Slumste Venlonaer 2018

Op zóndaag 28 oktober 2018 zóchte weej weer ‘ne nieje slumste Venlonaer.

Feeszaal ut Tref struimde langsaam vol met koppels die de stried taegenein op ginge neme, 32 in totaal. Weej zoge vuuel bekinde gezichte, maar ouk ‘ne gas nieje. Ós activiteit ‘’de slumste Venlonaer’’ wuurt steeds bekinder en populairder.

Veurzitter Henk Buskes äöpende de middaag.

Hans Jacobs had weer schoeëne vraogstökke inein gedreid, 10 ónderdeile in totaal. Dees varieerde van ’t herkinne van bekinde Venlonaere van foto’s en aan de hand van vraoge, ’t spelónderdeil hoeëger of lieëger, meziekvraoge, in welke straot ligge dees winkels?, in welke Groeët-Venlose gemeintes ligge dees attracties? wies ’t aafmake van ’n teikening van ‘ne bekinde Venlonaer. Dit letste leverde prachtige, mei ouk hilarische kunswerke op.

Ouk ware d’r ‘ne gas taalvraoge, te weite ’t jao-nae spelke met Hans Jacobs en Bas Vissers euver de beteikenis van ’n Venloos waord, ’n stökske Venloos dictee, det erg gewaardeerd woort en ’t bekinde waordritse.

D’r woort flink gezweit door de deilnemers en Feeszaal ut Tref zörgde d’r veur det zeej gennen dors hoofde te lieje.

De jury, bestaonde oet Frans van de Rijdt en Veldeke bestuursleje Wilma Janssen en Diana Vullings, had ’t d’r maar drök mei, maar oetintelik ware alle punte geteld. De laptop deej de res van ’t werk.

En toen waas ’t spannende moment aangebraoke van ’t bekind make van d’n oetslaag. Welk koppel ging met ‘ne pries nao hoes? De poedelpries ging nao ’t koppel ‘’11 m2 2’’, Jean-Peter Brizzi en Wim Stoffels, twieë niejkómmers oet Velde. D’n derde pries waas veur ’t koppel ‘’De twieë d’r aaf geweide”, Bert en Jacqueline Driessen. D’n twieëde pries ging nao ’t koppel ‘’Festina Lente’’, Bart Daemen en Huub de Bruin van vastelaovesgezelschap de Törvers en d’n ierste pries ging nao ‘’De twieë Dingskes” vader René en dochter Danee Dings, die deze titel al veur de twieëde kier op eure naam meugde schrieve. In 2016 wónne zeej ouk al.

Toen meus d’r nog gekeke waere wae van ‘’De twieë Dingskes’’ ’t slumste waas. Umstebeurt meuste zeej de beteikenis van Venlose wäörd raoje. Wae de meiste good had, dae wón. Oetintelik waas pap René Dings toch ’t slumste en ging nao hoes met ’n schoeëne oeërkónde. René Dings meug zich dus de slumste Venlonaer van 2018 neume. Veur d’n twieëde kier, want in 2016 behaolde hae daen titel ouk al.

’t Waas ‘ne zier geslaagde gezellige middaag en alles leep op rölkes, mei dankzij de prima verzörging door Feeszaal ut Tref.

In 2019 is ‘’De slumste Venlonaer’’ op zóndaag 27 oktober. Zet deze datum maar ves in óggen agenda. Geej dót toch ouk weer mei?

D’n oetslaag:

In totaal ware d’r 800 punte te behaole.

