Tegelen 2016

’t Tegels dialek zit ouch beej de jeug in ’t blood.

Vriedig 15 april 2016 waas alwir de 17de Tegelse declamatiewedsjtriéd! Ouch dit jaor deje alle zes de Tegelse basissjoële met. De deilnimmerkes kwame met eur femielie en vrinde beejein in ’t Zaelke öm dao eine leuke aovend te belaeve. Vur-al maedjes en eine gas sjtoere jônges sjtinge op de buun öm eur gedichje te declamere.

De sjriévers van de sjpiksjplinternieje gedichte ware dit jaor, Herman Bors, Linda Hanraets, Leonie van Hulten, Truus Jacobs, Susan Janssen, Hanneke van der Sommen en Truus Verbong. De jury, die besjtông óet 3 leje van Vv. De Kaetelaers (Erik Goossens, Marcel van Heel en Ted Huijbers), had de zjwaore taak öm óet alle talentjes de winnaers de keze! ’t Niveau waas hoëg en ’t was sjoën öm te zeen det ’t Tegels dialek ouch beej de jeug in ’t blood zit. Op nao ’t volgend jaor!

De winnaers van d’n óngerbouw:

Gijs Broekman met “Wat ein waer” van Truus Verbong (St. Jozefsjoël)
Puk Willemsen met “Hinkele” van Leonie v. Hulten (PassePartout)
Anouk Raijer met “Hinkele” van Leonie v. Hulten (St. Jozefsjoël)

De winnaers van de middebouw:

Bo Schraven met “Kratspaol” van Truus Jacobs (St. Jozefsjoël)
Zoë Kuijpers met “Kratspaol” van Truus Jacobs (St. Jozefsjoël)
Evy Kessels met “Wir nao sjoël” van Truus Jacobs (Het Maasveld)

De winnaers van de baovebouw:

Sam Hendrikx met “Miene gsm” van Herman Bors (St. Jozefsjoël)
Laura v.d. Wouw met “Miene gsm” van Herman Bors (PassePartout)
Mila Schraven met “Miene gsm” van Herman Bors (St. Jozefsjoël)

Foto’s van dezen aovend zien gemak door Jos Verbong. Alle nummers 1 meuge eur gedichje nag ens declamere beej de Limburgse finale op zaoterdigmiddig 21 mei in Dok 6 in Panningen.Op de groepsfoto sjtaon de nummers 1, 2 en 3 van iddere laeftiédscategorie.

Venlo 2016

Finale declamatiewedstried op 8 april 2016 in de Venlonazaal!

Waat ‘nen aovend… waat ’n schoeëne finale!!

Um half zeve, begint de zaal al aardig vol te struime, mama’s en papa’s, opa’s en oma’s en ouk nog de breurkes en zuskes, we hadde um hiel iërlik te zien… plaats te weinig. Maar achter in de zaal stónde nog staontaofels wao de minse nog koste staon.
De jury bestónd dit jaor oet Herm, Bert en Marij Pollux, die ’t ein hiele ier vónde um dit te meuge doon.
De klok löp taege zeve oor, de ganse zaal zit bómvol en de spanning van de kinder is hiel good te veule in de zaal, de hertjes kloppe in de kael.

Hans Jacobs geit beginne… hae rup de iërste vief kinder nao baove, de spits is d’r aaf. Wie idder jaor deej ik souflere, maar ik heb mich verbaas wie die kinder de gedichte allemaol in de kop hebbe zitte…Nao twintig kinder die ech waanzinnig eur gedich hebbe veurgedrage, hebbe we efkes pauze en dae woort opgevöld door Sjraar Timmermans, dae ziene buut van de aafgeloupe vastelaovend veur droog… ózze kanjer, dae ouk eine topper waas met gedichjes declamere , noow al veur ’t derde jaor ziene buut kump doon. Danke Sjraar, de waas éch gewéldig!! Wies ’t volgend jaor…

Nao de pauze veulde weej weer de spanning van de kinder, de ein zoot de schravele op de stool, d’n andere had gen nagels miër euver.
Die andere einentwintig kinder zien stök veur stök geweldig, waat haet Venlo ein talent!!! Als idderein dan oetintelik is gewaes, meuge se allemaol op de buun zitte en geluif mich… waat ein spanning onder de kinder… wae zal d’r met ein beeldje nao hoes gaon en wae meug de 21ste mei in Panninge in ’t Dok6 mei doon met de groeëte Limburgse finale??

