De slumste Venlonaer van 2022 is bekind

Zóndaag 30 oktober in ’t Tref zote 23 koppels klaor um de vraoge van kwismeister Hans Jacobs te beantwaorde.

Nao 9 rundes mit vraoge mit ónder andere waat wets se van ’t hoeëgste gebouw, euver sportvereiniginge, Venlose spreuke, jaortalle en nieëts bleek det tösse de nummers 1, 2 en 3 steeds 1 punt verschil zoot.

Mit 92,5 punt zien de winnaers Die Twieë bestaonde oet Ria en Wiel van Aarssen. In de beslissende runde tösse eur wis Ria de meiste goje antwäörd te gaeve op de door Hans gevraogde wäörd en meug zich de Slumste Venlonaer van 2022 neume. Perficiat!

Op de 2e plaats zien geëindig Bert Driessen en Gerard van Gestel as Noeëts Druueg I en as 3e woorte René en Danee Dings gehöldig die ónder de naam De Twieë Dingskes deilnome.

D’n troeëspries waas veur Elly Ebus en Ria Maas die as Trutjes op de letste plaats eindigde.

’t Waas alweer ‘ne bizónder geslaagde, lierzame en gezellige middaag. Volgende jaor weer, de letste zóndaag van oktober.

’n Verslaag van deze middaag kump nog en det steit straks ouk in de Kroedwis van december.

Wae van óg wuurt de slumste Venlonaer van 2022?

Op zóndaag 30 oktober 2022 vanaaf 14.00 oor zuk Dialekvereiniging Veldeke in ’t Tref, Hendrikxstr. 17 in Venlo weer “de slumste Venlonaer’’. Kwis Meister is Hans Jacobs.

Wilt geej óg kinnis van Venlo op de proof stelle, doot dan ens mei met deze geweldige quiz mit foto’s, items euver van alles en nog wat det mit Venlo te make haet, dialek, cultuur, de stad zelf, historie en neum maar op.

Koppels kinne zich heej aanmelde veur deze ludieke, joeksige, spannende middaag of aan de zaal op 30 oktober 2022 vanaaf 13.30 oor. De koppels die meidoon mótte ’n bietje herkinbaar zien mit beejveurbeeld ’t zelfde hudje of dezelfde sjaal. Bedink veur óg koppel ‘ne kwante naam!

De koste zien € 5,00 per inschrieving/koppel en daoveur krieg geej ouk nog ens ein consumptiebón per persoeën.

’t Is kwant um mei te doon. Det hure weej idder jaor van de koppels die meidoon en de luuj die kómme kieke. Eine kier meidoon en geej ziet verkoch!

Zeen weej óg op 30 oktober?

Schrief óg op tied in, want vol=vol. Wae dörf?

Fietse mit Veldeke Venlo

Op zóndaag 9 oktober kint ge ‘ne fietstoch make, georganiseerd door Veldeke krink Venlo.

De organisatie “de fietsbel” haet ’n route oetgezatte van 33 kilomaeter die löp van Venlo-Velde-Lómm-Árce via Pruuses truuk nao Venlo.

’t Startpunt is beej Grand Café De Maagdenberg. Vertrek tösse 11:00 en 12:30 oor naodet iers ’n lekkere tas kóffie of thee is gedrónke mit ’n stök flaai. ’t Indpunt is beej Kefee De Gaaspiep wao de deilnemers uterlik um 17:30 waere verwach. Beej aankóms dao krieg geej 3 kónsumptiebónne en wat lekkers veur d’n innerlike mins.

Opgaeve uterlik 25 september via de link in d’n activiteiteagenda.

De koste zien 7,50 euro veur leje/dónneteurs en 12,50 veur neet-leje.

Vaerdere bizónderhede staon in d’n activiteiteagenda vermeld.

Oeuvrepries 2022 veur John Coenen

Iervolle ónderscheijing veur Mestreechse componis, teksschriever en zenger

Mestreechtenaer John Coenen (1945) óntvingk dit jaor de Veldeke Venlo Oeuvrepries van ’t Limburgse Leed. Veurzitter Henk Buskes van Veldeke Venlo makde det bekind in ‘t L1-radioprogramma Plat-eweg van Henk Hover. John reageerde verheug op de toekinning van dees jäörlikse ónderscheijing. De leedjesmaker en zenger wuurt mit de pries geierd veur zien umvangrieke oeuvre en zien verdeenste veur ‘t Limburgse leed. Op zaoterdaag 17 september tiedes de Nach van ’t Limburgse Leed in Venlo is de pries oetgereik.

