Veldeke-krink-Venlo trofee veur de faatse in d’n optoch
De einlinge, einzelgänger, oftewaal in good Venloos faatse zien zoeë wie me dök zaet de krinte in de pap van de vastelaovesoptochte. ’t Zien minse die dök pas op ’t letste moment einen inval kriege, hojje zegge taege de thoèsblièvers en d’n optoch in stappe um same met de minse naeve de optochroute plezeer te make.
Um al dees faatse te waardere reik Veldeke-krink-Venlo eder jaor aan eine faatse eine trofee oèt.
BLIÈRICK
’t Veel op det in d’n Blièrickse optoch vuul faatse meilepe, maar waal met 3 persoeëne. Det kwaam netuurlik umdet de 3-kes eine priès toe zoele kinne aan ein 3-manschap. Maar gelökkig bleve d’r nog genög minse euver die in aanmerking kóste kómme veur de Veldeke trofee. Dink maar ens aan Bart Albers: veur alle neet prinse geit de vlag oèt, of Wieger Simons: ik bin d’n draod kwièt. Maar zónder alle faatse tekort te wille doon vónd de jury de de Veldeke trofee 2009 nao Remy Verhagen
meus gaon met zien creatie van eine bekker met Wortelmik en de minse naeve de waeg kóste neet allein kieke nao dae mik, maar meugde ouk nog preuve!
VENLO
Had de jury ’t neet gemekkelik in d’n Blièrickse optoch, in Venlo waar ’t nog lastiger. Alle faatse hadde eur uuterste bes gedaon um zoeë origineel meugelik veur d’n daag te kómme b.v.: sleutelfiguur, de schienheilige, maedje met de swaffelstökskes, nieje sirremoniemeister veur de Jocus, prónke met andermans vaere en nog vuul mièr.
De winnaers, volges de jury, ware
Marcel Verdellen en Paul Joosten
met: weej belegge verspreid en halde gen bótteram euver. Dees twieë hière smaerde de bótteramme en leete de minse naeve de waeg oètkeze welk beleg ze d’r op woele (d’r staond vuul verschillend beleg op eur taofel d’r kós dus aardig gespreid belag waere).
Weej van Veldeke zien euveriges van meining det alle faatse, die meileepe in d’n optoch, gewónne hebbe. In eeders geval hebbe zeej de aandach en d’n dank van alle minse naeve de waeg gekrege. Weej fillicitere dan ouk alle faatse en in ’t biezónder de winnaers.
Vanzelfspraekend is ’t heej op zién plaats um ouk de leje van de jury in Bliérik en Venlo hertelik te danke veur de meujte die ze dit jaor weer hebbe gedaon en daomei ein beejdrage hebbe geleverd aan ’t in stand halde van de Faatse in de optochte, want zeej zién toch de “krinte in de optochpap”.