Faatse in de Venlosen Optoch 2025

De faatse ware weer de krinte in die vastelaovespap! D’r ware d’r gelökkig weer genóg beej: vrouwe, manne en kinder, allemaol verkleid in de meis moeëje, kleur- en fantasierieke creaties. As jury veur de faatse zoge weej veurbeej kómme: ‘nen baeker daeler, de zónnekeuning, dames mit prachtige blomeheud, dames mit ’n prachtig kleid det binnenin gans versierd waar, manne die ze neet lete vlege, dansmeriekes mit sjieke pekskes en ‘ne plissé rok, ‘nen trekzak, emes dae neet mei deej, en nog vuuel mier………

Nao lank euverleg hebbe weej beslaote um de pries van dit jaor toe te kinne aan d’n hier Maurice Peuten mit zien oetbeelding: Ik doon Mei, duis dich December?, aansloetend aan ’t motto van dit jaor: Doon mei!

Dit jaor haet Veldeke Venlo weer ‘nen aanmoedigingspries veur jeugdige faatse. Vurrig jaor waar d’r genne jeugdige dae in aanmerking kwaam, maar dit jaor waar det waal ’t geval te weite: Siem van Heyster dae mit ziene pap Venlo op de kaart ging zitte.

De faatse van herte perfitsia en zeej kriege eure pries oetgereik door Veldeke Venlo op ’n spesjale beejeinkóms, waoveur zeej genuuejd waere.

Nietsbreef fibberwari 2025

Aan de leje, begunstigers en vreejwilligers van Dialekvereiniging Veldeke Venlo.

‘t Besteur van Dialekvereiniging Veldeke Venlo begint in röstiger vaarwater te kómme. Weej zien mit 5 besteursleje. Det is eigelik te weinig, veur al ’t werk det gedaon mót waere. Weej kinne dus nog altied goje besteursleje gebroeke, want weej zeuke eine vice-veurzitter, ‘ne 2e sikkertaris en ‘ne 2e penningmeister veur ós besteur. Weej hebbe al waat stappe in deze veuroet gezatte. D’r staon waat zake op stapel.

Besteursvergaderinge

’t Besteur geit dit jaor weer vergadere in de baovezaal van “kefee de Gaaspiep” aan de Kleine Kerkstraot in hertje stad. In principe edere ieërste woensdaag van de maond van 20:00 oor wies 22:00 oor.

De Majjem euver

Weej zien in jannewari 2025 de Majjem euver gegaon en waal nao Hou-Blierick. Veur de senioresoos van Hou-Blierick hebbe weej op eine middaag ein prissentasie laote verzörge door d’n hier Frens Bakker van ’t taalinstituut van de Universiteit van Numwaege euver de dialekte van Venlo en umstreke. Truus Verbong haet inkele van zien gedichte veurgelaeze en Wiel van Aarssen haet waat vertelt euver ós vereiniging.

Vreejwilligers gezóch

Wao hebbe weej nog ein tekort aan minse? Weej zien bezig verscheie kemissies en/of werkgroepe te formere en/of kómpleet te make. Um dees kemissies en/of werkgroepe good te laote funktionere hebbe weej vreejwilligers nuuedig. Heejbeej dinke weej aan de kemissie “de “Faatse” (’t jurere van “de Faatse” in de vastelaovesoptochte in Blierick en Venlo). Maar ouk aan de kemissie “Fietstoch” en de kemissie “Vreejwilligersdaag”.

Ouk dinke weej aan vreejwilligers veur ’t “John Tana”-projek. ‘n Muzikaal projek veur de hoeëgste groepe van de basisschoeële en de brugklassers van de hoeëgere schoeële. Wilt geej ‘n hendje helpe, laot ’t ós dan gerös weite.

De “Faatse”

Tiedes de vastelaovesoptochte in Blierick en Venlo jurere inkele van ós leje weer de moeëjste en slaagvaerdigste einlinge (Faatse) in d’n optoch. De beste Faatse krieg nao aafloup ein diploma oetgereik.

“Veurjaorswandeling”

Op zóndaag 6 april 2025 halde weej ós “veurjaorswandeling”. Weej zulle óg binnekort heej euver vaerder informere. Weej sloete deze middaag aaf mit ‘n lekkere tas koffie of thee mit ein stök Limburgse flaai.

De Algemeine Leje Vergadering

D’n datum van de Algemeine Leje Vergadering van ós vereiniging steit vas. De ALV wuurt gehalde op dónderdaag 8 mei 2025. Euver de lokasie informere weej óg binnekort. Geej waert dan genuujd veur dees vergadering mit alle beejbehurende stökke.