Hans geit met de priesoetreiking beginne, beej de ónderbouw haet gewónne:

Sophie Sassen van de st. Willibrordusschoeël met ’t gedichje: SJOPPE
Jop Gubbels van OBS de Koperwiek met ’t gedichje: BEEJ DE BRANDWAER
Silke Ernst van de Koperwiek met ’t gedichje: SJOPPE

Beej de middebouw haet gewónne:

Jans Vaessen van ’t Groeneveld met ’t gedichje: TELEFOON
Emily Sassen van de st. Willibrordusschoeël met ’t gedichje: ’t BRILKE
Katie van Wylick van ’t Groeneveld met ’t gedichje: ’t BRILKE

Beej de baovebouw haet gewónne:

Kiki Severijns van de st. Martinusschoeël met’t gedichje: ’t IËRSTE KÖSMUULKE
Maud Lucker van OBS de Koperwiek met ’t gedichje: ’t IËRSTE KÖSMUULKE
Shainy van Cleef van de Montessorischoeël met ’t gedichje: IN VERWACHTING

Alle kinder hiel vuuel bedank veur óg declamere, ’t waas eine fantastische aovend wao we weer op truuk kinne kieke en de nummers 1, hiel vuuel succes in Dok in Panningen!

Annemie Schleepen-Schweitzer
Veldeke Venlo

Limburg 2016

Kiki Severijns en Sophie Sassen oet Venlo winne de houfprieze

DIALEKVEREINIGING VELDEKE VENLO velt in de prieze beej de Limburgse finale declamatie in Kepèl (Panninge) op 21 mei 2016 !

Op zaoterdaag 21 mei 2016 woort de Limburgse finale van de declamatiewedstried van Veldeke gehalde. Dees vónd dit jaor weer plaats in de sjieke zaal van DOK6 in Kepèl (Panninge). Waat waas ’t schoeën en wat leep ’t allemaol good! Zoeëwaal de deilnemerkes as de toeschouwers hebbe genaote van alerhande gedichjes in verscheie Limburgse dialekte.

Oet de 29 Limburgse finaliste zien de volgende winnaers gekómme:

Groep 3-4 / Ónderbouw:

Sophie Sassen, Sjoppe, Venlo
Thijmen Höppner, De ballon, Wieërt
Gijs Broekman, Wat ein waer, Tegele

Groep 5-6 / Middebouw:

Sofie Zeegers, Ein zomerwunjerke, Remund
Isa Meuwissen, Tant Truuj, Ech
Hanna Vranken, Miene drujim, Sustere

Groep 7-8 / Baovebouw:

Kiki Severijns, ’t Ierste kösmuulke, Venlo
Senna Valk. Verkieërdj begrepe. Ech
David Jetten. De toiletbäörstel. Ech

Van herte perficiat allemaol!

Slumste Venlonaer 2016

Aafgelaje vol is de Venlonazaal op zóndaag 30 oktober 2016. ’t Wuurt ‘ne middaag van rekórds en speciale gebeurtenisse. D’r wuurt weer gestreje um d’n t itel van De slumste Venlonaer.

Maar leefs 34 koppels doon mei aan dit kwant spel. De meis oeteinloupende en aparte name hebbe de koppels bedach: Beejeingerap, Theetäötjes, Weej weite ’t neet, de Fiespernöllers en Joetsmedemkes. Ouk zien d’r al inkele teams van ’t zelfde clubke: Noeëts Druueg, 11m2, de Moeraskwaakers. Wie is ’t spraekwaord ouk al weer: Good veurbeeld….Prissentator Hans Jacobs haet d’r dutelik zin in um met dit gezelschap aan de slaag te gaon en eur herses op volle toere te laote werke mit zien vraoge en spelkes. Maar iers mót hae ’t perbleem oplosse det d’r gen raekening gehalde waar met zoeëvuuel toeloup. Hae dreit det good oet d’n aek en mit ’n Venloos keteerke nao 2 oor geit ’t speul op de wage.