Heejónder zeet geej d’n oetslaag van alle koppels:

De twieë Dingskes	726 punte	1e plaats Danee en René Dings
Festina Lente	698 punte	2e plaats Bart Daemen en Huub de Bruin
De twieë d’r aaf geweide	694 punte	3e plaats Bert en Jacqueline Driessen
De Fiespernölkes	686 punte
Óngenuuejd	675 punte
De Ketssteinkes	674 punte
Good geraoje	664 punte
De Tölpe	652 punte
De Venlose Poerkers	647 punte
Weej twieë	646 punte
Veur spek en boeëne	646 punte
Noeëts druueg 2	642 punte
11 m2 1	641 punte
De 2 slumste	641 punte
De Waakvlemkes	639 punte
De Goldjoekers	636 punte
Döbbel Gelök	636 punte
Höllewölle	636 punte
De Twiefelaers	629 punte
Uulskukes	627 punte
De twieë G	617 punte
Van den Toep	613 punte
De Flotse	605 punte
Weer die twieë	604 punte
De Theetäötjes	591 punte
De Maasjes	586 punte
JoHan	585 punte
Weej wite ’t ech neet	585 punte
De Schienheilige	581 punte
11 m2 Vrouwluuj	557 punte
MILO	518 punte
11 m2 2	434 punte	Poedelpries Jean-Peter Brizzi en Wim Stoffels

Faatse 2018

Vandaag is ’t hoeëgtepunt van de vastelaovend, d’n optoch. ’t Thema waas: “weej zette alles op de kop” Nao maonde van veurbereiding meuge de deilnemers eur werk aan ’t publiek toeëne. Dit jaor hadde weej de waergode neet mei, veur ’t vertrek van d’n optoch vele d’r al inkele buje en tiedes d’n optoch ouk nog inkele hagelbuje. Det haet netuurlik ouk invloed op ’t aantal minse langs de kant. ’t Waas minder drök as vurrige jaore. Weej as jury van de faatse hadde weer de taak um de orgineelste en kwanste faatse d’r oet te visse. Ouk heej had ’t waer invloed op ’t aantal faatse. Zeej zien toch de krinte oet de pap. ’t Waer had ouk ’n veurdeil, d’n optoch trok waal good door.

Naodet ’t ind van de kleurieke optoch oet ’t zich waas, begove weej ós nao ’t Raodhoes um te euverlegge euver de faatse. Dit jaor ware weej d’r al flot oet. De winnaer noom ’t motto waal hiel letterlik. D’r ware mierdere faatse die ’t motto as thema hadde, maar deze faatse stook baove alles oet. De winnaer van de faatse 2018, Jos Houben met zien motto “Ik zet alles op de kop” Jos bliek in 1965 prins te zien gewaes van de Wortelepin. Naodet weej de winnaer bekind hadde gemak, zoot ós taak d’r veur dit jaor waer op. Op nao 2019.

Veldeke jury Blierick

12 fibberwari 2018, ’t waas weer zoeëvaer, d’n optoch trok door Venlo . Dees reis had Jocus veur bezónder fris waer gezörg, d’r ware ‘ne gas diepvriezers naeve de kant van d’n optoch gezatte mit de deure wage wied aope. Waat ‘ne ozel, maar ’t is ós gegaeve en det kin vaerder ‘ne Venlonaer niks schaele D’n optoch mót trekke en d’r mótte minse naeve de kant staon kieke en zoeë is det.

Veuraafgaonde aan d’n optoch hadde weej as jurie beej de Brasserie aan de Klaosstraot ein “tête a tête” mit Hoeëgheid Herm I en zien adjudante Roel en Wim in ’t beejzien van de wieze raod van elf.

’T Vertrek van de optoch waas dit jaor ’n oor later dan gewind, dus vanaaf de klok van ein trok hae, iers naeve Hoeëgheid Herm I en zien Adjudante Roel en Wim, Jeugd Hoeëgheid Sofie mit eur Adjudante Lynn en Maaike en de wieze raode van elf van Jocus en Jocus Toekomst. Daonao kwaam ’t speul beej Henny en mich naeve. Werkelik waor ’t waas weer ‘ne geweldige optoch, vuuel kleur, meziek en bewaeging, en det ondanks d’n ozel. En dan de faatse, is det d’r eine of telt twieë of zelfs dreej ouk mit? In totaal waare ‘t d’r z’ón 53, 22 echte faatse en 31 spek en boeëne faatse (die ware mit z’n twieë). Maar wie dan ouk, allemaol prachtige creaties, weej hebbe ze dan ouk allemaol ‘n 10 gegaeve. ’T Waas ós gegaeve um det te doon.