Wao wille weej haer mit ós vereiniging?

De geschiedenis van ós vereiniging in de aafgeloupe jaore haet geleid tot ein herbezinning van ós vereiniging (weej hebbe nog ens good naogedach euver de stand van en wao weej haer wille gaon mit de vereiniging). Vuuel leje zien al waat alder en weej wille gaer nie, jónk en vers blood binne ós vereiniging kriege um ouk de toekóms van ózze krink veilig te stelle. Ouk kinder van de lieëgere- en middelbare schoeële. De ieërste fase is gereid. De 2e fase (PR) wuurt opgestart. Weej gaon dit plan veur óg vaerder toelichte op de kómmende Algemeine Leje Vergadering.

De Kroedwis

Mt de redaksie van “de Kroedwis” – ós thoesblaad – is en wuurt oetveurig euverlag um tot ein niejere, frissere en mier aktuele oetgave te kómme. En um ouk same te kieke nao meugelike bezuniginge. Det is nog neet gans gelök. “De Kroedwis” wuurt neet mier gesealed. En wuurt gewoeën thoes bezörg door eine groep vreejwilligers.

De “slumste Venlonaer 2025”

Op 26 oktober steit de kwis “de Slumste Venlonaer” weer op de rol. Vanaaf 14:00 oor kinne de deilnemende koppels zich inspanne um dae pries en titel te winne. En det veur d’n 1e kier ónder de leiding van eine nieje kwismeister.

Samewerking mit Venlo Poëziet

’t Besteur is same mit de Stichting “Venlo Poëziet” bezig um eine wedstried oet te schrieve um gedichte in ’t Venloos dialek, op bekinde en markante gevels in ’t centrum van ós schoeëne stad, te laote aanbringe. Op woensdaag 5 maart wuurt dit allemaol geprissenteerd via de lokale pers.

Aantal leje

Per 1 jannewari 2025 hebbe weej nog 152 leje en óngevier 75 “gölle gaevers”.

Met vrintelike kómplimente,
Names ’t besteur van Dialekvereiniging Veldeke Venlo,
Gerard Derkx
Sikkertaris

Declamatiewedsjtriéd Tegele

In Tegele wuurt de finale van d’n declamatiewedsjtriéd gehaje op 18 april um half 8 in de Harmoniezaal, Poshoesstraat 30.

Ouch dit jaor hebbe weej wir allemaol sjpiksjplinternieje gedichjes en weej sjpitse ós d’r op öm de kinger te zeen en huëre as zeej die declamere.

Geej ziet welkóm.

Weej zeen ós, names de werkgroep Tegelse Declamatiewedsjtriéd Veldeke, Truus Verbong-Simons

Niejsbreef december 2024

’t Bestuur

In april van dit jaor haet d’r ein groeëte bestuurswisselling plaats gevónde binne ós vereiniging. ‘ne Nieje veurzitter, ‘ne nieje penningmeister, 2 jóngere dames en ‘ne nieje sikkertaris zien toegetraoje tot ’t bestuur van ós vereiniging. Gelökkig zien d’r inkele zittende bestuursleje ouk gebleve. Weej hebbe toen aafschied genaome van d’n hier Bas Vissers as veurzitter a.i. De nieje veurzitter is d’n hier Paul Seelen, de nieje penningmeister is Sander Kuilman en de nieje sikkertaris is Gerard Derkx. D’n hier Wiel Maassen haet zien lidmaatschap van ’t bestuur op 3 oktober jl. um persoenlike raeje neer gelag. Inmiddels haet ouk d’n hier Paul Seelen um veur um moverende raeje zien veurzitterschap op 3 oktober 2024 neergelag. D’n hier Jacques van Daelen haet zien funksie van sikkertaris euvergedrage aan Gerard Derkx en is begin december aafgetraoje as lid van ’t bestuur. Weej danke Paul, Jacques en Wiel veur eure belangeloze inzet veur ós vereiniging.

Wao wille weej haer met ós vereiniging?

Dit alles haet geleid tot ein herbezinning van ós vereiniging (weej hebbe nog ens good naogedach euver de stand van en wao weej haer wille gaon mit de vereiniging). Vuul leje zien de pensioengerechtigde laeftied allang veurbeej. Weej wille gaer niej en jóngk, vers blood binne ós vereiniging kriege. Ouk kinder van de lieëgere- en middelbare schoele.

Finansieel

Daorum mótte weej zunig zien op de leje die weej nog hebbe. Aevel weej mótte ouk bezunige. En det op alle vlakke binne ós vereiniging. Ózze penningmeister haet aangegaeve det weej mótte kieke of en wie d’r bezunigt kin waere. Zoe as ’t d’r noaw oetzuut, sloete weej ’t jaor misschien aaf met roeije cijfers. Weej gaon óg heej euver gans beej praote op de kòmmende Algemeine Leje Vergadering.

