Cursus Venloos dialek veur beginners

Met ingank van 13 april 2024 organiseert de Bibliotheek Venlo in samewirking mit Veldeke Venlo ‘ne cursus Venloos dialek – veur beginners.

De cursus ‘Leef Limburgs Groeët-Venlo’ mak deil oet van ’t onderwies LT2 (Limburgs als tweede taal) det in ’t ganse Limburgse taalgebied gegeve wuurd. De lesdaag zien op zaoterdaagmorge van 10:00 wies 12:00 oor

Klik heej voor mier informatie en aanmelding.

Algemeine lejevergadering op 25 april

Heejbeej nuueje weej alle leje en dónneteurs veur de Algemeine Lejevergadering 2024 van Veldeke Venlo. Dees vergadering wuurt gehalde op dónderdaag 25 april 2024 um 20.00 oor in Stadsherberg Ald Weishoes aan de Groeëte Kerkstraot 31. Vanaaf 19.30 oor steit de kóffie mit flaai veur óg klaor in “De Kapel” van ’t Ald Weishoes.

Veur dees algemeine lejevergadering mót geej óg via de mail [email protected] aanmelde. Zit in ’t ónderwerp van d’n e-mail: aanmelding veur de vergadering van 25 april aanstaonde.

D’n agenda zuut d’r as volg oet:

  • 1.  Äöpening door de veurzitter um 20.00 oor.
  • 2.  Jaorverslaag van de sikkertaris.
  • 3.  Bestuursverkezing.
    Aaftraejend zien Bas Vissers as veurzitter a.i en as algemein bestuurslid en Wiel Maassen as bestuurslid.
    Eventuele kandidate veur ein bestuursfunctie kinne zich melde beej de sikkertaris.
  • 4.  Jaorciefers van 2023 en de begruueting van 2024 mit oetleg door de penningmeister.
  • 5.  Verslaag van de kasketrolekemissie.
  • 6.  Bestuursmeideilinge.
  • 7.  Veuroetkieke op jaor 2024 c.q. agenda 2024.
  • 8.  Róndvraog: as geej vraoge heb, gaer veur 22 april via d’n e-mail nao ’t sikkertariaat steure.
  • 9.  Sloeting.

Oetslaag winnaers Faatse 2024

De optochte in Blierick en Venlo hebbe weer getrokke. De zjurie beej d’n optoch van de Wortelepin bestónd oet Henny, Henk en Jos en nao aafloup hebbe zeej de faatse bespraoke en beoeërdeild. Ze ware d’r toch flot oet wae de winnaer is gewaore: Hay Goerts mit as motto Flaai inspectie.

Beej de groeëten optoch van Jocus ware de zjurieleje Frans, Henny en Joep. Zeej zoge ruum twintig faatse mit stumming, originaliteit en kleur, neet te gluive! ’t Waas dan ouk neet ech gemekkelik um dae faatse 2024 oet te zeuke. Oetintelik veel de keus op Toën Feyen mit zien creatie: Flex Valentien.

De oetreiking van de prieze vindt op ein later moment plaats umdet nog iers de beeldjes mótte waere gemak.

Dank aan de zjurieleje en op nao de optochte van 2025. Ein zjurie-opmerking nog: “nae…’ne jeugdige faatse hebbe weej dit jaor neet gezeen, maar weej gaeve de mood neet op en haope op volgend jaor…..”

’n Oetgebreid verslaag kump in de iersvolgende Kroedwis.

Niej: online-cursus Venloos laeze en schrieve

Nao vuuel vraoge waoge weej ’t weer ens:
Online-cursus Venloos laeze en schrieve online – maart – mei 2024

Locatie: thoes, achter óggen eige computer

Docent: Bas Vissers, Veldeke Venlo

Koste (inclusief cursusbook en certificaat): €75,- veur neet-leje, ós leje (*) betale €50,-. Materiale krieg geej thoesbezörg.
Tiedstip: vanaaf maondaag 4 maart 19.00 wies uterlik 20.30 oor. Minimum aantal deilnemers: 20

Veurkinnis: de cursus werk ’t beste as geej al thoes ziet in ’t Venloos (of enig ander Limburgs) dialek.