Wie altied haet Hans 11 spelkes bedach en de meiste zien weer andere dan vurrig jaor. Det beteikent dus ’n verrassing veur de meiste. Beej spel ein steit de Venlose of de Nederlandse naam van ’n bieës en ’t is de bedoeling um d’n andere naam d’r beej te zitte. Spel twieë besteit oet ‘ne gas stellinge en die mótte verklaord waere. Beej spel dreej staon 9 wäörd op ’n blaad en d’r kin van 3 wäörd ’n gezamelike gebeurtenis waere gemak. ’t Spel haet 3 blajer. As de ophaolers de ingevölde blajer hebbe aafgegaeve beej de jury, blieke d’r 2 koppels te zien die maar 1 blaad hebbe ingevöld…. Nao euverleg met dezjurie wuurt beslaote um eur nog 2 minute extra te gaeve.

Beej spel veer is ’t gekuum en gezuch neet van de lóch: de beteikenis van Tegelse wäörd. Daomei is Hans ’n belofte van vurrig jaor naogekómme. Nóndesjang, waat is det lastig! De sjtoepsjtert en d’n aansjpenner klinke nog lang nao. ’t Team oet Tegele haet det neteurlik foutloos opgelos. Veur spelke vief haet Hans in ziene werk- en kinnissekrink gevraog um op te schrieve waat emes invelt beej bepaolde wäörd. En waat is dan ’t meis geneump beej ’t Zomerparkfees, de Träöt, Kepelke van Genuue en de Venloup. Nao spel zes meus de jury in aktie kómme. Gegaeve zien 15 letters en de bedoeling is um dao ’n zoeë lank meugelik Venloos waord van te make. Die van Noeëts Druueg 1 meine det zeej alle letters gebroek hebbe um seziezebruuedje te make. Zeej kriege daoveur applaus. Det is veur de pauze. Tiedes die pauze bliek det in det bruuedje maar 1 Z mót zitte in plaats van 2. Maar die stónde waal in de opgaaf. De jury besluut nao de pauze det dit spel neet meiduit, en die kriege daoveur neet de hand opein.Maar waal ’n wies besloet, want per slot van raekening had idderein det waord dan kinne make as ze de goje letters hadde gehad….

Beej spel zeve mótte de deilnemers aangaeve wae de waorheid sprik. Umdet de persoeëne die Hans gevraog haet um de stellinge te bringe speulers oet de revue zien die op det moment in de studio zitte veur ’n opname, duit hae det gans allein… In spel ach staon ‘ne gas wäörd waovan letters óntbraeke. Die mótte waere ingevöld. ’t Laevesgevaorlike bonuswaord levert 5 punte op. Dao brik zich mennigein de kop euver. Spel nege is mekkelik veur degene dae nao de revue zien gewaes:gegaeve zien de rolle en ‘ne gas speulers. Gewoeën de juuste beejein zette. Hebs se de revue (nog) neet gezeen, dan bis se beej dit spel gezeen. Nog 2 spelle te gaon.

Veur de kinners van Venlose leedjes is spel tieën: de tekste van ’t couplet staon in ’t Huilands en zeuk dao d’n titel van ’t leed beej. Dae ’t kin zinge, meug daonao op de buun. Ouk beej spel elf zien de -smeis valse- toeëne neet van de lóch: van idder koppel meug d’r eine de buun op um ’n leedje te zinge. Met 34 man/vrouw waere d’r 10 verschillende nummers tegeliekertied gezónge. De andere helf meug opschrieve waat e gehuurd haet.