Nao d’n optoch, in de Maaspoort, aan Henny en mich de (lastige) taak um tösse allemaol die 10 ’s ‘n 11 te vinde waat dan de winnaer zoel zien. Det is gelök de winnaer is gewaore d’n hier Hans Derikx oet Venlo mit zien creatie:

“DE LETSTE NEUTJES RANG”

Dees verkleidpartie waas actueel – sober – en in einen ougopslaag dudelik. En waat veur ‘ne winnaer!!! Nao de félicitaties van Hoeëgheid Herm I ging d’n hier Hans Derikx efkes (van de wap en emotioneel) achter de jurie op de buun zitte um beej te kómme.

De priesoeétreiking veur de beste faats in d’n optoch van de Wortelepin en Jocus zal plaatsvinden op 01-03-18 in café de Gaaspiep, in ’t beejzien van de juries, veuraafgaonde aan de bestuursvergadering. Beej dees oetreiking zal ouk ’n delegatie van Jocus en de Wortelepin aanwezig zien.

Ós taak als faatsesjurie zit d’r veur dit jaor weer op, volgend jaor (2019) trek weer ‘ne nieje optoch.

Mit vrintelike groete. Faatse jurie 2018. Henny en Wiel (M)

Jaorvergadering 2018

Äöpening door de veurzitter d’n hier Henk Buskes:Van herte welkóm, Henk leet oet det d’r jaomer genóg genne microfoon beschikbaar is. Welkóm op dees algemeine lejevergadering. Oet de, ónder de leje gehalde, enquête bleek det de meiste minse ‘nen doordewaeksen daag plezeriger vónde en de vergadering wuurt noow dus gehalde beej “Beej Benders”. De aanwezige hebbe iers ‘n rondleiding gehad beej “Beej Benders”, die erg intersant waas.
Verslaag van de Algemeine Lejevergadering van 9 april 2017:Zien d’r vaerder aan- of opmerkinge? D’r zien gen aan- of opmerkinge en de notule waere ónder dank aangenaomeBestuursverkezing:
Aaftraejend zien Wiel van Aarssen en Martin Doesborg. De hiere stelle zich weer herkeesbaar.Zeej waere ónder luud applaus aangenaome. Ouk Wiel Maassen wuurt veurgesteld as aspirant lid en de veurzitter leet aan de vergadering oet det hae ein jaor mei geit dreie mit ‘t bestuur.
’t Jaorverslaag van de sikkertaris:Umdet d’r genne microfoon waas, haet bestuurslid Bas Vissers dit veurgelaeze, waat hae veurtreffelik deej.
Jaorciefers 2017 en de begruueting 2018 mit oetleg door de penningefoekser:De ciefers waere geprojecteerd met d’n beamer en ózze penningefoekser Martin Doesborg leet alles oet. D’n hier Hermans: ‘t Aantal opzegginge is erg groeët. Martin leet oet det de gemiddelde laeftied erg hoeëg is en det dit de neteurlike aafvloejing is.Verslaag van de kascóntrolekemissie en beneuming van de nieje kemissie: De kascóntrolekemissie besteit oet d’n hier Wiel Maassen en mevrouw Ria Hermans. Zeej zien op 17 jannewari 2018 beej Martin gewaes. Wiel neump nog efkes alles op en guuef aan det alles klopde en guuef de penningefoekser dechargeDe veurzitter vruueg veur ‘n nieje kaskemissie en lid Tiny Driessen guuef zich op. Tiny Driessen geit same met Wiel Maassen volgend jaor de stökke cóntrolere. Ouk leet Henk Buskes oet det Wiel Maassen waarschienlik in ‘t bestuur kump, maar det hae tot op det moment nog gen officieel bestuurslid isVeuroet kieke op 2018: Henk guuef verslaag van d’n agenda veur 2018.Ria vruueg of d’r neet mier activiteite zien in de zomer. Nae, jaomer genóg nog neet. Maar weej zien d’r waal veur aan ’t kieke.