Motivering

John Coenen haet ’n oeuvre um geej taege te zegge. De meiste minse kinne um van Taai Taai, maar hae haet nog vuuel mier gedaon. Zoeë zoot John in hiel waat bands en schreef hae tal van leedjes, zoeëwaal veur zichzelf as veur andere. Weej as Veldeke Venlo zien ónder d’n indrök van alles waat hae decennialank haet gedaon en vinde John Coenen ‘n waerdige toevoging in ‘t moeëje rieke van winnaers det weej óndertösse hebbe.

Euver John Coenen

De muzikale loupbaan van John Coenen deurt inmiddels zó’n zestig jaor. As zenger is hae waal al ‘nen tied gestop, maar as schriever is de Mestreechtenaer nog altied actief. Beej ‘t groeëte publiek is Coenen veural bekind as lid van ’t duo Taai Taai det hae in 1996 starde. In ieërste instantie is Jos Wolfs ziene zangpartner, maar dae woort al rap opgevolg door John Dams. Mit hits as Viva Tirol, De Alpen express en Roed zien de roeze wet Taai Taai zich ouk landelik in de kieker te speule. Veur die periode speult en zingk hae beej d’n dialekband Fietsefreem en nao Taai Taai bouwt Coenen vanaaf 2004 ‘n moeëje solocarrière op.

As componis en teksschriever schreef Coenen leedjes veur allerhande Limburgse artieste. Regelmaotig deej hae det mit collega Guus Smeets, dae in 2013 de Oeuvre-Pries in óntvangs meugde neme.

Veurdet Coenen zich op ‘t Limburgse leed stort, is hae iers actief in dansorkeste en later in de Limburgse popscene, waobeej hae in bands as The Walkers en The Press speulde. Ouk veur dees bands schreef hae leedjes. Zelfs de Amerikaanse ster Telly Savalas nimp repertoire van Coenen op. Ouk de dialeknummers van John Coenen blieve in ‘t boeteland neet ónopgemerk: beej internationale sterre as Hansi Hinterseer en Andreas Gabalier staon vertaalde leedjes van John op de setlies.

Reactie John

Ik veulde mich zier verierd wie ik door Veldeke woort benaderd. In ‘t begin waas ik ech flabbergasted, um ‘t op zien ‘Limburgs’ te zegge. Ik kós de pries al. Det ik op dees meneer geieërd waer veur waat ik heb gedaon is prachtig. As ik kiek nao de ieërdere winnaers dan zien ‘t stök veur stök minse die hiele moeëje nummers hebbe aafgeleverd, ein bietje ein dwarsdoorsneej qua meziekstiele. Hiel moeëj det ik dao vanaaf noow tösse meug staon.

Cursus “Venloos laeze en schrieve” start weer

Weej organisere vanaaf dónderdaag 13 oktober 2022 weer ‘ne cursus ‘Venloos laeze en schrieve’ beej Gilde opleidinge, Laaghuissingel 4, 5913 ES Venlo. De (7) data zien: 13 en 20 oktober, 3 – 10 – 17 en 24 november en 1 december. Aafsloetend vindt nog ‘n gezellige certificaatoetreiking plaats op 15 december 2022. Aanvang van de lesse is um 19:30 oor. Maximaal 30 cursiste. Docent is Bas Vissers.

In deze cursus kómme diverse aspekte aan bod die heejmei te make hebbe: geej liert o.a. waat ’t verschil is tösse ein dialek en ‘n taal, wie ‘n taal óntsteit, waorum weej dialek mótte blieve spraeke en wie weej dit ’t beste kinne behalde, wie tale functionere, waorum weej sóms taalstructure hebbe die stale op ’t Duits en sóms op ’t Nederlands en waorum weej ‘nao ’t Zuje’ gaon en waorum ’t neet ‘Waor woeëns dich?’ is, waorum weej sóms trema’s gebroeke en weej nog maar zelde accente hantere, waat ’t verschil is tösse hoes, hoe~s en hoeës, of tösse liene, lie~ne en lieëne, wie se det oetdröks in schriefwies, waat ‘ne stoeëttoeën is en waat überhaupt ‘n toeëntaal is…. En dit is nog maar ‘ne willekeurige greep oet d’n inhald van de cursus.