Dan zit ’t d’r op: de jury geit aan de slaag um d’n oetslaag te beraekene. Diana, Wilma en Frans mótte ef doorpeze um alles te telle, te sjekke en nog ens te sjekke. Die kinne zich genne faeler leiste. Óndertösse kómme Jules en Gijs de buun op um eur winnend vastelaovendleed van dit en volgend jaor te zinge oftewaal Op de hei en Dich bis ‘ne pipo.

Dan is ’t tied veur de winnaers van de faatsepries: Henk Buskes reik dae oet aan de hiere Ben Bettinger en Geert Rutten die in de Venlosen optoch de leukste kreasie hadde. D’n Blierikse winnaer Ben van der Heide is neet in de gelaegenheid um te kómme. Zeej kriege ’n beeldje gemak door Mariëlle Franssen.

D’n oetslaag kump d’r aan: as letste zien geëindig de Maasjes die van Henk ‘ne pot zore babbelaers kriege. De derde plaats is veur Noeëts Druueg 1, de twieëde veur de Venlose Poerkers en de beste zien de Dingskes: René en zien dochter Danee. De jóngsten deilnemer oeëts mit zien 14 jaor is Danee. Zeej kriege kaarte veur de Ode aan Sef Cornet. Beej ’t veurlaeze van de res van de punte spraeke de reaksies van de deilnemers veur zich: teleurstelling en euforie wissele zich aaf. Maar wae is de slumste van die twieë van Dings? Det wuurt René. Hae wet de verklaoring van de meiste wäörd binne 1 minuut te gaeve.

Wie gezag: ‘ne gedinkwaerdige middaag wao alle deilnemers en toeschouwers met vuuel plezeer op truuk kieke. En waat hebbe we weer ‘nen houp gelierd euver Groeët Venlo. De waalgemeinde kómplemente zien veur de prissentator en bedinker van dit aevenement Hans. Hae haet zich weer good van zien taak gekwete.

Volgend jaor is ’t op zóndaag 29 oktober. Ik haop det de Venlonazaal dan te klein is….Geej dót toch ouk (weer) mei? Wies dan.

Gerard van Gestel

De slumste Venlonaer de oetslaeg.

*De Dingskes*	*65 pnt. 1ste pries*	*Danee en René Dings*
*De Venlose Poerkers*	*60 pnt. 2de pries*	*Truus en Gerard Driessen*
*Noeëts Druueg 1*	*57 pnt. 3de pries*	*Gerard van Gestel en Bert Driessen*
*De Moeraskwakers*	*55 pnt.*
*Blauw Blood*	*53 pnt.*
*’t Twieëde van Noeëts Druueg*	*53 pnt.*
*Weej Twieë*	*53 pnt.*
*De Venlonaerkes*	*53 pnt.*
*De Pinkes*	*51 pnt.*
*Weej weite ’t neet*	*51 pnt.*
*Weej Same!!*	*51 pnt.*
*De Theetäötjes*	*51 pnt.*
*Óngenuuejd*	*51 pnt.*
*De Fiespernöllers*	*51 pnt.*
*ForFarissimo*	*51 pnt.*
*2de 11m²*	*50 pnt.*
*Festina Lente*	*50 pnt.*
*Duo Beejeingerap*	*49 pnt.*
*De Hudjes*	*48 pnt.*
*Ónverwach*	*48 pnt.*
*Döbbel G*	*48 pnt.*
*Joetsmedemkes*	*48 pnt.*
*De Waakvlemkes*	*48 pnt.*
*De Keviepers*	*47 pnt.*
*11 m²*	*46 pnt.*
*Die andere twieë*	*46 pnt.*
*Vrouwluuj 11m²*	*46 pnt.*
*Interlink team 1*	*45 pnt.*
*Betje Behei*	*44 pnt.*
*De Viecurietjes*	*43 pnt.*
*De Poedels*	*43 pnt.*
*Mabonka*	*42 pnt.*
*De maedjes van…..*	*41 pnt.*
*De Maasjes*	*40 pnt. Poedelpries*	*Elle en Hay Maas*

Nao ’t aafkampe tösse Danee Dings en ziene pap René Dings is oetintelik toch René Dings de Slumste Venlonaer 2016 gewaore!! Perfitsia veur René en zien dochter Danee!!

