det neet, maar gelökkig goof det maar tieën punte. Beej spel 10 kwaam de ganse zaal in bewaeging en meus d’r gezóch waere nao ‘ne gas letters die links en rechs ware opgehange. En met die letters meuste minstes 2 Venlose wäörd gemak waere.Tössedoor woort Hans door Noeëts Druueg nog ens fien herinnerd aan ’t gebeure vurrig jaor met ’n bepaold soort bruuedje: in ’t aangebaoje frikandellebruuedje zit gelökkig gen s of z….
De jury bestaonde oet Wilma Janssen, Diana Vullings en Frans van de Rijdt had zich óndertösse de mies gepaes en alle punte in de computer ingeklop. Op ’n groeët scherm kwaam d’n oetslaag veurbeej gerold: 2 poedelprieze ware d’r veur Hermien en Peter oet Blierick en de Schienheilige Ria en Ton. D’n top 3 bestónd maar leefs oet 5 koppels: ’t 2e van 11m 2 Hans en Tjeu waas derds, op de twieëde plaats 3 koppels: de Twieë Dingskes Danee en René, De Venlose Poerkers Truus en Gerard, en de Alde Doeëze José en Toos. “t Beste koppel waas Blauw Blood bestaonde oet Harriëtte Buskes en Anneke van Kleef. Die meuste aafkampe en al nao 1 vraog van Hans waas dutelik det Harriëtte zich de Slumste Venlonaer van 2017 meug neume. De gansen oetslaag vindt geej op de site van Veldeke.
De kómplemente gaon nao de organisatie, de ophaolers, de jury, d’n ónvolpreze spelleider, ’t barpersenieël en zeker ouk nao alle deilnemers die ’t toch maar weer aandörfde um mei te doon.Zoeëas altied kin ik allein maar zegge: geej dót toch volgend jaor ouk (weer) mei? Wies dan.
Gerard van Gestel
Venlo, 29 oktober 2017