Weej wieze d’r waal op det ’t heej ‘ne cursus laeze en schrieve betref: ’t is aan te bevaele det geej al gebroeker ziet van ’t dialek. ‘ne Cursus Venloos spraeke veur neet-dialekspraekers is in óntwikkeling. Hald heejveur de lokale berichgaeving in de gater.

Koste:

€ 50,- veur leje van Dialekvereiniging Veldeke Venlo

€ 75,- veur neet-leje

Heejbeej zit inbegrepe ’t cursusbook en ‘n tas kóffie of thee tiejes de aovende.

Waat geej waal zelf nuuedig heb, det is ’t nieje (witte) Venloos Waordebook, volop te koup beej de diverse bookhandels in Venlo en Blierick. Dit waordebook is gebaseerd op de Spelling-2003 veur de Limburgse dialekte en det is ouk de leidraod gewaes veur de cursus.

Wis geej trouwes det geej lid van ós vereiniging kint waere veur € 28,00 per jaor? En ’t ierste jaor veur cursiste is gratis.

Aanmelde kin oetsloetend via de website van Veldeke Venlo. Aanmelde is nimmer meugelik.

Wandeling Hoeëgekamp

De beperkende Coronamaatregele ligge gelökkig achter ós. De beteikent det weej, ouk waat betref ós activiteite, d’n draod weer kinne oppakke. Ein van die activiteite is de “Stadswandeling”. Stadswandeling tösse aanhaolingsteikens umdet de kómmende wandeling neet door de binnestad van Venlo zal gaon, wie Stadswandelinge gewoeën zien te doon.

Op 4 September aanstaonde geit ’t dan gebeure. Weej gaon dan wandele door ’n stök Venlo gelaege tösse de Börgemeister van Rijnsingel (veurhaer d’n Oostsingel) en de Hertog Reinoudsingel. Ózze werknaam veur dees wandeling waas de Stalbergwandeling, aevel gans officieel wuurt dees wiek Hoeëgekamp geneump. Tja wie zaet d’n Ingelsman? “Whats in a name”.

Wie gezag dees wandeling geit plaats vinde op 04 September aanstaonde. Beejein kómme doon weej dan um 14.00 oor beej Hotel American aan de Kölschepoort 14 (taege euver ’t Limburgs Museum). Nao ’n tas kóffie en ’n stök flaai loupe weej dan aan. Dees wandeling zal dan óngevier 1 à 1½ oor deure.

As beejdrage in de koste vraoge weej aan ós leje en donnateurs € 5,00 per persoeën. Neet leje / donnateurs kinne zich ouk opgaeve maar betale dan € 7,50 per persoeën. Aan dees wandeling kinne aevel maximaal 40 persoeëne meidoon.

Opgaeve en betale veur dees wandeling kint geej óg via de website: veldekevenlo.nl. As geej óg heb opgegaeve en betaald, krieg geej automatisch via de mail ’n bevestiging van deilname.

Laot óg verrasse en vuuel plezeer gewins tiedes dees wandeling.

Met vrintelike kómplemente,

Wiel en Wiel

Oetsjlaag Tegelse Declamatiewedsjtriéd Veldeke 2022

’t Waas alwir dreej jaor geleje det de Tegelse declamatiewedsjtriéd – toen nag in ’t Zaelke – had plaatsgevônge. Eindelik waas ’t wir zoë wiéd. Op Gójje Vriedig 15 april 2022, kwame hiel vuël kinger, breurkes, zuskes, elders, opa’s, oma’s, sjriévers en liërkrachte same in de verniejde Harmoniezaal in Tegele. Wat hebbe we wir genaote van zoëvuël minse die ’t Tegels dialek ’n werm hert toedrage. Óndanks get technische mankemente hebbe de kinger kenne sjtraole op de buun. Kinger, van klein toet groët, van verlaege toet get vrejer, met ’n kort of ’n lank versje, ze sjtinge d’r! Nao de äopening van Veldeke-veurzitter Henk Buskes, wis presentatrice Yvonne Rijs alle deilnimmers gerös te sjtelle. Monique Munten, Ruud Munten en Frans Hovens, leje van Optochgroep “Nag Ech Tegels”, hadde as jury de oëre gesjpits öm te luustere of d’r nag ech Tegels woort gesjpraoke.

In de pauze ginge de vutjes van de vloer en de hendjes opein met de Mini-dansgarde van VG d’n Oeles.