Róndvraog. Ine Bleijs: In de notule wuurt de Slumste Venlonaer ‘nen taalwedstried geneump. Ine Bleijs vindt dit dus gaar neet. Weej neme dit mei.Cursus Venlo.D’n hier Hermans vruueg veur ‘n kedobón um eventueel aan te beje. Henk vermeldt det dit waal kin, ouk eventueel veur ‘n lidmaatschap. Dit wuurt meigenaome in ’n bestuursvergadering.Frans van de Rijdt vruueg of aan de cursiste meschiens 1 jaor gratis lidmaatschap aangebaoje kin waere. Dit neme weej mei. Pieter zag det dit akkoord is vanoet Veldeke Limburg.Lei Geraards: Is ’t waat um Kroedwisse te gaon verkoupe? Ouk bv aan de Heemkundevereiniginge. De Kroedwis en d’n bookhandel? Verkoup? Meschiens beej de Bieb ‘n paar neerlegge. De wachkamers beej d’n tandarts etc. Ouk dit wuurt meigenaome. Ria Hermans haet ’n opmerking euver de Venlose scheurkelender. Deze wuurt neet door ós gemak.Frans van de Rijdt vruueg of d’r ‘n koppeling meugelik is tösse Veldeke en de Heemkunde. Henk neemp dit mei.D’n hier Hermans: wao plaats geej de activiteite? Henk vertelt det Facebook op dit moment groeët is. Ze staon ouk op de website.Ger Sternheim: Verjónging, dao mót geej aan gaon werke. Det klop. ’t Blief lastig um jónge minse beej de club te kriege. Henk vertelt wie ze um vroge. Ouk hae waas van meining det ’t ‘n “alde clubke” waas.Ein veurdeil”: De jónge minse waere ouk ald.Mevr. Hermans vruueg of weej neet actiever kinne zien met lejewerving? Weej neme dit ouk mei, meschiens met declamatie, Nach van ’t Limburgse Leed etc.Frans waas aafgeloupe maondaag beej de veurrónde van de declamatie gewaes. De kinder deje ’t fantastisch. Maar hae vónd ’t aantal erg weinig, ouk in de finale. Dit haet ózzen aandach. Meschiens is ’t waat um de kinder ‘n programma (Veldeke veur jóngere) m.b.t. Dialek, gedichte en andere aktiviteite aan te beje.Piet Steunenberg: de bieb in Tegele wuurt verplaats. Meschiens kin Veldeke beej de äöpening gepromoot waere.Martin luuet efkes de Veldeke-website zeen en waat d’r allemaol kin. ’t Veugelke op de website is ’t veugelke van Sintermerte, d’n iesvogel.Anbi: Veldeke is ‘n algemein nut beogende instelling. Volges de belastingdeens kin ’n schinking aan ein anbi vereiniging aafgetrokke waere van de belasting.Op de website steit ouk de begruueting. Dit is verplich veur ’n anbi-vereiniging. De ciefers mótte aopenbaar zien. Martin luuet zeen waat d’r allemaol op de site steit, ouk de geschiedenis.De website hebbe weej zoeë mekkelik meugelik opgezatte. Martin haet heej vuuel werk aan gedaon. Ouk Facebook wuurt vuuel bekeke.Sloeting.Henk bedank veur d’n opkóms.

Herteliken dank aan Beeh Benders veur de gasvreejheid. En veur strakkes good thoes. DANKEWAAL.Notuliste Anneke van Kleef.

Kers-in 2018

“OP WAEG NAO KERSMIS”
’t Wuurt weer gehalde in Grand Café Onder de Linden op Auxiliatrix van 14.00 oor tot óngevier 17.00 oor. Veldeke haet veur dees plek gekaoze zoeëdet ouk de bewoeëners van de Horstgraaf dao nao toe kinne gaon
Deze middaag traeje de volgende artieste veur óg op:

Fried van Maasakker, doedelzak
Piet Hegger, zang
Inkele kinder, veurdrach
Zanggroep Shangri-La met “Kerstmis met ’n knipoog”
Striekers van Kunstencentrum Venlo, meziek
Truus Jacobs, gedichte
Zeej bringe ein aafwisselend programma van instrumentale en vocale meziek en moeëje veurdrachte.