Vanaaf maondaag 4 maart 2024 organiseert Dialekvereiniging Veldeke Venlo einen online-cursus Venloos laeze en schrieve. Deze cursus besteit oet 7 lesaovende van maximaal anderhalf oor wao geej dees twieë vaardighede van ’t Venloos dialek beejgebrach krieg.

Deze zal gegaeve waere in ein google-umgaeving: naeve de computer of tablet heb geej ein google-account (gratis te kriege) nuuedig. Op ’t platform Classroom van google vindt geej dan ’t aanvöllende cursusmateriaal zoeë wie video’s die euver de cursus gaon, aanvllende materiale en op ’t ind van ederen aovend ein paar korte vraoge um te kieke of alles helder waas. De beejeinkómste waere via de camera gegaeve via google-meet.

As geej interesse heb um heejaan mei te doon, dan kint geej óg opgaeve vanaaf 18 december 2023 via https://veldekevenlo.nl/aanmelde-online-cursus-venloos/. Nao betaling van ’t cursusgeld krieg geej dan de aanmeldgegaeves veur de classroom en de weblink veur de camera-meetings.

’t Is aan te bevaele um ouk ech alle aovende te volge. De cursus is zoeë opgebouwd det d’r op basis van ’t veuraafgaonde nieje informatie wuurt toegevoog.

Op ’t ind van de cursus wuurt d’r van óg verwach det geej ein Meisterstök schrief in ’t dialek.

As geej det heb ingeleverd, dan krieg geej op ’t lets van de cursus ouk ein certificaat (thoesgesteurd).

________________________________________

(*) Lid van Veldeke waert geej door óg aan te melde op https://veldekevenlo.nl/kontak/aanmelde/. De koste zien €28,- veur ein jaor as geej volwaerdig lid wilt waere. Donneteurs (Vrinde van Veldeke Venlo) betale jaorliks €15,–. Beej deilname aan de cursus is ’t ierste jaor ’t lidmaatschap gratis.

De slumste Venlonaer 2023 is….

In eine bómvolle zaal ’t Tref woord op 29 oktober de kwis “de slumste Venlonaer” gehalde.

Kwismeister Hans Jacobs had weer 10 kwante vraogerundes oet d’n aek gedreijd zoeëas ‘ne waordzeuker, waor of neet waor, straotname puzele en waat wit geej van…?

Nao haos 3 oor lank gepieker, gesmiespel, veurzegge, hölpeloos róndkieke, schrieve en teikene door de 25 teams kwaam de zjurie mit de volgenden oetslaag:

1e plaats: de Vrouwluuj van… bestaonde oet Jacqueline Driessen & José van Gestel

2e plaats: Óngenuuejd bestaonde oet Henriëtte Bakker & Jos Vullings

3e plaats: 2 teams geliek te weite Noeëts Druueg II met Ton Janssen & Joep van Kleef en Nog eine dan… bestaonde oet Sandy en Tjeu Driessen

Um oet te make wae de slumste waas meuste de dames van ’t winnende koppel eder veur zich bepaole of de verklaoring beej ’t door Hans geneumde Venlose waord waal of neet juus waas. Mit 1 punt verschil wón Jacqueline en is daomei de slumste Venlonaer van 2023.

Veur de leefhebbers van ‘ne gezellige en lierzame middag mit weiteswaerdighede euver Venloos plat en van alles en nog waat euver Groeët Venlo, noteer vas 27 oktober 2024. Dan is de volgende editie.

De slumste Venlonaer 2023!

Op zóndaag 29 oktober 2023 um 14.00 oor zuk Dialekvereiniging Veldeke in ’t Tref, Hendrikxstr. 17 in Venlo weer “de slumste Venlonaer’’.

Ózze Kwis Meister: Hans Jacobs

Wae van óg wuurt de slumste Venlonaer van 2023?

Wilt geej óg kinnis van Venlo op de proof stelle, doot dan ens mei met deze geweldige kwis mit foto’s, items euver van alles en nog wat det mit Venlo te make haet, dialek, cultuur, de stad zelf, historie en neum maar op.