Weej zien d’r bliéj mei det fotograaf Bart Douben de gansen aovend al det sjoëns haet vasgelag. De foto’s kent geej binnekort zéen op ós eige Facebookpagina Declamatiewedsjtriéd Veldeke Tegele. Volg ós en haaj ós in de gate, want as werkgroep gaon we ós úterste bes doon öm ’t Tegels dialek met get verniejinge laevend(ig) te haje.

D’n óetsjláag van de finale-aovend is as volg:

Óngerbouw:

Jip Hendriks met Wiebele van Linda Hanraets-Weber
Divainney Schermer met Fruit aete van Truus Verbong-Simons
Liza Hanraets met Wiebele van Linda Hanraets-Weber

Middebouw:

Mischa van Enckevort met De sjnië in van Hanneke Konings
Max Verlinden met Met pap op sjtap van Leonie v.Hulten- v.Rhee
Tom Groenewegen van der Weijden met De sjnië in van Hanneke Konings

Baovebouw:

Minou van Hees met Ein good idee van Hanneke van der Sommen
Jikke Thissen met Ein good idee van Hanneke van der Sommen
Max Smeets met Race oma van Leonie v.Hulten-v.Rhee

Dit jaor is d’r vanwaege de ónzekere Coronatiéd gen Limburgse finale.

Ouch volgend jaor haope weej d’r same met uch wir ’n fiësje van te meuge make.

Bedank allemaol!
Groetjes,

Names de werkgroep Tegele
Van dialekvereiniging Veldeke Venlo

Susan Janssen
Nicol Ebus
Truus Verbong

Gedichte-Tegelse-Declamatiewedsjtried-2022 Downloaden

Gedichtebundel 75 jaor Veldeke Venlo

Beej gelaegeheid van 75 jaor Dialekvereiniging Veldeke Venlo zien de gedichteschriefsters en -schrievers van ’t dialek die ónder de plaatse van de vereiniging valle, gevraog um ’n veertal gedichte in te steure. Raeje daoveur is ’t oetbringe van ’n book mit ’n bloomlaezing van gedichte in ós moders taal. Oet alle reaksies en de veurraod van gedichte van euverleje dichters haet ‘ne werkgroep ’n selectie gemak.

Die selectie haet geleid tot ‘ne gevarieerde gedichtebundel mit 100 gedichte en veurzeen van foto’s oet de betrokke plaatse. Dit book is te koup beej Bookhandel Koops in Venlo of te bestelle via eure webwinkel. Ouk beej verscheie plaatselike verkouppunte wuurt dit book aangebaoje. De pries is € 14,95.

Oeuvrepries 2021 Ton Engels

Kroeën op ‘t werk veur leedjesmaker oet Panninge/Kepèl

Ton Engels is dit jaor d’n óntvenger van de Veldeke Oeuvre-Pries van ’t Limburgs Leed. Veldeke Venlo-veurzitter Henk Buskes makde dit in ‘t L1-radioprogramma Plat-eweg van Henk Hover bekind. De oet Panninge aafkómmende leedjesmaker wuurt daomei ge-ierd veur zien groeët oeuvre. Normaal wuurt de pries tiedes de Nach van ’t Limburgse Leed oetgereik, umdat ‘t evenement door de coronasituatie neet doorging, vónd de oetreiking plaats in de oetzending van Henk Hover.

Motivering Dialekvereiniging Veldeke Venlo

Veurzitter Henk Buskes: Ton mak ós al mieër dan viefentwintig jaor moeëje dialekmeziek. Hae haolt ‘t underste van zien kunne deep oet zien zeel. In al zien puurheid is hae eine bevlaoge zenger en leedjesschriever. Ton Engels haet zien nummers in hiel Limburg en ouk vaer dao boete oetgedrage. Hae huurt tot de allerbeste singer-songwriters dae ós provincie aan te beje haet. De poëtische krach van zien leedjes gecómbineerd met zien geweldige gitaarspel mak Ton tot eine arties van de bäöveste plank. Op professionele wies zit hae zich al jaore in um ederein kinnis te laoten make met zien leefde veur Limburg, door middel van zien leedjes en optraeje. Hae is einen echte ambassadeur van ózze Limburgse cultuur en ós leedjes.

