Blierick 19 fibberwari 2012
Op zóndaag 19 fibberwari trok de groeëte vastelaovesoptoch door de straote van ’t Wortelepinnerièk. ’t Motto van dit jaor waas: ”Weej zette de bleumkes boète”. D’r deje 79 wages en groepe met aan d’n optoch. Einen optoch met vuuel kleur en mezièk en ein gooj stumming beej de deilnemers en de kiekers. De waergode ware ós aevel neet good gezind, ein hagel- en sniejbuuj ware dan ouk ‘t gevolg. Det deej de deilnemers gen kwaod en makde niks oèt veur de joeks en jen ónderwaeges.
Weej as 3 köppige jury veur de Veldeke trofee hadde as taak de faatse te jurere.
Zeej meuste aan inkele punte voldoon die we van teveure in ós euverleg hadde vasgesteld: o.a. de ganse optoch meiloupe en good kóntak make met de minse naeve de waeg.
D’r ware vuuel faatse en inkele ware zoeë good det ze met kóste doon veur de Veldeke trofee. Ein minpuntje waas waal det vanaaf de Breetsestraot nao de Averbodestraot vuuel gater in d’n optoch kwame waodoor vuuel minse neet wachde, maar (ouk door ’t mindere waer) nao hoès ginge.
Nao wiès beraod kwame weej tot de conclusie det de winnaers van dit jaor ware:
Leo Verberkt en Jenne Peeters met eur motto: Weej halde alles in de gaate.
Ós taak as jury veur 2012 zoot d’r weer op.
Henny Crommentuyn, Jos Beerkens en Henk Holthuysen
Venlo 20 fibberwari 2012
‘t Is good waer, en d’r staon al hiel vruug vuuel minse naeve de optochroute.
Idderein is al moei verkleid en det doon ouk idder jaor mier groeëte minse en kinder die nao d’n optoch gaon kièke.
Um ein oor (13.00) kump d’n optoch de Parade op. Met as motto: Dao fleur se van op, mótte d’r 83 wages/groepe veurbeej kómme. D’n optoch waas kleurig, maar det goof ’t motto ouk aan, en de deilnemers hadde allemaol gooj zin. ’t Waas ein prach um aan te zeen. De faatse deeje eure naam alle ièr aan: kleurig, plezerig en (haos allemaol) vol met joeks en jen. ’t Waas veur de jury dan ouk lastig um ein keus oèt de 38 faatse te make.De juryleeje hebbe saame gekeke wae in aanmerking zoel kómme veur de Veldeke trofee.
En de jury is unaniem tot ein keuze gekómme, en waal veur d’n ierste priès:
d’n hièr Gé Smeets: Lach mei, dao fleurse van op.
D’n aanmoediginspriès is veur; d’n hièr Han Beusker e.a. Ellef jaor vors.
Weej, jury oèt Venlo van de Veldeke trofee (faatse), kièke weer oèt nao d’n optoch van ’t volgend jaor.
Henny Crommentuyn, Han Thijssen en Wiel van Aarsen