Koppels kinne zich aanmelde veur deze ludieke, joeksige, spannende middaag via ós site. Messchiens zien d’r aan de zaal nog waal ’n paar plaetskes vreej op 29 oktober 2023 vanaaf 13 .30 oor. De koppels die meidoon mótte ’n bietje herkinbaar zien mit beejveurbeeld ’t zelfde hudje of dezelfde sjaal. Bedink veur óg koppel ‘ne kwante naam! Zörg heej waal veur, want ’t is dit jaor ein onderdeil van de kwis!

De koste zien € 7,50 per inschrieving/koppel.

’t Is kwant um mei te doon. Det hure weej idder jaor van de koppels die meidoon en de luuj die kómme kieke. Eine kier meidoon en geej ziet verkoch!

Zeen weej óg op 29 oktober?

Schrief óg op tied in, want vol=vol. Wae dörf?

Aanmelde kin heej!

Oeuvrepries 2023 veur De Drekskaters

De Venlose formatie De Drekskaters krieg dit jaor de Veldeke Oeuvre-Pries van ’t Limburgse Leed. De groep, dae al decennialang actief is, wuurd mit de prijs geieërd veur eur umvangriek oeuvre en eur verdeenste veur ’t Limburgse leed. De band ontvink de pries op dónderdag 14 september tiedes de Nach veur ’t Limburgse Leed, eine speciaal vanoet de Nach van ’t Limburgse Leed opgezatten aovend beej kefee De Blauw Trap in Venlo. Vanaaf 20.30 oor waere De Drekskaters in ’t zunke gezatte en óntvange ze de Veldeke Oeuvre-Pries, D’n band traejt ouk op. Dezen aovend is taeves de sponsorborrel en vrinde-aovend veur de Nach van ’t Limburgse Leed, maar is ouk vreej toegankelijk veur andere geïnteresseerde.

De Drekskaters
De Drekskaters is de oudste, en nog immer actieve Venlose dialectband. De groep wordt in 1982 opgericht als The Trashcats, en in 1984 wordt de naam veranderd in De Drekskaters. In datzelfde jaar verschijnt de debuutsingle Rok en rool duit ’t gans. Rock ’n roll en rockabilly vormen de rode draad in de loopbaan van de Drekskaters, maar ook andere muziekstijlen spelen een rol. En er is nog een stabiele factor: alles wordt gezongen in het Venloos dialect. Tot de klassiekers behoren nummers als In dees stad, Blief van zien beer, Stök in miene geeter en natuurlijk de Venlose Revue-cover Getske van gelök. Optredens van de energieke Drekskaters swingen nog altijd: de band staat, mede dankzij de zo herkenbare zang van Marco Schell, als een huis en weet al decennialang overal sfeer te brengen. Je zou De Drekskaters zelfs kunnen beschouwen als de moeder van alle Venlose dialectbands: elke latere act is zonder enige twijfel schatplichtig aan de groep, die niet weg te denken is uit de lokale muziekscene.

De huidige formatie bestaat uit Marco Schell, Roger Corneille, Mylène Schrijen, Werner van Gool, Charles Coppens en Duncan Tilmans.

Motivering Dialekvereiniging Veldeke Venlo
Veldeke Venlo-voorzitter Bas Vissers: ‘De Drekskaters, dat is waar de huidige Venlose dialectmuziekgolf zijn oorsprong heeft. Zij hebben één van de eerste stenen gelegd voor het tegenwoordige bouwwerk van de Venlose dialectmuziek. Zij zijn de inspiratie geweest voor heel wat groepen die na hen zijn gekomen, die ook weer heel andere wegen zijn ingeslagen. De Drekskaters hebben altijd hun eigen rockabillystijl gehouden en onze Venlose taal verrijkt met flink wat mooie woorden en uitdrukkingen die min of meer aan hen zijn gaan toebehoren: ‘ein stök in miene geter’ en ‘blief van mien beer’ worden bijna automatisch gekoppeld aan deze formatie. Ook zijn zij een soort broeinest geweest van talent: uit hun midden zijn heel wat goede muzikanten geboren en deze muzikanten hebben weer elementen van hun stijl meegenomen naar de groepen waar ze nu in spelen. Kortom, De Drekskaters als wegbereiders voor de alternatieve Venlose muziek buiten de vastelaovend verdienen deze prijs als geen andere groep. Het is dan wel een oeuvreprijs, maar wij hopen natuurlijk dat zij hun instrumenten nog lang niet aan de wilgen hangen en nog tot in lengte van jaren doorgaan. Wij zien de Oeuvre-pries dan ook als een Veuraldoorgaon-pries.’

