Faatse 2008

D’n optoch in Blierik

Op vastelaoveszóndaag 3 fibberwari trok eine kleurrièke optoch door ein winderig maar zónnig Wortelepinnerièk

De straote stónde vol met minse, de mezièkgezelschappe speulde de lónge oèt ’t lièf en de optoch deilnemers haolde alles oèt de kas um zich zoeë good meugelik aan de toeschouwers te prissentere.
Ouk de faatse zörgde veur vuuel “krinte in de pap”, d’r deje mier as 20 faatse mei en ze hadde allemaol eur uterste bes gedaon um zoeë origineel meugelik veur d’n daag te kómme. Det makde ’t veur de jury van de faatse neet gemekkelik.
In ’t jury euverleg nao d’n optoch woorte alle faatse doorgespraoke en kóste de juryleje nog ens hertelik lache um de prachtige en köstelike invalle van de individuele deilnemers.
Oètintelik stoke d’r toch waal 2 dames (die al jaore as faatse meitrekke in d’n optoch) baovenoèt te weite:

Mevrouw El Linders-van den Brandt en mevrouw Margriet van den Brandt-Schattorie

Met as ónderwerp de iërste prinses van de Wortelepin met ’t dansmerieke.
De prinses had vuuel aandach bestaejd aan de prinsekleier: jao zelfs ’t rokwit waas neet vergaete. Ouk ’t dansmerieke zoog d’r schitterend oèt in ein moei pekske met pruuk en hood. Waat d’n doorslaag goof beej de jury waas de wisselwerking met de kièkers naeve de ganse optochwaeg. ’t Dansmerieke bleef d’n hoeëgheid veurstelle en d’n hoeëgheid bleef ederein groete, ouk op de bäöveste verdeping van ’t verzörgingshoès.

D’n optoch in Venlo

Op vastelaovesmaondaag leet Pluvius, de god van de raege, zeen wae in Venlo d’n baas is euver ’t waer.

Det ’t raegende kós de stumming van de deilnemers aan d’n optoch aevel gen kwaod doon: ’t enthousiasme struimde door de ganse lange en bónte stoet van prachtige wages, kleurige groepe te voot (met of zónder bolderwages), mezièkgezelschappe te voot of op de joeksmobiel. Maar zièr zeker de faatse lete zich neet kinne want d’r lepe d’r zoewat 20 mei in dae prachtige optoch van ’t jubilerend Venloos Vastelaovesgezelschap Jocus. Maar um 15.00 oor ginge de raegensloèze en dus ouk de parapluje toe en kóste we genete van eine schoeënen optoch.
\Beej de faatse ware inkele minse die zeker opvele door ein origineel idee en de wisselwerking met de kièkers naeve de straot. D’r ware ouk faatse met ein good idee, maar die lete de minse naeve de straot links ligge.
De jury waas nao euverleg einstummig van meining det ’t meist origineel veur d’n daag kwaam:

Mevrouw Irene Nabben en d’n hièr Roland Heger.

Met ein creatie wao ederein in ziène kindertièd waal ens aan haet gedaon te weite Belke trekke. De kleier, d’n opmaak, ’t gedraag, de attribute en ’t kóntak met de minse naeve d’n optochwaeg: alles pasde persies beejein. Al met al de juuste winnaers van de Faatse trofee 2008.

Weej van Veldeke zien euveriges van meining det alle faatse, die meilepe in d’n optoch, gewónne hebbe. In eder geval hebbe zeej de aandach en d’n dank van alle minse naeve de waeg gekrege. Weej fillisitere dan ouk alle faatse en in ’t biezónder de winnaers. De winnaers zulle de faatse trofee kriège oètgereik ónder ’t Klasjenere met Veldeke op 21 september 2008
Vanzelfspraekend is ’t heej op zién plaats um ouk de leje van de jury in Blierik en Venlo hertelik te danke veur de meujte die ze ouk dit jaor weer hebbe gedaon en daomei ein beejdrage hebbe geleverd aan ’t in stand halde van de Faatse in de optochte, want zeej zién toch de “krinte in de optochpap”.