Faatse 2016

’t Wortelepinneriek, zóndaag 7 fibberwari 2016

Dit jaor waas de vastelaovend vruug in fibberwari, en det haet ouk waat perbleme gegaeve. De waergode ware ós aevel good gezind ónder d’n optoch. Ónder d’n optoch waas ’t druueg en mit de wind veel ’t ouk waal met. De Wortelepin had dit jaor as motto: Lach en geneet. En zoeë trok d’r ‘nen bónte vastelaovesstoet door de Blierickse straote. Mit 85 deilnemers waas ’t ‘ne langen optoch. Ouk de faatse ware good aanwezig, en dao ging ’t ós ouk um. De faatse zien toch de krinte in de optochpap. Veur d’n optoch kwame weej beej ’t Raodhoes beejein um nog efkes alles door te spraeke. ’t Waas sóms bes lastig um de faatse te vinde, veural as zeej achter ‘nen auto of groep lepe. Maar oeteintelik is ’t ós toch gelök. Nao afloup van dae prachtige optoch lepe weej weer truuk nao ’t Raodhoes veur euverleg. Vanzelfspraekend hebbe weej alle faatse die aandach gegaeve die ze ouk verdeende. Nao efkes te hebbe geklasjeneerd kwame weej met algemeine stumme tot eine winnaer.

De Veldeke-trofee van 2016 in Blierick is gewónne door d’n hier Ben van de Heyden met zien kreatie: Ik bin onderwaeges nao de Venloosche optoch. Heej beej zoot ós werk d’r veur dit jaor weer op. Weej kieke al weer oet nao 2017!

Veldeke jury Blierick,Henny, Mieke, Henk en Jos

Vastelaovend met Halfvaste in Venlo.

Vuuel minse hadde zich al behuurlik drök gemak euver Halfvaste. De kasteleins roke eur kans en vonde det weej d’r maar weer ens duchtig taege aan móste gaon, anderen vonde weer van neet. TANTE Bet , Jocus en ózze StADSUMROOP ventileerden allemaol eur meining. De Gemeinte Venlo waas wat minder enthousiast en vond det Jocus maar de ker mós gaon trekke, maar dao had Jocus neet zoë vuuel zin in. Maar d’n optoch meus d’r kómme en dae kwaam d’r!

D’r ware d’r wat die neet kóste, en ouk weer andere die gaer mei deje. En zoeë leep de Ponywaeg taege de middaag toch weer behuurlik vol en belaofde ‘t ‘ne schoeëne optoch te waere. En det waas ’t ouk. ‘ne wonderschoeëne optoch – zonder gater!- met schitterende wages en groepe. Ein genot um nao te kieke. ’t Waer speulde de minse gans in de kaart en op ’t lets kwaam ’t zunke zelfs te veurschien.

Faatse ware d’r waat minder as ander jaore. We telde d’r ongevaer 20. D’r woort op twieë plaatse gejureerd door Han en Huub Thijssen en door Henny Crommentuyn met Wiel van Aarssen. Na aafloup hebbe die zich beej ein gezatte en d’n oétslaag bepaold.

As winnaer kwame oét de bus: Ben Bettinger en Geert Rutten met eur kreasie: Toch ein boete bar. D’r woort ouk ‘ne aanmoedigingspriés gegaeve en waal aan Hay Swinkels met : Gans door ein.

De priéze zulle waere oétgereik tiejes “De Slumste Venlonaer”op zondaag 30 oktoëber in de Venlonazaal .

Verslaag jaorvergadering 2016

1.Äöpening door de veurzitter d’n hier Henk Buskes

Idderein van herte welkóm op de algemeine lejevergadering van Dialekvereiniging Veldeke Venlo. De opkóms is enorm en nao de vergadering verzörg ’t Schötteriemuseum ’n róndleiding heej in dit moeëj museum.