Reactie De Drekskaters
De bandleden reageerden blij verrast nadat ze door Veldeke Venlo werden benaderd. Zij voelen zich verguld met de prijs en zijn trots dat hun oeuvre op deze manier bekroond wordt. Zij nodigen dan ook iedereen die de band een warm hart toedraagt uit om op 14 september aanwezig te zijn bij de uitreiking en daar ook te komen genieten van een spetterend optreden.

’t Beeldje van Mariëlle Franssen

Toespraok Bas Vissers beej de oetreiking

Beste minse, en veural zier geachde laureate van de Veldeke-oeuvrepries 2023, geweldig det geej heej ziet!

Van herte welkóm heej venaovend beej de Blauw Trap op de Nach veur ’t Limburgse Leed.

Weej van Veldeke Venlo zeuke eder jaor nao artieste die weej d’n Oeuvre-pries oetreike. En det mótte neteurlik minse zien die ambassadeur zien van en veur ós Limburgse taal, ós moeje dialek. Det weej dit jaor eine laureaat hebbe oet ós eige taalzône ouk nog ens, duit mich bizónder good.

’t Dialek steit ónder drök. Ik will óg neet vervaele met statistieke wao oet det bliek, maar as we neet oetkieke en alles maar gewoeën op zien beloup laote, dan kin ’t good zien det d’r euver 50 jaor nog maar 15% van alle Limburgers ós dialek spraeke. En weej doon d’r, as Veldeke, det besteit oet eine gas kringe, waovan Venlo d’r eine is, alles aan um ’t oetsterve van ós moeje dialek taege te gaon.

Aan de band van venaovend zal ’t zeker neet ligge: as sinds 1982 duit deze groep d’r alles aan um ós taal hoeëg te halde. De ierste 2 jaor hadde zeej einen andere naam, maar sinds 1984 gaon de bandleje venaovend heej verzameld door ’t laeve as de Drekskaters, en allein al deze naam verdeent eine pries. Det de naam volledig de lading dek, hebbe weej tot uting laote bringe door Marielle Fransen, det heej ein sjiek beeldje van haet gemak, en we kinne gerös stelle det det op maot is gemak. Kiek dalik maar ens good.

Waorum hebbe weej veur de Drekskaters gekaoze um ózze oeuvrepries oet te reike? Nou, ik hald ’t kort: zeej hebbe ein oeuvre wao weej gruuets op zien, zeej staon al vuuele jaore op de bühne veur ós allemaol, en zeej hebbe ós taal verriek met diverse oetdrökkinge die eigelik haos op eur truuk zien te herleide. As emes ’t haet euver ein stök in de geter, dan huur ik geliek de saxofoon en daonao de stum van Marco Schell dae dan zaet: had ik gister weer ein feesje, en heb vandaag neet mier gepees (maar det is dan mss waal veur morge)…….

Ouk hebbe de Drekskaters, met eure zier karakteristieke sound, zichzelf min of mier as genre neergezatte. As ik oetleg aan jóngere wae Elvis waas en waat veur meziek hae makde, of waat Rockabilly-meziek is, dan zeg ik: det klink wie de Drekskaters. Want dèt kinne ze waal.

En waat ik ouk neet óngeneump wil laote: de Drekskaters ware de ierste die boete ’t traditionele Hoempapa-paad zien gaon experimentere met tekste in ’t dialek. Det haet euveriges geleid tot eine waore golf van Venloostalige bandjes, en as weej ’t hebbe euver ambassadeursschap, dan is det waal ein van eur groeëte verdeenste. As ós Venloos euver 50 jaor nog maar ein marginaal gespraoke dialek is, dan leet det zeker neet aan eur. Maar as euver 50 jaor ’t Venloos nog steeds floreert en as d’r dan nog mier minse ós moeje dialek spraeke as det ze det noow doon, dan kós det ónder andere zoeëmaar kinne kómme door eur.