De Veldeke Oeuvre-Pries van ’t Limburgs Leed
Veur de vieftiende kier guf Dialekvereiniging Veldeke Venlo d’n Oeuvre-Pries oet. Det dit in andere jaore altied tiedes de Nach van ’t Limburgse Leed gebeurt ónderstreep de bizóndere samewerking die d’r tösse de vereiniging en ‘t festival is. De pries geit eder jaor nao eine persoeën of groep mit jaorelange verdeenste veur de Limburgse dialekmeziek in en boete de provincie. De winnaer krieg ein kunswerk gemak door Mariëlle Franssen en ein oeërkónde.

Ton Engels

Ton Engels (1952) oet Panninge haet al ein rieke, jaorelange muzikale loupbaan achter de rök as hae in 1994 euver geit nao dialekmeziek Wies daen tied zingk en schrief Ton in ‘t Ingels: met ziene groep Blowbeat toert hae jaore in ‘t binne- en boeteland. As hae óntdek det ‘t schrieve van leedjes in ‘t dialek um good aafgeit, bouwt Ton ein twieëde carrière as dialek-arties op. In 1995 verschient zien album Plat, gevolg door nog vief cd’s in de taal van zien dörp. In 2000 is Ton d’n ieërste winnaer van de Priès van ’t Limburgs Leed, d’n aanmoedigingspries van de Nach van ’t Limburgse Leed dae later woort umgeduip tot Jo Erens-Pries. Ton Engels schrief ein groeët dialek-oeuvre beejein en wuurt euveral geroemp vanwaege zien goje tekste en sterk gitaarspel. De leedjesmaker, ouk as docent songwriting aan de Fontys Rockacademie in Tilburg werkzame, is ‘nen echte verhaoleverteller en haet de gave mit eeldende tekste zien zeel bloeët te gaeve en andermans zeel te rake. Nao Arno Adams is hae d’n twieëde arties dae de aanmoedigingspries van de Nach van ’t Limburgse Leed en de Veldeke Oeuvre-Pries wit te winne.

Reactie Ton Engels

‘Ik vind waal det ik cóntent mit mien oeuvre bin. As ik zoeë de ganse rie aan leedjes bekiek dink ik: d’r zitte einen houp goje dinger beej. Ik heb mich altied veurgehalde um meziek te make dae ik, as ‘t op de radio veurbeej kump, zelf de meujte waerd zoel vinde en ouk zoel wille aanschaffe. Bij ‘t meiste van wat ik heb gemak is det tot op d’n daag van vandaag zoeë. Mien oeuvre greujt nog altied, maar as ik iets niets maak, mót ‘t per definitie ouk iets toevoege. ‘t Mót neet ein herhaoling zien van waat ik al heb, al wuuert die kans neteurlik altied groeëter.’

Oeuvrepries 2020 Arno Adams

Det haet de Veldeke Venlo-veurzitter Henk Buskes bekind gemak in ‘t L1-radioprogramma Plat-eweg van Henk Hover. De oet Belfeld aafkómstige singer-songwriter wuurt dao mit geierd veur zien rieke oeuvre, det noow besteit oet ónder mier zeve albums en ruum twieë decennia aan dialekmeziek. ‘t Oeuvre van Arno Adams wuurt nog altied oetgebreid: in de radio-oetzending kóndigde hae aan det d’r nog ein volledig album op de plenk leet, waat binnekort oetgebrach geit waere. De cd bevat materiaal det zestien jaor geleje is opgenaome, maar door umstandigheje noeëts is verschene.

Door de coronamaotregels vindt de oetreiking van de Veldeke Oeuvre-Pries dit jaor neet zoeë as gebroekelik plaats tiejes de Nach van ’t Limburgse Leed: umdet ‘t fees is aafgelas krieg Arno Adams ziene pries, ein kunswerk van Mariëlle Franssen, op vriedaag 18 september 2020 in ‘t telelevisieprogramma Nedinscoplein op Umroop Venlo.

Al ruum twieë decennia mak Arno Adams op gehiel eige wies dialekleedjes. Mit zien herkinbaar stumgeluud zingk hae euver waat hae zoeëal in zien laeve haet meigemak of um zich haer zuut gebeure. ‘t Levert ierlike, rauwe leedjes mit ein reifelrendje op, Dök zien ’t leedjes mit ein bluestintje. Alles waat Arno mak kump rech oet zien hert en is dus puur. Zónder concessies te doon hilt de talentvolle en authentieke Belfeldse singer-songwriter zich al jaorelank staonde in ‘t dialekmeziekwaereldje en haet hae ein indrökwekkend oeuvre opgebouwd.