Oeuvrepries 2018 Gé Reinders

Op 15 september um 20.15 uur krieg Gé Reinders de Veldeke Oeuvrepries van ‘t Limburgse Leed in de Venlose Maaspoort. De Veldeke Oeuvreprijs wuurt veur d’n twelfde kieër door Dialekvereiniging Veldeke Venlo aangebaoje in de Nach van ’t Limburgse Leed. Dees onderscheiding wuurt idder jaor toegekind aan ‘ne persoeën of groep mit jaorelange verdeenste veur de Limburgse dialekmeziek De winnaer krieg ein kunswerk gemak door Mariëlle Franssen en ‘n oorkónde.
Gé: Prachtig det ik juus noow zó’ne moeëje pries krieg. Weej hebbe net mien letste CD opgenaome en staon aan ‘t begin van mien aafscheidstournee. ’t Is precies op ’t juuste moment en de Veldeke Oeuvrepries veult as ‘ne zier iervolle kroeën op mien werk.
Nao det feestelik moment prissenteert Gé zien nieje CD Oetblaoze in ein optraeje van 45 minute mit Het Orkest van de Nederlandse Douane ónder leiding van Björn Bus, wao Oetblaoze mit is opgenaome. Gé zal dan de ierste CD aan Felix Meurders aanbeje.
Gé: Op mien allerierste Limburgstalige CD zóng ik ‘n leedje wao Meurders ‘n belangrieke rol in speult. ’t Veult good aan um noow miene letste album aan Felix aan te beje . Ik bin gruuets op dees oetveuring. Moeëje meziekbewerkinge; waat ‘n orkest en waat ‘ne dirigent. ‘t Orkes besteit veur bald de helf oet beroepsmuzikante en de andere helf zien top-amateurs, die beej de Douane werke. Björn en ik hebbe hiel hard nao de opnames toegewerk. En det huur se!

Bezeuk aan ’t Jean Laudy museum in Venlo

Op 18 november 2018 brachte weej as Veldeke Venlo ’n bezeuk aan ’t Jean Laudy Museum aan de Groeëte Kerkstraot in Venlo.

Dit waas um zoeë maar te zegge op snippenäörtje, want det museum mót dees locatie, de kepel van ’t Ald Weishoes ( neet ’t Alde Menkeshoes) zoeë as ’t d’r noow naor oetzuut op 01-01-19 verlaote.

“n 22 tal leje / donateurs en introducés woorte op dae middaag verras op ’n mier dan oetveurige oetleg euver ’t laeve, ’t werk en de beteikenis van det werk van de Venlose kunstenaer ( schilder) Jean Laudy door mevrouw Maria Albers. Neteurlik woort idderein ouk in de gelaegenheid gebrach um vraoge aan Maria te stelle.

Dit museum is nóg gehoesves in, laote we maar zegge, de kepel van ’t Ald Weishoes. Ein werkelik prachtig moeëj bewaard gebleve kepel. Dees kepel allein is al ’n bezeuk aan dit museum waerd. Maar ’t ging neteurlik um ’t werk van deze Venlose Schilder, en dao hóng de kepel vol van. Jaomer genóg meugde weej gen fotós make.

Nao ’n oor waas de róndleiding/oetleg gedaon ’t museum besteit feitelik maar oet ein ruumte en det is de kepel en ging ’t gezelschap um d’n hook nao kefee de Gaaspiep um nog effe nao te praote.

’t Waas ‘ne good bestaejde middaag.