Beste minse, ik rónd aaf: weej van Veldeke make ein hiele depe buiging veur ós Helde van de Drekskaters, en weej haope det dezen Oeuvrepries, naeve ein erkinning veur eure geweldigen inzet veur ós moeje Venloos dialek, ouk eine stimulans is um nog hiel lang door te blieve gaon met wao geej good in ziet: Venlose meziek make.

En noow op nao det stök in dae geter, det weej haopelik strakkes hebbe!

Van herte perfietsia!




Fietse mit Veldeke Venlo

Ein route oet de alde doeës in Venlo (2004)

Gaer nuueje weej óg heejveur

Wennier : Zóndaag 8 oktober 2023

Startpunt : Grand Kefee Maagdenberg,

Tiedstip : 12.00 waert geej verwach

Betaling : veur betale kiek heejónder beej Koste.

We starte mit ’n lekkere tas kóffie en ’n stök flaai

Lingte Fietstoch : ca. 30 km

Indpunt : Grand Kefee Maagdenberg

Beej aankóms krieg ge 2 cónsumptiebónne en iets lekkers veur beej d’n borrel.

—-

Vertrek tösse 12.45 (in gruupkes van 4 persoeëne) en aankóms uterlik 16.30 oor

De route van de fietstoch wuurt óg oetgereik beej de start.

Opgaeve veur de fietstoch : gaer uterlik veur 25 september. Aanmelde is nimmer meugelik!

Koste :

De eige beejdrage is € 10,00 pp veur leje/dónneteurs

Beejdrage veur neet leje/dónneteurs € 12,50 pp

Naodet geej óg opgegaeve heb, deent geej ’t bedraag veur 25 september euver te make op raekening van Veldeke Venlo.

NL04INGB0004298115
t.n.v.: Dialekvereiniging Veldeke Venlo
o.v.v.: ógge naam

Alves vuuel plezeer names de organisatie

De fietsbel

Cursus Venloos start in naojaor 2023 (VOL!)

Weej organisere vanaaf dinsdaag 10 oktober 2023 weer ‘ne cursus ‘Venloos laeze en schrieve’ beej Gilde opleidinge, Laaghuissingel 4, 5913 ES Venlo. De (7) data zien: 10, 24 en 31 oktober, 7, 14, 21 en 28 november. Aafsloetend vindt nog ‘n gezellige certificaatoetreiking plaats örges in januari 2024. Aanvang van de lesse is um 19:30 oor en ze deure óngevier 90 minute. Docent is Bas Vissers.

Vaerdere informatie steit beej de betreffenden datum in d’n agenda.

Inschrieve is nimmer meugelik

Finale Declamatiewedstried Limburg

Veldeke Limburg organiseert jaorliks ’ne declamatiewedstried veur kinder van de basisschoeël. In verschillendje laeftiedscategorieje kómme lierlinge van diverse schoele op ’t podium um einen teks (proza of poëzie) in ‘t dialek veur te drage. Ein deskundige zjurie kees oet de deilnemers ’ne winnaer.

Naodet 3 jaor lank gen finale gehalde kós waere door Corona, kós det op 3 juni gelökkig weer waal. Ein bizóndere finale umdet Omroep Peel en Maas dees rechstreeks haet oetgezónde.

Veur ‘t bekieke van de rechstreekse oetzending van Omroep Peel en Maas: heej klikke

Op de site van Veldeke Limburg steit ’t ganse verslaag te vinde: klik heej

De Prieswinnaers

Groep 3/4

1 Noud Laumen van de Krink Ech/Susteren
2 Saar Janssen van de Krink Remund
3 Ize Willems van de Krink Venlo/Tegele

Groep 5/6

1 Thomas Laumen van de Krink Ech/Susteren
2 Inez Ermans van de Krink Ech/Susteren
3 Bente Daniels van de Krink Venlo/Tegele

Groep 7/8

1 Luuk Kuijpers van de Krink Wieërt
2 Suze Golsteijn van de Krink Ech/Susteren
3 Lynn Helmes van de Krink Venlo/Tegele

De aanmoedigingspries waas veur Lot Geerlings van de Krink Wieërt