2.Notule van de algemeine lejevergadering van 15 maart 2015:

Op ’t scherm kómme de notule te veurschien en Henk Buskes guuef teks en oetleg. Hae löp alle puntjes nog efkes nao. Veldeke Limburg besteit dit jaor 90 jaor en iddere krink organiseert waat. Hae kump heej later nog op truuk. Op de vraog of d’r op- en of aanmerkinge zien, wuurt heej gen gebroek van gemak. Ónder dank aan de samesteller, waere de notule goodgekeurd.

3.Besteursverkezing. Aaftraejend is Henk Buskes. Hae stelt zich weer herkeesbaar:

Frans v.d.Rijdt neemp ’t waord euver. In zien waord roemp hae de werkzaamheje van de veurzitter. Noeëts is iets te vuuel, ouk is hae intösse bestuurslid gewaore van Veldeke Limburg. Frans vruueg dan ouk aan de jaorvergadering, beej hand opstaeke, of Henk Buskes weer as veurzitter aan de slaag meug. Ónder groeët applaus en beej hand opstaeke goodgekeurd. Henk Buskes neemp ’t waord weer euver. Hae bedank de vergadering, de werkzaamheje veur Veldeke haet hae altied mit vuuel plezeer gedaon. Ouk zien nieje werkzaamheje beej Veldeke Limburg zulle ein veurdeil zien veur krink Venlo.

4.Jaorverslaag.

Dit steit op ’t thoesblaad en noow ouk op ’t scherm: Anneke van Kleef luues ’t verslaag veur. Alle evenemente waere efkes beneump.

5.Jaorciefers 2015 en de begruueting 2016 met oetleg door de penningefoekser:

Martin Doesborg neemp de ciefers door en guuef dao, wao nuuedig, efkes teks en oetleg. De € 700,00 van de provincie is veur de declamatiewedstried. Op dit moment zien weej nog waal gezónd, maar mótte d’r op toe zeen det dit good blief gaon, anders zien weej genoeëdzaak iets te gaon schrappe. Martin guuef teks en oetleg euver ’t lejebestand. Te kort € 1.500,00, in de loup der jaore. Meschiens mótte weej toch iets gaon schrappe. As d’r gen vraoge mier zien, waere de jaorciefers en de begruueting, ónder dank aan Martin Doesborg, goodgekeurd.

6.Verslaag van de kaskóntrolekemmissie en de beneuming van de nieje kemissie:

Kaskóntroleurs Thei Laemers en Wiel Janssen hebbe de kas gekóntroleerd beej de Paerdskoel in Blierick. Thei Laemers neemp ’t waord: Weej hebbe de kas gekóntroleerd op 18 maart 2016 euver de geldzake van 2015. De liquide middele stumme euverein met de banke. De oetgaves zien oké. Heejbeej wuurt décharge verlieënd aan de penningefoekser, ónder groeët applaus. Thei Laemers haet nog ein toevoging: Weej meuge gruuets zien op deze penningefoekser. Thei Laemers blief nog ein jaor zitting neme in de kaskóntrolekemmissie en mevrouw Ria Hermans wilt de volgende kier controlere..

7.Veuroetblik op 2016:

D’n agenda steit beej ós op ’t thoesblaad. Henk guuef teks en oetleg beej de evenemente die Veldeke dit jaor geit organisere. Beej ’t Sef Cornet gebeure guuef hae waat extra oetleg: Veldeke Venlo brink in ‘t jaor van de Limburgse dialecte ein “Ode aan Sef Cornet”. Sef Cornet is de vader van “De Venlose Revue” en haet ’n belangrieke beejdrage geleverd aan de Venlose volkscultuur. Hae makde van 1913 wies 1950 furore met ruum twintig revues, cabarets en variété veurstellinge. Same met zien broor Matthieu schreef hae de

