Venlo 11 fibberwari 2013
‘t Waar ‘ne hiele kalden daag, maar gelökkig waal druueg. Door ’t waer ware d’r In ‘t begin weinig minse naeve de straot. ’t Veulde hiel kalt aan door dae wind. Maar wie d’n optoch d’r aan kwaam waar de Parade good vol.
D’r waas ein geweldige stumming, die bleef wies ‘t ind. Jaomer det der zoeë weinig faatse waare, in zien totaal 28. Waal ware zeej allemaol hiel kwant en waas ’t lastig um dae goje oet te keze. Oetintelik is ‘t gewaore: IK BIN DER MIT ‘T KÖPKE BEEJ van Jos Valkenburg. D’n aanmoedigingspries is veur: OUK WEEJ BEKINNE van Frank Holzapfel. ’t Waas weer eine schoeëne optoch ! De faatse jury: Wiel, Han en Henny
Blierik 10 fibberwari 2013
Op zóndaag 10 fibberwari trok weer de groeëte vastelaovesoptoch door ’t Wortelepinneriek. Vastelaovesgezelschap De Wortelepin hat dit jaor ’t motto: “Blierik straolt”. De waergode ware ós aevel neet al te good gezind. Eine frisse wind leet de geveulstemperatuur flink kalt aanveulen. Persies op tied begós d’n optoch te trekke. D’r stónde doezende minse naeve de waeg in ’t centrum van Blierik. ‘t Waar eine geweldige optoch met vuuel kleur en mezièk en ein opperbeste stumming beej de deilnemers en de kiekers naeve de optochroute.
‘t Motto: “Bliërick straolt” kwaam good oet de verf.
D’r ware neet zoeëvuuel faatse as andere jaore, maar die mei hebbe geloupe ware erg origineel. Ein thema det vuuel te zeen waas: de Blierickse bieb beej Berden. Als 3 köppige jury veur de Veldeke Trofee hadde weej de taak um de origineelste faatse d’r oet te haole en as winnaer van de Veldeke trofee aan te wieze. Nao aafloup van d’n optoch (van haos 2 oor) kwame weej beejein in ’t Raodhoes um de winnaar vas te stelle. Nao slum beraod kwame we tot de winnaers van dit jaor: Ben Bettinger en Geert Rutten met eur motto: Weej hebbe um hange. Dit ging euver de vastelaovesposter van Limburg. Nao nóg wat gezellige eurkes zoot ós taak d’r veur 2013 weer op. Wies ‘t volgend jaor, names de Veldeke trofee jury in Blierik. Henny, Henk en Jos