Wiel Maassen

Verrassende Stadswandeling

Op 26 augustus j.l. waas ’t dan zoeëvaer, de zomeractiviteit van Veldeke Venlo woort nie laeve in geblaoze. En waal in de vorm van ’n verrassende stadswandeling. Óngevier 40 leje / donateurs en introduce’s hadde zich veur dees wandeling aangemeld, d’r woort dan ouk in twieë groepe gewandeld en dan ouk nóg zónder zich in de waeg te loupe. Det beteikent det d’r twieë routes waare, mit twieë gidse die ouk nóg allebei Wiel hoote. Maar good ,groep ein starte zoeë rónd twieë oor beej ’t Limburgs Museum en groep twieë starte op de zelfde tied vanaaf ’t parkierplaetske veur ’t UWV gebouw.

’N Stadswandeling, mak niks oeét wao die begint löp altieëd naeve min of mier historische plekskes of sträötjes van Venlo. Zoe ouk dees Verrassende Stadswandeling. Maar waat waas d’r dan zoeë verrassend aan? Det waare de intermezzo’s wao de deilnemers onderwaeg van kóste geneete en ’t afsloetende intermezzo op ’t ind van de wandeling.

De twieë wandelinge waare zoeë geregeld det de deinemers onderwaeg as groep aafzónderlik van ’t gebaoje intermezzo kóste geneete. Det wilt zegge det, zeej die dees intermezzo’s verzörgde, det dan ouk twieë kier meuste doon. Op ’t ind hoofde det neet want ’t waas zoeë geregeld dat veur beide groepe ’t zelfde ind waas. De deilnemers aan dees Verrassende Stadswandeling hebbe ‘t ‘ne leuke middaag en ’n leuke wandeling gevónde, det bleek oet de reacties die weej as organisatie beej ’t naopraote op ’t ind hebbe gekrege.

Waat is d’r dae middaag gebaoje aan de deilnemers? Op de ierste plaats ’n gezellige wandeling. ’T waas dan ouk nóg prachtig waer, maar erg drök in de stad en det kwaam door diverse andere activiteite die georganiseerd waare. De deilnemers zien langs diverse wiegtige stökskes Venlo geleid en hebbe dao dan ouk oetveurig informatie euver gekrege maar, en det is hiéél leuk, ouk informatie aan de gidse truuk gegaeve. ’T Verrassende deil waas wie gezag de intermezzo’s D’r waas ‘ne stop geregeld beej café Floris op ’t Helschriksel, jaomergenóg haet dit café in september mótte sloeéte. Beej deze stop krege de deilnemers ’n consumptie aangebaoje en d’n hier Hegger oet Arcen haet veur de deilnemers ’n gas leuke ( herkinbare) leedjes gezónge. Zoeé herkinbaar det de deilnemers spontaan mit ginge zinge ( of mót ik zegge galdere) ‘n mier dan geslaagd intermezzo, veural gezeen ’t gegaeve det ’n wesp d’n hier Hegger nuuedig in zien tóng meus staeke. ( wie is ’t meugelik hé) D’n twieëde stop waas beej Restaurant Prins Bernhard aan de Gelderse Poort. Heej woort aan de deilnemers koffie mit flaai geserveerd en woort door de Schrievers Krink leuke verhaole oeét eige werk veurgedrage. Ouk dit intermezzo waas mier dan geslaag.

Iddere wandeling kump op’n ind zoeë ouk dees Verrassende Stadswandelinhg. Det ind loog op ’t terras van Café de Klep aan de Flóddergats. Ouk heej krege de deilnemrs ’n consumptie gepresenteerd en idderein woort toen verrast door ’n bizónder leuk en geslaag optraeje van de zuskes Floor en Merel Kauffman. Zeej zónge veur de deiilnemers (en veur de andere gaste op ’t terras), ’n riedel Venlose ( vastelaoves) leedjes die veur mit zinge (of galdere) nuuedigde. Op ’t ind zónge de zuskes ouk nóg ’n paar leedjes oeét eige werk, maar dees leedjes ware waal in ’t Ingels.

Al mit al waas ‘t ‘ne gezellige middaag en dao door ’n mier dan geslaagde activiteit.