Ós activiteite

In det kader hebbe weej alle evemente, die weej organisere, taege ’t leech gehalde. Van de fietstoch en de vreejwilligersdaag wies aan “de slumste Venlonaer” toe. Weej hebbe intern gespraoke euver de organisasie, de nuuedige vreejwilligers, waat zien kernaktiviteite van ós vereiniging, de koste van de evenemente en levere dees aktiviteite waal nieje jónge leje op. Weej hebbe dan ouk jaommergenóg mótte besloete dit jaor de fietstoch neet door te laote gaon.

De Kroedwis

Met de redaksie van “de Kroedwis” – ós thoesblaad – is oetveurig euverlag um tot ein niejere, frissere en mier aktuele oetgave te kómme. En um ouk same te kieke nao meugelike bezuniginge. Det is gelök. De Kroedwis wuurt neet mier gesealed. Waal veurzeen van eine adressticker. En wuurt gewoeën thoes bezörg door eine groep vreejwilligers.

Vreejwilligersdaag

Aan de vreejwilligersdaag hebbe weej einen anderen dreij gegaeve. Alle vreejwilligers van ós vereiniging hebbe ’t door d’n hier Bas Vissers nao ’t Venloos vertaalde bukske “’t Kleine Prinske” kedo gekraege. De vreejwilligers hebbe ’t bukske thoes bezörg gekrege door inkele bestuursleje.

De slumste Venlonaer 2024

Op 27 oktober stónd de kwis “de slumste venlonaer” weer op de rol. Vanaaf 14:00 oor spande mier as 25 koppels zich in um dae pries en titel te winne. En det veur de 25^e kier ónder leiding van ózze kwismeister, d’n hier Hans Jacobs. De jury (Frans, Diana, Will, Martien en Wilma) haet eur taak waer volbrach. Net as de meiwerkende vreejwillig(st)ers.

Koersplan

Ós dames in ’t bestuur (Moniek en Jeanette) zien drök doonde de nieje koers veur de vereiniging op te zette. Ein zoegenaamp “Koersplan” Waat is det eine berg werk zeg. Det haet al minnig eurke gekos. Weej gaon dit plan veur óg nader toelichte op de kómmende Algemeine Leje Vergadering.

Ieëre-lid / lid van verdeenste

Weej zien bezig um ein procedure op te zette veur ’t beneume van ein “Ieërelid” en/of ein “Lid van verdeenste” binne ós vereiniging.

Samewerking met VenloPoëziet

’t Bestuur is same met de Stichting “Venlopoëziet” doonde um eine wedstried oet te schrieve um gedichte in ein dialek, binne ’t werkgebied van Veldeke Venlo, op bekinde gaevels in de binnestad van ós Venlo te laote aanbringe. Weej kómme heej binnekort op truuk met aanvöllend niejs. Weej gaon in jannewari 2025 zelfs de Maijem euver en waal naor Holt-Blierick. Veur de senioresoos van Holt-Blierick gaon weej op eine middaag ein presentasie laote verzörge door d’n hier Frens Bakker van ’t taalinstituut van de Universiteit van Nijmege euver de dialekte van Venlo en umstreke. Weej völle zelf ein deil van ’t programma in. Weej haope det geej begrip kint opbringe veur baovestaonde veranderinge.

Ieëre-lid van Veldeke Limburg

Op 21 oktober jl. is in Remund ós lid d’n hier Pieter Ebus door de Algemeine Leje Vergadering van Veldeke Limburg beneump tot “Ieëre Lid” van Veldeke Limburg. Dit umdet Pieter mier dan 20 jaor de penningmeister van ’t Provinciaal Bestuur van Veldeke Limburg is gewaes. Weej felicitere Pieter van herte met dees beneuming.

Vreejwilligers gezóch

Wao hebbe weej noow ein tekort aan minse ? Weej zien doonde diverse kemissies en/of werkgroepe te formere. Um dees kemissies en/of werkgroepe good te laote funktionere hebbe weej vreejwilligers nuudig. Heejbeej dinke weej aan de kemissie “de “Faatse” (’t beoordeile van “de Faatse” in de vastelaovesoptochte in Blierick en Venlo). Ouk dinke weej aan vreejwilligers veur ’t “John Tana”-project. Ein muziekaal project veur de hoeëgste groepe van de basisschoele en de brugklassers van de hoeëgere schoele. Maar netuurlik kinne weej ouk nog vreejwilligers gebroeke veur de verschillende kemissies. Wilt geej ein endje helpe, laot ’t ós dan gerös weite.