tekste en de leedjes. Nao zien acteerdebuut in ’t “Groot Cabaret” in 1913, woort hae flot de spil van vuuel veurstellinge. Met weinig kós hae ‘ne zaal laote schatere. Sef waas amusant, ziene flauweköl plekde aan ’t geheuge van zien publiek. Nao zien sterve in 1953 is hae jaomer genóg in de vergaetelheid geraak. Dialekvereiniging Veldeke Venlo bringk ‘m weer ónder d’n aandach met ’n “Ode aan Sef Cornet”. In

de nao-oorlogse revues hebbe o.a. Annie Renkien, Sjraar Peetjens en Jan van Hoften geacteerd. Geanimeerd spraeke zeej noow nog over de gloriedaag van dees meistal oetverkochde veurstellinge. Ine Engels-Cornet, dochter van Sef, haet gelökkig vuuel tekste, waovan

sómmige handgeschreve, bewaard.

De veurstelling die geej got zeen is ‘ne greep oet de tekste van Sef en Matthieu Cornet. Frans Boermans jr., Wim Naus en Sef Peeters hebbe ’n selectie gemak oet ’t vuuele materiaal. Inkele Venlose acteurs laote same met regisseur Marnix Mulder de revues van Sef Cornet herlaeve. D’r óntstaon inkele issues euver de kaartverkoup. Minse zien bang det de kaarthalders alles wegkape en veur de leje niks euverblief. D’r is op dit moment gen veurrang veur leje, dit alles löp via de Maaspaort mit eur regels. Deze laeftiedsgroep geit ouk meistal rónd dezen tied op verkansie. Geopperd wuurt det ze euveral kins internette. Sef Peeters vruueg of dit meschiens met veurinschrieving kin plaats vinde veur Veldekeleje. Henk Buskes luuet de leje weite det weej dit meineme nao de iers volgendebesteursvergadering en dit gaon bespraeke. Ria Hermans vruueg of de leje nao de generale repetitie meuge kómme? De SOB duit dit dökker. Ouk dit wuurt mei genaome. Dit is ein punt veur de volgende besteursvergadering en weej laote ’t de leje zoeë flot meugelik weite. Ger Sternheim vruueg of d’r eine gewoeëne kaartverkoup is. Nae alles via de Maaspaort. Andere kaarte via de verkoupadresse (theetied enz.) De leje hove neet bang te zien. Veldeke haet gaer volle zale en zal perbere gen leje te weigere. Gevraog wuurt of de Ode aan Sef Cornet meschiens in de groeëte zaal kin. Det geit jaomer genóg neet, umdet dergelike tenielstökke baeter oetkómme in de kleine zale en ouk de aankleiing gen kapitale hoof te koste. D’r zien nog inkele opties genaome beej de Maaspaort veur 4 veurstellinge. Dus moch ’t zoeë flot gaon, kinne weej nog altied, in euverleg, nao de andere data kieke.

8.Róndvraog:

Ger Sternheim vruueg waorum d’r 2 tiedstippe ware. Henk Buskes antwaort det dees vraog terech is en jaomer genóg is dit gebeurd. Heej veur ós excuses.

Herman Wiermans vruueg of d’r nog ein niej waordebook kump. Henk Buskes guuef teks en oetleg. Dit is erg vuuel werk Frans v.d.Rijdt en zien dochter zien noow aan de letste kóntroles aan ‘t werke. Dus Veldeke is heejmei drök doonde en weej gaeve zoeë flot meugelik oetsloetsel. Martin Doesborg guuef aan det zeej mit 2 spellinge te make hebbe. Dink maar aan pannenkoek/pannekoek. De vreejwilligers zitte elke waek achter de computer um te werke aan dit waordebook.

Truus Verbong guuef aan det ’t neet Schötterie is maar Sjötterie is.

9.Sloeting:

Niks mier aan de orde ziende bedank Henk Buskes de vergadering veur euren inbring en dank idderein veur de groeëte opkóms en dhr. Luc Wolters neemp ’t noow euver um ’t ein en ander te vertelle euver dit museum.

Notuliste: Anneke van Kleef.

