Verslaag van de finale declamatie op 22 maart 2013 in de Venlonazaal.
As ierste wil ik vermelde, det weej ’t óntzettend toef vónde det d’r zoeë vuuel kinder hebbe mei gedaon met de veurselektie. In totaal ware d’r 117 kinder van de basisschoeële in Venlo en Blierick , dao zien weej súper en kei bliej mei! Nao de dreej spannende veurróndes zien d’r oetintelik 42 kinder door gegaon nao de finale, weej hebbe ’t éch meujlik gehad, want d’r zote dit jaor éch einen hielen houp goje talente tösse. Vriedaagaovend waas ’t dan zoeë wied, de zaal leep lekker vol met mama’s, papa’s, zuskes en breurkes, oma’s en opa’s.
De schrievers zote ouk gezellig veuraan in de zaal, die kóste genete van eur gedichjes en de jurieleje kwame dit jaor van stichting OB de Woers, Vincent Tabbers, Marcel Abrahams en Pim Kleeven. Diana Vullings heel de puntescore beej op de computer. De spanning waas um te snieje en um zeve oor begós ózze nieje veurzitter Henk Buskes met ’t veurwaord, det waas veur um ouk d’n ierste kier, súper gedaon Henk! Hans Jacobs noom de prissentatie euver en de finaliste van aafgeloupe jaor mochte eur winnend gedich nog ens opzegge um de aovend mei te beginne. Det waas Quin Schatorié met: Kauwgum, Sjraar Timmermans met: ein niej kiendje en Julia Seetsen met: Kerboet.
Wie dees kinder klaor ware kóste die weer beej pap en mam wachte wies ze aan de beurt kwame en begós Hans Jacobs met de finale!! De kinder woorte per zes opgerope en achterin de zaal meuste die zich opstelle beej Nellie (det waas ‘n oma van ein kind) en kwame zeej nao veur geloupe, idderein dae klapde en ging staon…. zeej veulde zich éch gruuets. Aaf en toe kós ik de hertjes hure bónke op de buun, zoeë spannend vónde de kinder ‘t… én dit is trouwes ’t ierste jaor det ik zoeë weinig hoofde te soufflere, ze kóste eur gedich allemaol oet eur köpke, knap huur…. veural die groeëte met eur lank gedich! Toppie.
Nao aafloup van eur gedich kóste ze beej Tiny Driessen ein kónsumptiebón, oeërkónde en ein kedootje haole. As de kinder met eur gedichje bezig ware, hoors se gen speld valle, de zaal waas muuskesstil! Chapeau…. det hebbe we neet ierder meigemak zó’n aandach veur ’t kind. In de pauze hebbe we weer kinne genete van de buut van Juul en Sjraar, hiel erg toef, de zaal loog in einen deuk. Nao de pauze waas de andere helf aan de beurt, maar, maar…. wat ware ze allemaol good vanaovend!!
De jurie haet ’t met de puntetelling erg meujlik gehad, ze vónde ’t nivo erg hoeëg, det zag ouk de schriever van Tegele Franc van Baar, dae veur ’t iërs de declamatie in Venlo haet gezeen, hae had ’t neet wille misse! Wie alle kinder gewaes ware, meuste weej nog efkes wachte op de punte die Diana in de computer meus verwerke en wie ’t zoeë wied waas, woorte de winnaers bekind gemak…. Op van de zenuwe ware zeej!
Oet ’n zier geslaagde deklamatiefinale zien de volgende winnaers gekómme:
Ónderbouw
| 1e Pries | Eefke Koninkxs | de Springbeek | met “ Oet aete ” |
| 2ePpries | Kiki Severijns | St. Martinusschoeël | met “ Wasse ” |
| 3e Pries | Chakir Ou Oumar | De Zuidstroom | met “ Truuske “ |
Middebouw
| 1e Pries | Sjraar Timmermans | St. Martinusschoeël | met “ de Schaatsplank ” |
| 2ePpries | Quin Schatorié | Willibrordusschoeël | met “ De klas oet “ |
| 3e Pries | Milou Ooms | ‘t Palet | met “ Gebete “ |
Baovebouw
| 1e Pries | Juul Brueren | Talentecampus | met “ Op kamp “ |
| 2ePpries | Julia Seetsen | Schoeël met d’n Biebel | met “ Sef en Sofie “ |
| 3e Pries | Isa Schatorié | St. Willibrordusschoeël | met “ Groep 8 “ |
Dit waas wéér eine ónvergaetelike aovend wao weej hiel gaer op truuk kieke! Ziet geej d’r volgend jaor weer allemaol beej ? Zeg ’t gerös taege óg (klein)kinder, nichjes of vriendinkes, die neet mei deje, det ’t éch kei leuk is um mei te doon, dan zeen we die ’t volgend jaor ouk!!
Hojje!
Annemie Schleepen-Schweitzer
Dialekvereiniging
Veldeke Venlo/Organisatie Declamatiewedstrieje