Thoesresepte (bukske)

Wilt geej nog ein schoeën kedo koupe veur de Kers, dink dan ens aan ’t bukske “Thoesresepte” det geej kint koupe beej Koops Bookhandel.

Mit vrintelike kómplimente,
Names ’t bestuur van Dialekvereiniging Veldeke Venlo.
Gerard Derkx,
Sikkertaris.

Verslaag van de kwis “de Slumste Venlonaer” 2024

Op zóndaag 27 oktober 2024 woort in Feeszaal “’t Tref” in Venlo-Zuud de jaorlikse kwismiddag gehalde um d’n titel “de Slumste Venlonaer van 2024”. Deze middag woort veur de 25^e kier georganiseert door Dialekvereiniging Veldeke Venlo. De kwis waas veur de 25^e (en ziene letste) kier oetgedach en geprissenteerd door Hans Jacobs.

Volgend jaor wilt hae gaer in de zaal zitte en dan zelf ouk meidoon. Hae haop dan ouk neet mit de “poedelpries” nao hoes te mótte gaon. Veur deze kwis hadde zich 27 koppels aangemeld. Vuuel deilnemers doon al jaore mei aan de kwis.

Tien en Fried van Feeszaal ’t Tref hadde de zaal al weer moeëj aangekleid en ingedeild. De deilnemers dröppelde binne en nome eur plaatse achter de taofels in. Nao ein welkómswaord door d’n opperspraekstalmeister Wiel van Aarssen, woort wethalder Jacques Smeets aan de zaal veurgesteld. D’n hier Smeets begós, op verzeuk van Hans Jacobs, aan de ierste serie vraoge. En waal euver de politiek in Venlo. De köpkes van de deilnemers hoors se krake in de zaal. Dao nao ging de wethalder zelf meidoon. Achteraaf vond hae ’t hiel gezellig en lierzaam en wilt ’t volgend jaor ouk weer mei doon.

Wethalder Smeets noom deil aan de kwis ónder ’t genot van ein glaeske beer.

Ouk Cock Ooms en Dick Evers kwame vraoge stelle aan de deilnemende koppels. Nao 5 vraoge-róndes woort ein korte pauze ingelas. Nao de pauze meuste de deilnemers nog ens 5 spelróndes speule. Marcel Hoogenhuis kwam de deilnemers teste op eur kinnis van de 2^e waereldoorlog. In de letste spelrónde meus ein deil van de deilnemende koppels tegeliek 5 verscheie leedjes zinge. Waat ein kakofonie waas det. Neet um aan te Hure! De jury (Diana, Martin, Wil en Frans) ging aan ’t telle um tot einen oetslaag te kómme. En dae woort door Hans Jacobs geprissenteerd. De gansen oetslaag steit heejónder.

De poedelpries woort gewónne door ’t koppel “de Däölkes”. De 4^e pries ging nao “Festina Lente”. Zeej krege ’t book euver ‘t 100 jäörig bestaon van Feeszaal “’t Tref”.

Henriëtte Bakker (Óngenuujd) ging same met Jos Vullings aan de haol mit d’n 3^e pries.

Harrie Lucker en Niecky van Steenkiste wónne as koppel “Kwanten Trammelant” d’n 2^e pries. Zeej meuge gaon kieke naar de voetbalwedstried VVV taege Emmen.

En zoeë as al jaore gebroekelik ginge pap René en dochter Danee Dings (de Dingskes) mit de ier strieke!

Dit kier waas pap René ’t beste in de ónderlinge stried um d’n titel en meug zich ein jaor lank “de Slumste Venlonaer” neume.

De winnende deilnemers krege, veurdet zeej nao hoes ginge, ’n stóffe rökzekske mit inkele kedootjes oetgereik!

Aan ’t ind van de middaag haet Wiel van Aarssen ederein bedank dae deze middag meuglik haet gemak, veur ziene of euren inzet en daagde de deilnemers oet um volgend jaor ouk weer mei te doon.

Weej make binnekort de datum van “de Slumste Venlonaer 2025” bekind.

Gerard Derkx

Foto’s: Jos Verbong

Veur de 25e kier: de slumste Venlonaer

Op zóndaag 27 oktober vanaaf 14.00 oor zuk Dialekvereiniging Veldeke Venlo in ’t Tref aan de Hendrikxstraot 17 in Venlo weer “de slumste Venlonaer’’. Ózze Kwis Meister Hans Jacobs haet weer naogedach euver allerhande saorte vraoge die mit Groeët Venlo te make hebbe.