Kers-in 2016

Kers-in de Jongerenkerk Venlo
18 december 2016 um 14.00 oor. Jongerenkerk
Met ’n werm geveul luustere nao ’t optraeje van Ben Verdellen, Thei en Marij de declamatie van de kinder en harpmeziek door Ingrid Reinhoud,de Schrieverskrink Noord-Limburg en ’t koeër van de Jongeenrkerk.

Oeuvrepries 2016 Thei en Marij

Op zaoterdaag 17 september 2016 is de oetreiking van de jaorlikse Veldeke Oeuvrepries veur ’t Limburgse leed.
Tiedes de Nach van ’t Limburgse Leed zal Thei en Marij in ’t zunke waere gezat in Domani Venlo.
Plat aan taofel.
De winnaers van de declamatiewedstried ónderhalde op dae zaoterdaagmiddaag de gaste aan taofel

Theo Sturme en Marijke Verhaag staon noow dertig jaor op de planke en begóste in Tegele eur muzikale loupbaan op de vastelaoves- leedjesmiddaag met ’t behaole van de ierste plaats in 1986 mit Dôw bôs ’t gans
Ouk heejnao, op de leedjesaovende in Belfeld en in Venlo, ware zeej succesvol met ’t behaole van finale-plaatse.
Zeej woorte bekind door 14 jaor op de rie in de finale te staon van ’t LVK(Limburgs Vastelaovesleedjes Konkoer). Det begós in 1992 mit de Sjterrewals, good veur ein iwieëde plaats en in 1993 door ’t winne van dit Konkoer met Unne Late.

’t Zangduo is neet mieër weg te dinke as ’t geit um ’t Limburgse leed. Met het lanceren van eur ierste cd Veur Dich in 1993, kós nemes bedinke det dit ’n hoeëgtepunt zoel waere. ’t Nummer ’t Veldboeket oet dae album, behuurt nog altied tot de meis aangevraogde verzeuknummers beej L1 Radio en de lokale radiostations.

Oeuvrepries 2016 veur Thei en Marij gemak door Mariëlle Franssen

Ode aan Sef Cornet

Veldeke Venlo geit feeste mit ’n Ode aan Sef Cornet.
Veldeke Limburg besteit 90 jaor en haet 2016 oetgerope tot ’t “Jaor van de Limburgse dialekte”.
Daorum bringe weej op op zóndaag 20 en 27 november 2016 ’n “Ode aan Sef Cornet” in de Frans Boermanszaal van de Maaspoort in Venlo
Sef Cornet is de vader van “De Venlose revue” en haet ’n belangrieke beejdrage geleverd aan de Venlose volkscultuur.
Hae had van 1913 wies 1950 groeët succes mit ruum twintig revues en cabaretveurstellinge. Same mit zien broor Mathieu en Sjang schreef hae de tekste en de leedjes. Nao zien ierste optraeje in ‘t “Groeët Cabaret” in 1913 woort hae al flot de houfpersoeën van de veurstellinge. Mit weinig kós hae ‘ne zaal laote bölke van ’t lache. Sef waas amusant, ziene labberjoeks bleef plekke in ’t geheuge van de minse. Nao zien euverlieje in 1953 hebbe weej um langsaam vergaete.
Veldeke brink um weer ónder de aandach mit ’n “Ode aan Sef Cornet.”
In de nao-oorlogse revues hebbe onder andere Annie Renkien, Sjraar Peetjens en Jan van Hoften geacteerd. Mit vuuel plezeer spraeke zeej nog altied euver de gloriedaag van dees, meistal oetverkochte, veurstellinge.
De femilie van Sef haet gelökkig vuuel tekste bewaard die in ’t Venloos Stadsarchief bewaard gaon waere.
Frans Boermans jr., Wim Naus en Sef Peeters hebbe ’n selectie gemak van tekste en leedjes van Sef en Mathieu Cornet nao aanleiding van gesprekke en bewaard materiaal.Venlose tenielspeulers laote same mit regisseur Marnix Mulder de “ Revues” van Sef Cornet herlaeve.

Euver de breurs Cornet