Wilt geej óg kinnis van Venlo op de proof stelle? Doot dan mei mit deze geweldige kwis mit vraoge euver dialek, cultuur, geschiedenis, meziék en neum maar op.

Koppels kinne zich heej aanmelde veur deze ludieke, joeksige, spannende middaag of aan de zaal op 27 oktober vanaaf 13:30 oor. Koppels die meidoon mótte herkinbaar zien met beejveurbeeld ’t zelfde hudje, slieps of sjaelke. Bedink ouk ‘ne kwante naam!

De koste zien € 7.50 per inschrieving/koppel en daoveur kriege de deilnemers ouk nog ‘n Veldeke-pen.

Schrief óg op tied in, want vol=vol. Wae dörf?

Aanmelde

Informatiesessie Limburgse Taal

Op woensdag 23 oktober a.s. houdt Het Hoes veur ’t Limburgs een informatiesessie ‘Limburgse Taal en erkenning Deel II of Deel III Europees Handvest’ op Weerstand Roermond. Tijdens deze sessie zal worden ingaan op de praktische, beleidsmatige en financiële aspecten van het Limburgs en andere regionale talen in het kader van het Europees Handvest Deel II en Deel III. Deze sessie biedt een unieke kans om van gedachten te wisselen en inzichten te krijgen van deskundigen op dit gebied. Aanmelden is verplicht en kan via dit inschrijfformulier t/m donderdag 17 oktober.

De sessie start om 16:30 uur en duurt tot 19:00 uur en wordt gehouden bij Hoes veur ’t Limburgs, Weerstand Roermond, Bredeweg 10, 6042 GG, Roermond.

Het volledige programma is te vinden op de site van Hoes veur ’t Limburgs.

Priesoetreiking aan de faatsewinnaer

Tiedes de algemeine lejevergadering op 25 april zien de prieze oetgereik aan de winnaers. De winnaer van Venlo Toën Feyen kreeg ’t beeldje det is gemak door Mariëlle Franssen oet hand van Bas Vissers. De zjurieleje Henny, Frans en Joep ware getuge heejvan.

Hay Goerts as winnaer van Blierick waas neet aanwezig. Hae krieg ziene pries op ’n ander moment oetgereik.

De veur- en achterkant van de beeldjes.

Inmiddels is ’t beeldje oetgereik aan d’n Blierickse winnaer dae d’r erg blie mit is.

Finale Declamatiewedstried Limburg 2024

Maar leefs 28 kinger óet Limburg lete zich van de beste kank zeen en huëre op de finale van de Limburgse declamatiewedsjtriéd op 25 mei 2024, dae in d’n Hanenhof in Gelaen gehaje is. Sjtök vur sjtök versjrikkelik good! Complete femielies zote in de zaal volop te geniete.

Aevel, de jury had ’t zjwaor! ’t Waas has ônmeugelik öm winnaers te keze. Toch is ’t gelök.

Van de krink Venlo deje 8 kinger mei. Djemke, Eliza, Emma, Esmee, Izabella, Lana, Nikki en Vayèn. Maar leefs dreej priéze hebbe weej mei nao Noord Limburg genaome. Dao zien weej hiel gruëts op.

Emma Verlinden óet Tegele kreeg de aanmoedigingspriés met ’t gedich miene knuffel van Mariska Reer.

Djemke Schouwenberg óet Tegele had de 3e priés van de ôngerbouw, ouch met miene knuffel van Mariska Reer.

Eliza Derijk óet Venlo wôn de 3e priés van de middebouw met femielie Muuske van Truus Verbong-Simons.

Det d’r Tegelse minse in de zaal ware, bleek waal toen Hans Jacobs (de presentator) begôs te zinge: “En as weej wir nao Tegele gaon”. Alle Tegelse zônge mei.

D’n óetsjláag sjteit op: Veldeke Declamatiewedstrijd: de winners – Veldeke Limburg .

’t Waas eine hiele sjoëne middig met versjrikkelik gôjje kandidate.

De Waereld in Limburg

Waat mak Limburg eigelik ”t Limburg’ det weej noow kinne? In de viefdeilige serie De Waereld in Limburg neemp schriever, muzikant, journalis en historicus Frans Pollux dich mit op ein fascinerende reis door de vuuelzijdige en rieke Limburgse cultuur. De serie is te zeen op L1 vanaf zóndag 2 juni 2024.

De ierste oetzending geit euver Erfgood. Veldeke is neet alleen sponsor maar in ein van de afleveringe ouk vertaegewoordig.

Mier informatie is heej te vinde.